Fariseonakar juchañchasajja, Jesusajj discipulonakapampiw Feniciankir Tiro, Sidón uksa toqenakar sarjjäna. Ukajja alay toqeru walja kilometronak sarañankänwa.

Jesusajj mä utanwa alojasïna, kawkinkänsa uk yatipjjañap janiw munkänti. Ukampis jaqenakajj jankʼakiw kawkinkänsa uk yatipjjäna. Uksa toqen nasiri mä griega warmiw Jesusan ukar jutäna, akham sasaw ruwtʼasirakïna: “Tata, Davidan Yoqapa, nayat khuyaptʼayasita. Demonion mantataw phuchajajj wal tʼaqesiski” sasa (Mateo 15:22; Marcos 7:26).

Qhepatjja discipulonakapajj Jesusarojj akham sapjjänwa: “Uka warmir khitanukjjam. Arnaqasis jutaskakiwa” sasa. Jesusasti kunatsa mayitapar jan istʼkäna ukjja akham sasaw uka warmir qhanañchäna: “Chhaqat ovejanakar uñtasitäpki uka Israel markarukiw Diosajj khitanitu” sasa. Uka warmejj Jesusar ruwtʼasiskakïnwa, jupan ukar jutasajj nayraqatapanwa akham sas altʼasirakïna: “¡Tatay, yanaptʼasikitaya!” sasa (Mateo 15:23-25).

Jesusajj kunjamsa judionakajj yaqha markankirinakar uñjäna uka toqetwa uka warmir parläna, inas taqe chuymati Diosar confiyi janicha uk yatiñatak ukham parlchïna. Jesusajj sänwa: “Wawanakat tʼantʼa aparasin anoqallunakar churañajj janiw walïkiti” sasa (Mateo 15:26). ‘Anoqallunakat’ parlkasajja, Jesusajj jan judiöpki uka jaqenakarojj kunja munasiñampis uñji ukwa uñachtʼayaskäna. Ukajja arunakapana ajanupanwa qhan amuyaspachäna.

Uka warmejj chuyma ustʼayasiñat sipansa, kuntï Jesusajj siskäna ukarjamaw humilde chuymampi sarakïna: “Niyas ukhamaw Tata. Ukampis anoqallunakajj jaqepan mesapat jalaqtir puchunakwa manqʼasipjje” sasa. Suma chuymanïtap uñjasajja Jesusajj sänwa: “Jumajj taqe chuymaw Diosar confiytajja, ukhamajj kuntï munkta ukajj phoqaspan” sasa (Mateo 15:27, 28). Uka warmin phuchapajj cheqapuniw qollasïna. Janis phuchapajj ukankchïnjja, uka warmejj utapar purjjäna ukhajja, phuchapajj walikiw ikiñankaskäna, ‘demoniosti mistjjarakïnwa’ (Marcos 7:30).

Jesusampi discipulonakapampejja, Fenicia toqetjja Jordán Jawir toqeruw sarapjjäna. Amuyatajja Galilea Qotat alay toqnamwa Jordán Jawir pasapjjäna, ukatjja Decápolis uksaruw puripjjäna. Ukanjja mä qolluruw makatapjjäna, jaqenakajj Jesusar uñjapjjäna ukhajja, cojonakaru, suchunakaru juykhunakaru, amutunakaruw jupan nayraqatapar apanipjjäna. Jesusasti taqe jupanakaruw qolläna, jaqenakajj uk uñjasajj wal musparapjjäna, Israelan Diosaparuw jachʼañchapjjarakïna.

Jesusajj mä oqara ukhamarak amutu jaqeruw qolläna. Uka jaqejj walja jaqenak utjipanjja wal ajjsarayaspachäna. Ukatwa Jesusajj yaqha cheqar irpäna, ukanwa kunsa lurani uk sapapar qhanañchäna. Ukatsti lukʼanapampiw jiñchut loqantäna, thusjjattʼasisajja lajjrapatwa llamktʼarakïna. Ukatsti alajjpach uñtasajj sarakïnwa: “Éffatha” sasa, ukajja “jistʼartam” sañ muni. Uka qhepatjja uka jaqejj sum istʼjjäna, sumwa parljjarakïna. Jesusasti janiw uk yatisiñap munkänti, jan ukasti jaqenak pachpa jupar uñjasina istʼasina creyipjjaspa ukwa munäna (Marcos 7:32-36).

Jesusajj usutanakar qollañatakejj kunja chʼamanisa uk uñjasajja, jaqenakajj “walpun musparapjjäna”. Sapjjarakïnwa: “Jupajj taqe kuns wali sum luri, oqaranakarus istʼayiwa, amutunakarus parlayarakiwa” sasa (Marcos 7:37).