Matanga ti Pâque ti ngu 32 apusu nduru awe, na Jésus angbâ ti fa tënë mingi na Galilée. Na pekoni, âmanke lo gue na Jérusalem ti sara matanga ti Pâque tongana ti so Ndia ahunda. Me, lo sara ye na hange ndali ti so aJuif ayeke gi lo ti fâ lo (Jean 7:1). Na peko ti matanga ni, lo kiri na Galilée.

Peut-être Jésus ayeke lani na Capernaüm, na ngoi so aFarizien na ascribe alondo na Jérusalem aga ti bâ lo. Ala sara voyage ni so ngbanga ti nyen? Ala yeke gi lani mbeni tënë so ala peut ti bi na li ti Jésus. Ala hunda Jésus atene: “Ngbanga ti nyen adisciple ti mo ayeke doro ngobo ti azo ti giriri? Na tapande, tongana ala ye ti te kobe, ala yeke sukula maboko ti ala ape.” (Matthieu 15:2). Nzapa ahunda nga lâ oko ape na awakua ti lo ti tene ala “sukula maboko ti ala juska na nduzu si.” (Marc 7:3). Ye oko, ti aFarizien, tongana mbeni zo asara ni ape, a yeke tongana kota siokpari la lo sara so.

Ahon ti tene Jésus akiri tënë na gingo yanga ti ala so droit, lo fa na ala tongana nyen la ala yeke doro Ndia ti Nzapa na mbana. Lo hunda na ala, lo tene: “Ngbanga ti nyen ala yeke doro commandement ti Nzapa ndali ti ngobo ti ala? Na tapande, Nzapa atene: ‘Mo ne babâ na mama ti mo’, nga, ‘Zo so azonga babâ wala mama ti lo, a lingbi a fâ lo.’ Me ti ala, ala tene: ‘Tongana mbeni zo atene na babâ wala mama ti lo: “Ye kue so mbi yeke na ni so mo lingbi fade ti bâ nzoni dä, mbi zia ni nde awe ti mû na matabisi na Nzapa,” lo yeke na bezoin ti ne babâ ti lo pëpe.’”—Matthieu 15:3-6; Exode 20:12; 21:17.

A-Farizien atene so, atâa a yeke nginza, kungba wala mbeni ye nde, tongana zo amû ni na Nzapa awe, a yeke ga ti temple na a yeke sara ni na mbeni kua nde ape. Me, ti tâ tënë ni, ye so zo ni amû so angbâ gi ti lo. Na tapande, mbeni molenge-koli apeut ti tene so nginza ti lo wala aye ti lo ayeke “corban”, so ti tene a ga mbeni matabisi so lo mû na Nzapa wala na temple, mo bâ mo tene a yeke fadeso ti temple ni. Me, nginza ni wala akungba ni angbâ kamême na tïtî lo. Ye oko, lo yeke tene so lo peut ti sara kua na ni ape ti aidé babâ na mama ti lo so aga kangba awe na so ayeke na bezoin ti ambeni ye. Sarango tongaso a yeke kpengo ti bango lege ti ala la.—Marc 7:11.

Jésus ayeke na raison ti tene bê ti lo ason, ti bâ tongana nyen la a ba yâ ti Ndia ti Nzapa tongaso. Ni la, lo tene: “Ala sara si tënë ti Nzapa ayeke na ngangu mbeni pëpe ndali ti ngobo ti ala. Ala azo ti handango lê ti zo, a yeke na lege ni si Ésaïe atene prophétie na ndo ti ala, lo tene: ‘Azo so agonda mbi gi na yanga ti ala, me bê ti ala ayeke yongoro na mbi. Ala yeke voro mbi gi senge senge, ndali ti so ala yeke fa gi andia so azo asigi na ni.’” A-Farizien ayeke na tënë ti tene na Jésus ape. Tongaso, Jésus atene na azo ti pusu nduru na tere ti lo. Lo tene: “Ala mä yâ ti tënë so mbi yeke tene so: A yeke pëpe ye so alï na yanga ti zo si ayeke sara si lo ga sioni, me ye so asigi na yanga ti lo la asara si lo ga sioni.”—Matthieu 15:6-11; Ésaïe 29:13.

Na pekoni, tongana ala yeke na yâ ti mbeni da, adisciple ahunda Jésus atene: “Eskê mo hinga so bê ti aFarizien ason na tere ti mo na mango tënë so mo tene so?” Jésus akiri tënë na ala, lo tene: “Keke kue so Babâ ti mbi so ayeke na yayu alu ni pëpe, a yeke gboto ni na gunda ni kue. Ala zia aFarizien so. Ala yeke awaziba so ayeke fa lege na zo. Tongana waziba afa lege na mba ti lo waziba, ala use kue ayeke tï na dû.”—Matthieu 15:12-14.

Peut-être li ti Jésus akpe kue tongana Pierre, na iri ti adisciple ni kue, ahunda na lo ti fa tâ ye so ayeke sara si zo aga sioni. Jésus akiri tënë na lo atene: “Ala hinga ape so ye kue so alï na yanga ti zo ague na yâ ti lo, na pekoni a sigi a gue na dû? Me aye so asigi na yanga ti zo alondo na bê, na a yeke aye so la asara si zo aga sioni. Na tapande, aye so alondo na bê ayeke sioni tënë, tënë ti fango zo, tënë ti gingo wali wala koli nde, tënë ti lango-sioni, tënë ti nzi, tënë ti témoin ti mvene nga na zonga. Aye so la asara si zo aga sioni. Me tongana zo asukula maboko ti lo pëpe si lo te kobe, a yeke sara si lo ga sioni pëpe.”—Matthieu 15:17-20.

Jésus ake pëpe ti tene azo aduti propre, wala ti tënë azo asukula maboko ti ala kozo ti tene ala tö kobe wala ala te kobe. Me lo fa sioni ti sarango ye ti amokonzi-nzapa ti aJuif so ayeke handa lê ti azo, na so ayeke ba yâ ti Ndia ti Nzapa so ayeke mbilimbili na ziango angobo ti sarango ye ti azo na place ni. Biani, ye so ayeke sara si zo aga sioni ayeke sioni sarango ye so alondo na yâ ti bê ti zo.