Yesu wapharazganga ku Galileya pa nyengu yo phwandu la Pasika wa mu 32 C.E., lenga pafupi kuchitika. Chifukwa chakuti Yesu walondonga Marangu ngaku Chiuta, wanguluta ku Yerusalemu kuti wakachiteku nawu phwandu lenili. Kweni pa ulendu uwu, Yesu wanguchita vinthu mwakuphwere ukongwa chifukwa Ayuda akhumbanga kumubaya. (Yohane 7:1) Phwandu ili lati lamala, iyu wanguwere so ku Galileya.

Yesu watenere kuti wenga ku Kaperenao pa nyengu yo alembi ndi Afarisi wo angutuliya ku Yerusalemu, anguza kwaku iyu. Ntchifukwa wuli anguza kwaku iyu? Yiwu akhumbanga kumusaniliya vifukwa Yesu kuti watimbanyizga visopa. Mwaviyo, angumufumba kuti: “Ntchifukwa wuli akusambira ŵinu alondo cha midawuku ya apapi ŵidu akali? Mwakuyeruzgiyapu, asamba cha mumanja asani akhumba kurya.” (Mateyu 15:2) Chiuta wakuŵakambiyapu cha ŵanthu ŵaki kuti asungengi dangu la ‘kusamba mumanja mpaka mukasukusuku.’ (Mariko 7:3) Kweni Afarisi awonanga kuti ndi mulandu ukulu asani munthu waleka kusamba mumanja mpaka mukasukusuku.

M’malu mwakumuka mulandu wo alembi ndi Afarisi amumbanga, Yesu wanguŵakonkhoske mo yiwu aswiyanga Marangu ngaku Chiuta. Iyu wanguŵafumba kuti: “Ntchifukwa wuli midawuku yinu yitikuchitiskani kuti muleki kulondo marangu ngaku Chiuta? Mwakuyeruzgiyapu, Chiuta wakukamba kuti, ‘Tumbika awusu ndi anyoku,’ ndipuso kuti, ‘Weyosi yo watondowo awisi pamwenga anyina wabayiki.’ Kweni yimwi mukamba kuti, ‘Weyosi yo wakambiya awisi pamwenga anyina kuti: “Chechosi cho ndatingi ndikupaskeningi kuti chikuwovyeni, ndi mphasu yakuperekeka kwaku Chiuta,” wakhumbika cha kutumbika awisi chinanga nkhamanavi.’”—Mateyu 15:3-6; Chituwa 20:12; 21:17.

Afarisi akambanga kuti ndalama, katundu pamwenga chinthu chechosi cho munthu wapereka nge mphasu kwaku Chiuta, chakhumbikanga kugwiriskikiya ntchitu kunyumba yakusopiyamu ndipu azomerezanga cha kuti chigwirisikiyi ntchitu pa vinthu vinyaki. Kweni uneneska ngwakuti munthu walutirizganga mbwenu kusunga vinthu vo wakhumbanga kupereka nge mphasu. Mwakuyeruzgiyapu, mwana munthulumi wakambanga kuti ndalama pamwenga katundu waki ndi “khobani,” kung’anamuwa kuti, ndi mphasu yakuperekeka kwaku Chiuta pamwenga kunyumba yakusopiyamu, ndipu venga nge kuti vinthu vo waperekeka kali kunyumba yakusopiyamu. Mwana mwenuyu wenga wechekugwiriskiya ntchitu ndalama pamwenga katundu waki kweni wakananga kugwiriskiya ntchitu vinthu venivi, kuti wawovyi apapi ŵaki akukota wo asuzgikanga. Venivi vilongo kuti iyu wakananga udindu wo wenga nawu wakuphwere apapi ŵaki.—Mariko 7:11.

Yesu wangukwiya ukongwa ndi midawuku yeniyi chifukwa yalongonga kuti ŵanthu aphwanya Marangu ngaku Chiuta. Iyu wangukamba kuti: “Mupepuwa mazu ngaku Chiuta chifukwa cha midawuku yinu. Akunyenga yimwi, Yesaya waneneskanga po wangukambiya limu vaku yimwi kuti: ‘Ŵanthu yaŵa atinditumbika ndi milomu yawu, kweni mitima yawu ye kutali ndi ini. Alutirizga kundisopa kweni palivi cho achitapu, chifukwa asambiza visambizu va ŵanthu nge kuti vaku Chiuta.’” Afarisi angusoŵa chakukamba Yesu wati waŵasuska mwambula kubisa. Mwaviyo, Yesu wangudana chigulu cha ŵanthu kuti chizi kufupi ndi iyu ndipu wangukamba kuti: “Cho chisere mumulomu mwa munthu chitimufipiska cha, kweni cho chituwa mumulomu mwaki ndichu chitimufipiska.”—Mateyu 15:6-11; Yesaya 29:13.

Pavuli paki ŵati afika kunyumba, akusambira angufumba Yesu kuti: “Kumbi mwaziŵa kuti Afarisi aguŵa ŵati avwa vo mwakamba?” Yesu wangumuka kuti: “Chimiti chechosi cho chikuleka kupandika ndi Ada akuchanya, chichesulikengi. Alekeni ŵaka, mbalongozgi achibulumutiya. Asani wachibulumutiya walongozga wachibulumutiya munyaki, wosi ŵaŵi atuwa muzenji.”—Mateyu 15:12-14.

Yesu watenere kuti wanguzizwa wati wavwa Peturo wachifumba m’malu mwa akutumika anyaki kuti iyu waŵakonkhoske chinthu cho chifipiska munthu. Yesu wangukamba kuti: “Kumbi muziŵa cha kuti chechosi cho chisere mumulomu chiporota mumoyu ndipu chitayika muchimbuzi? Kweni vinthu vosi vo vituwa mumulomu vituliya mumtima, ndipu venivi ndivu vifipiska munthu. Mwakuyeruzgiyapu, mumtima ndimu mutuliya  maŵanaŵanu ngaheni, kubayana, chigololu, malusu ngaheni ngakugonana, unkhungu, ukaboni waboza ndipuso kunyoza Chiuta. Vinthu venivi ndivu vifipiska munthu, kweni kurya kwambula kusamba mumanja, kufipiska munthu cha.”—Mateyu 15:17-20.

Yesu wang’anamuwanga kuti ŵanthu alekengi kuja achanda cha, kweniso waŵachiskanga kuti alekengi kusamba mumanja cha asani abika pamwenga asani akhumba kurya chakurya. M’malu mwaki, wasuskanga alongozgi akunyenga amatchalitchi wo achiskanga midawuku ya ŵanthu m’malu mwakugwiriskiya ntchitu marangu nga urunji ngaku Chiuta. Ndipu fundu ya uneneska njakuti, vinthu viheni vo vituliya mumtima wa munthu ndivu vitimufipiska.