I te taimi ko pili atu ei ki te Paseka i te 32 T.A., ne fakalavelave malosi a Iesu i te akoako atu i Kalilaia. Kāti ne fanatu eiloa a Iesu ki Ielusalema mō te Paseka, e pelā mo te mea e fakatonu mai i te Tulafono a te Atua. Kae ne fakaeteete a Iesu me ko taumafai a te kau Iutaia o tamate a ia. (Ioane 7:1) Mai tua ifo i konā, ne toe foki atu ei a ia ki Kalilaia.

Kāti ne nofo atu a Iesu i Kapanaumi i te taimi ne olo atu ei a Falesaio mo failautusi mai Ielusalema ki a ia. Kaia ne fai ei ne latou a te malaga tenei? Ne sala‵sala aka ne latou a pogai ke ‵losi atu ei ki a Iesu e uiga ki te solitulafono ki mea faka-te-lotu. Ne fesili atu latou: “Kaia e fakaseaoga ei ne ou soko a tuu a tino i aso mua? E pelā mo te mea tenei, e se ‵fulu olotou lima a koi tuai o ‵kai latou?” (Mataio 15:2) Ne seki fai atu te Atua ki ana tino ke fai ne latou te faifaiga tenei o te ‘‵fuluga olotou lima ke oko ki tulilima.’ (Maleko 7:3) Kae ne ma‵natu aka te kau Falesaio me se agasala matagā ke se fai te tuu masani tenā.

I lō te tali tonu atu ki te lotou ‵losiga tenā, ne fakasino atu a Iesu ki te lotou ‵teke atu mo te mata‵fatu ki te Tulafono a te Atua. “Kaia e fakaseaoga ei ne koutou a fakatonuga a te Atua ona ko otou tuu?” ko tena fesili ki a latou. “E pelā mo muna konei a te Atua, ‘Āva ki tou tamana mo tou mātua’; kae ko ‘Te tino telā e taku fakamasei ne ia tena tamana io me ko tena mātua e ‵tau o tamate.’ Kae e fai mai koutou, ‘So se tino e fai atu ki tena tamana io me ko tena mātua penei: “So se mea a aku telā e mafai o aoga ki a koulua, ko taku meaalofa tenā ki te Atua,” ko se ‵tau eiloa o āva a te tino tenā ki tena tamana.’”—Mataio 15:3-6; Esoto 20:12; 21:17.

Ne fai mai te kau Falesaio me i tupe, kope, io me ko so se isi mea aka telā e taku pelā me se meaalofa ki te Atua, ne mea mō te faletapu, telā e se mafai o fakaaoga a mea konā ki so se isi mea aka. Kae ko te ‵tonuga loa, koi pule eiloa te tino i te meaalofa telā ne ofo atu ne ia. E pelā mo te mafai ne se tamaliki tagata o fai atu me e “kopani” ana tupe io me ko ana kope, se meaalofa ki te Atua io me ko te faletapu, e pelā me ko pule atu te faletapu i te meaalofa. Koi pule eiloa te tamaliki i tupe io me ko kope, kae fai mai tou tagata me e se mafai o fakaaoga ne ia ke fesoasoani atu ki ana mātua kolā ko ma‵tua, kae kāti ko fakaa‵lofa ‵ki foki. Ko fakaseke eiloa a ia mo tena tiute ki a lāua.—Maleko 7:11.

Se mea ‵tau eiloa ke ita a Iesu ki te kau Falesaio ona ko te ‵fuli fakakōtua ne latou o te Tulafono a te Atua kae fai atu: “Ko fakaseaoga ne koutou a te muna a te Atua ona ko otou tuu. Koutou ne tino ‵loi, ne fakasino tonu eiloa ki a koutou a te valoaga a Isaia i ana pati konei: ‘A tino konei e āva mai fua ki a au i olotou gutu, a ko olotou loto e ‵mao ‵ki mai i a au. E seai se aoga e tapuaki mai ei latou ki a au, me e fakavae olotou akoakoga ki akoakoga a tāgata.’” Ne seki mafai o tali atu a te kau Falesaio ki taku fakamaseiga a Iesu. Tela la, ne kalaga atu a ia ki te vaitino ke fakapili‵pili atu ki a ia. “Faka‵logo mai kae taumafai ke malamalama koutou i te uiga o te mea tenei,” ko ana muna. “E se ko te mea telā e ulu ki te gutu e fakalailai ne ia se tino, ka ko te mea telā e vau mai te gutu e fakalailai ne ia te tino.”—Mataio 15:6-11; Isaia 29:13.

Fakamuli loa, i te taimi ne ‵nofo atu ei i loto i te fale, ne fesili atu a soko ki a Iesu: “E iloa ne koe me ne kaitaua ‵ki a Falesaio i te lagonaga ne latou au pati konā?” Ne tali atu a ia: “A lakau katoa kolā e seki ‵toki ne toku Tamana telā i te lagi ka unu keatea. Tuku ei latou penā. A latou ne takitaki ‵kivi. Tela la, kafai e takitaki ne se tino ‵kivi a te suā tino ‵kivi, ka ‵to tokolua lāua ki loto i te lua.”—Mataio 15:12-14.

Kāti ne ofo a Iesu i te taimi ne fai ei a Petelu mo fai te sui o te kau soko mai te fesili atu ke maua a nisi fakamatalaga e uiga ki mea kolā e fakalailai ei te tino. Muna a Iesu: “E se iloa ne koutou me i mea katoa kolā e ulu ki te gutu, e olo i loto i te tinae, ko olo ei ki tua? Kae ko so se mea telā e vau ki tua mai te gutu e vau ‵tonu eiloa mai te loto; konā la a mea e fakalailai ne latou te tino. E pelā mo te mea tenei, e māfua mai i te loto a mea ma‵sei katoa, ko te tatino, te mulilua, amioga fakatauavaga sē ‵tau, te kaisoa, te molimau ‵pelo mo pati ma‵sei. Konei la a mea e  fakalailai ne latou se tino, kae ko te kai e aunoa mo te ‵fulu o lima e seai se tino e lailai i ei.”—Mataio 15:17-20.

Ne seki ‵teke atu a Iesu ki te ‵tu ‵mā masani io me kinau atu me e se ‵tau o ‵fulu muamua a lima o se tino, a koi tuai o fakatoka ne ia a mea‵kai io me e kai ki ei. I lō te fai penā, ne taku fakamasei ne ia a uiga ‵loi o takitaki lotu kolā ne taumafai o fakaseke‵seke ki tulafono amio‵tonu a te Atua mai te fakasino atu ki tuu a tāgata. A te ‵tonuga loa, ko amioga ma‵sei kolā e māfua mai i te loto, ko mea kolā e fakalailai ei te tino.