Samtang nagtitikahirani an Paskua han 32 C.E., hi Jesus okupado ha pagtinutdo didto ha Galilea. Katapos, posible nga kumadto hiya ha Jerusalem para ha Paskua, sugad han iginsusugo ha Balaud han Dios. Pero, nag-ikmat gud hi Jesus kay gin-iikaparatay hiya han mga Judio. (Juan 7:1) Katapos, bumalik hiya ha Galilea.

Posible nga nakadto hi Jesus ha Capernaum han dinaop ha iya an mga eskriba ngan Pariseo nga tikang ha Jerusalem. Kay ano nga kumadto hira? Namimiling hira hin basihan basi akusaran hi Jesus hin pagtalapas ha relihiyon. Hira nagpakiana: “Kay ano nga diri ginsusunod han imo mga disipulo an tradisyon han mga tawo ha kadaan nga panahon? Pananglitan, diri hira nanhuhunaw antes kumaon.” (Mateo 15:2) An Dios waray gud magsiring ha iya katawohan nga tumanon ini nga rituwal nga ‘paghunaw tubtob ha siko.’ (Marcos 7:3) Pero para ha mga Pariseo, seryoso nga sala an diri pagbuhat hini.

Imbes nga direkta nga batunon an ira akusasyon, gin-unabi ni Jesus kon paonan-o nira tinuyo nga gintatalapas an Balaud han Dios. Hiya nagpakiana ha ira: “Kay ano nga diri liwat niyo ginsusunod an sugo han Dios tungod han iyo tradisyon? Pananglitan, an Dios nagsiring, ‘Pasidunggi an imo tatay ngan an imo nanay,’ ngan ‘An nagyayakan hin maraot ha iya tatay o nanay, papatayon.’ Pero nasiring kamo, ‘An bisan hin-o nga nasiring ha iya tatay o nanay: “Bisan ano nga gintatag-iya ko nga posible mapahimulsan mo iginhalad ko na ha Dios sugad nga regalo,” diri na niya kinahanglan pasidunggan an iya tatay.’”—Mateo 15:3-6; Eksodo 20:12; 21:17.

An mga Pariseo nasiring nga an kwarta, propyedad, o an bisan ano nga iginhalad sugad nga regalo ha Dios para na ha templo, salit diri ito puydi gamiton para ha iba nga katuyoan. Pero an tinuod, aada pa gihapon ha tawo an iginhalad nga regalo. Pananglitan, an usa nga anak bangin sumiring nga an iya kwarta o propyedad usa nga “corban,” regalo nga iginhalad ha Dios o ha templo, nga sugad hin an templo na an nagtatag-iya hito nga regalo. Bisan kon mahimo pa gihapon magamit han anak an kwarta o propyedad, nasiring hiya nga diri ito puydi gamiton ha pagbulig ha iya lagas na ngan nanginginahanglan nga mga kag-anak. Hito nga paagi, iya la ginlilikyan an iya responsabilidad ha ira.—Marcos 7:11.

Husto la nga masina hi Jesus tungod han ira pagbaliko ha Balaud han Dios, hiya nagsiring: “Ginbalewaray niyo an pulong han Dios tungod han iyo tradisyon. Mga hipokrito, husto gud an igintagna ni Isaias mahitungod ha iyo han hiya nagsiring: ‘Ini nga mga tawo nagpapasidungog ha akon pinaagi han ira mga im-im, pero an ira kasingkasing hirayo gud ha akon. Waray pulos an ira padayon nga pagsingba ha akon, kay ira igintututdo an mga sugo han mga tawo sugad nga mga doktrina.’” Waray bumaton an mga Pariseo ha marig-on nga pagsaway ni Jesus. Salit iya ginpahirani an mga tawo. Hiya nagsiring: “Pamati ngan sabota niyo an kahulogan hini: An nakakahugaw han tawo diri an nasulod ha iya baba, kondi an nagawas tikang hito.”—Mateo 15:6-11; Isaias 29:13.

Han nakadto na hira ha usa nga balay, an mga disipulo nagpakiana kan Jesus: “Maaram ka ba nga nasina an mga Pariseo ha imo ginsiring?” Hiya binaton: “An tagsa nga tanom nga waray igtanom han akon langitnon nga Amay, gagabuton. Pabay-i hira. Mga buta hira nga paratugway. Kon buta an nagtutugway ha igkasi-buta, hira nga duha mahuhulog ha buho.”—Mateo 15:12-14.

Basi magin matin-aw ha mga disipulo kon ano an nakakahugaw ha tawo, hi Pedro nagpakiana mahitungod hito. Baga hin nahipausa hito hi Jesus, salit hiya binaton: “Diri ba kamo maaram nga an ngatanan nga nasulod ha baba naagi ha tiyan ngan nagawas ha lawas? Pero an nagawas ha baba nagtitikang ha kasingkasing, ngan ito an nakakahugaw ha tawo. Pananglitan, nagtitikang ha kasingkasing an maraot nga pangatadongan, pagpatay, pag-adulteryo, imoralidad, pangawat, pagtestigo hin buwa, ngan pagpasipara. Ini nga mga buhat an nakakahugaw ha tawo, pero an diri paghunaw antes kumaon diri nakakahugaw ha iya.”—Mateo 15:17-20.

Waray igdiri ni Jesus an normal nga paglimpyo, waray man liwat hiya magsiring nga sayop an paghunaw antes mag-andam hin pagkaon o kumaon. Lugod, iya ginkondenar an hipokrito nga mga lider han relihiyon nga nangangalimbasog pagbalewaray han matadong nga mga balaud han Dios pinaagi ha pagsunod han mga tradisyon han tawo. Ha tinuod, an magraot nga buhat nga nagtitikang ha kasingkasing amo an nakakahugaw ha tawo.