Bu bibadi Kidiibwa kya lukilo kya mu kipwa kya 32 B.B. akifubwila peepi, Yesu badi mwipaane na kulambukisha mu Ngalileya. Akupu, abimweneka shi bayile ku Yelusaleme bwa kukita Kidiibwa kya lukilo bu bibatekanga Mwiya w’Efile Mukulu. Yesu bebikitshine na budimu booso mwanda beena Yuuda abakimbanga bya kumwipaa. (Yowano 7:1) Kunyima kwa byabya, balukiile ku Ngalileya.

Pangi Yesu e mu Kapernaume nsaa ibadi Bafadisee na bafundji bafikye kwadi abakatukila ku Yelusaleme. Bwakinyi abayile kwadi? Abadi abakimbi kipaso kya kufunda Yesu shi taamukokyele miiya ya kipwilo. Abamwipwishe shi: “Bwakinyi balongi boobe abatupilwa ku byubishi bya bankambwa? Mwanda taabesuulaa meema ku maasa nguba aabadi bya kudya.” (Mateo 15:2) Kasha Efile Mukulu talungwile bafubi baye bwabadya kwikala na kipikwa kya ‘kwisuula meema ku maasa mpa na ku makongongo.’ (Maako 7:3) Kebubungi, Bafadisee abadi abamono kupela kukita byabya bu kilubilo kikata.

Pamutwe wa kwibaluula musango umune, Yesu bebalesheshe kipaso kyabakwete kwipaa Miiya y’Efile Mukulu mu kukumina kwabo. Badi mwibepushe shi: “Bwakinyi anutupilwa kw’eyi dy’Efile Mukulu mwishina dya byubishi byeenu? Mwan’Efile Mukulu bambile shi ‘Dinga nshoobe na nyinoobe,’ na dingi shi ‘Atshipi nshee sunga nyina, bamunyookye pa kumutshibila lufu.’ Anka, anwe namu anwamba shi ‘Ooso aamba nshaaye sunga nyinaaye shi: Bukwashi buboody’a kupeta kwandji neemwibutuushe buu mulambu wiselele, yawa te na kya kudinga nshaaye.’”—Mateo 15:3-6; Efilu 20:12; 21:17.

Bafadisee abamonanga shi makuta, kintu kya muntu sunga kingi kintu kyoso kyabadi balambule bu mulambu kwi Efile Mukulu nkya mu ntempelo na tambalombene kwikifubisha bwa ungi mwanda nya. Aku namu kintu kyabatusha kwi muntu akishalaa kyaye. Bu kileshesho, mwana e kwakula shi atuulu makuta sunga kintu kyaye bu “kolobane,” kwamba shi mulambu w’Efile Mukulu sunga wa ntempelo, bu shi abitungu mulambu waye ubande kwenda ku ntempelo. Makuta sunga kintu akishala kya mwana na tamulombene kwibitumikisha bwa kukwasha baledi baye abapu kukula sunga be mu lukalo nya. Bu bibakitshi byabya, basuuku bushito bwaye bwa kwibakwasha.—Maako 7:11.

Yesu badi mwinyongole pabitale byababadi abalula Miiya y’Efile Mukulu na kwakula shi: “Nubayipaa eyi dy’Efile Mukulu mwishina dya byuubishi byenu. Bansesa’yi! Yeeshaya badi mutemukye kalolo pamwanda wenu, pabadi mwambe shi: ‘Bano bantu abannemeka kukanwa, anka mashimba aabo ee kula naami. Kundangwila kwabo nkwa-bisumanga mwanda bulambukishi bwabalambukisha mbutukile ku mayi a bantu.’” Bafadisee tababadi baluule ku bibadi Yesu mwibatopekye nya. Akupu Yesu bayitanyine bibumbu bya bantu bwa shi befubwile kwadi. Aye nkwibalungula shi: “Temeshayi, bwa’shi nushinguule! Ta nkino akitwele mukanwa mwa muntu akimulwisha, anka akituuku mukanwa nyi akilwisha muntu.”—Mateo 15:6-11; Yeeshaya 29:13.

Kunyima pababadi mu nshibo, balongi abepwishe Yesu shi: “Ouku shi, pa kupusha byabya bishima, Bafadisee abadi beenyongole ngofu?” Yesu badi mwibaluule shi: “Kikunwanga kyoso kyabashii bakune kwi Nshaami a mwiyilu, abekitukula. Ebalekyeeyi, mbapofu abakunkusha bampofu! Su mpofu akunkusha mpofu, booso babidi abapono mu bwina!”—Mateo 15:12-14.

Yesu amweneka bu bakaanya pabadi Mpyeele mumwipushe bwa kuuka kalolo pabitale akilwisha muntu. Yesu bamwalulwile shi: “Taanuuku shi kyoso akitwele munda akyalaala munda akupu kisumbulwe mu bwina su? Anka akituku mu kanwa nyi akifiki mwishimba, na kyakya nyi akilwisha muntu. Mwanda, mwishimba amutukaa binangu bibubi, kwipayisheena, kutambuka  lusandji, bukitekite, bungifi, kudimbiila bantu myanda, kukayisheena. Kyakya ngi akilwisha muntu, anka, kudya kushii kwisuula maasa takulwisha muntu.”—Mateo 15:17-20.

Pano Yesu taatunu kwikala na bukalanga nya, na t’akula bwashi muntu teesulanga meema ku maasa kumpala kwa kuteeka bidiibwa sunga kudya nya. Anka, kwete kutopeka bakunkushi ba bipwilo bansesa abadi abepengyela miiya ya kululama y’Efile Mukulu pa kwalusha bipikwa bya bantu. Dilongyesha dibadi shi, bikitshino bibubi abikatukila mwishimba nyi abilwisha muntu.