PES 57
Yésu a mbuubaha hingonda ni mut ndok
-
YÉSU A MBUUBAHA NGOND I MUDA FÉNIKIA
-
A MBUUBAHA MUT NU A YÉ NDOK NI MBUK
I mbus le a nkônd Farisai mu kiki i ngwélél mambén map inyu gwéñe gwap, Yésu a nke ni banigil bé. A nke i Fénikia libôga li Tir ni li Sidôn, ngandak kilôméta i ñombok.
Yésu a nléba ndap inyu yén ndi, a nsômbôl bé le bôt ba yi le a yé ha. To hala, a nla bé solop. Muda Lôk Grikia wada a ntehe Yésu, a mbôdôl soohe nye le: “Kônôl me ngoo, a Nwet, a Man David. Ngond yem i nok njôghe iloo héga inyule mbuu mbe u ntééñga nye ngandak.”—Matéô 15:22; Markô 7:26.
I mbus ndék ngéda, banigil ba Yésu ba nkal nye le: “Kal nye le a kenek, inyule a nwaa bé lond i mbus yés.” Yésu a ntoñle banigil bé inyuki a mboñ wengoñle a ñemble bé nye: “Ba ñom bé me inyu hôla matén momasôna, ndigi minimlak mi mintômba mi ndap Israel.” Muda a ntomb bé, a nkôôge Yésu ipañ, a kwoo nye makôô, a soohege le: “A Nwet, hôla me!”—Matéô 15:23-25.
Bebek inyu noode hémle i muda nu, Yésu a mpôdôl ngi manôgla i yé ipôla Lôk Yuda ni bet ba ta bé Lôk Yuda: “I ta bé loñge i yoñ bret bi boñge inyu leñ gwo bon ba ngwo.” (Matéô 15:26) Ngéda a nsima “bon ba ngwo,” Yésu a ñunda gwéha a gwé inyu bet ba ta bé Lôk Yuda. Su wé ni kiñ yé bi ñunda ki hala.
Iloole a unup, muda a ngwélél hihéga hi inyu yigye ni suhulnyuu le: “Ndi yak bon ba ngwo ba nje yaa minluñ mi nkwo isi téblé i bet bap.” Yésu a ntehe loñge yé ñem, a nkal le: “Éé, a muda, hémle yoñ i yé keñi; i bôña we kiki u nsômbôl.” (Matéô 15:27, 28) Hala nyen i mbôña, to ibale ngond i muda nu i ta bé ha! Ngéda muda a ntémb i ndap, a nkoba le ngond yé i niñi i nañ i ma mbôôp—“mbuu mbe u ma ke”!—Markô 7:30.
Yésu ni banigil bé ba nyodi libôga li Fénikia, ba nlela tison inyu ke i ño Lom Yordan. Ba nlel tuye Galiléa i ño mbok, i mbus ba njôp i Dékapôli, ba mbet hikôa ndi limut li nkoba bo. Ba nlona nye bôt ba ndim ni bôt ba mbuk, ba niñ bakokon ba makôô mé, Yésu a mbuubaha bo. Nhelek, bôt ba nti Djob li Israel lipém.
Yésu a nyoñ ngéda téntén inyu mut wada nu a yé ndim a bak ki ndok. Yimbe jam mut nu a nla nôgda mu ipôla limut. Bebek Yésu a nyimbe le a ta bé nwee, jon a nkena nye ipañ. I ngéda ba yé botama, Yésu a toñle nye i jam a nke i boñ. A nha dinoo tjé maôô ma mut, i mbus a tjo matai, a tihba hilémb hi mut nu. A béñge ngii, a kal le: “Yibla.” Bitéé bilôñi, mut a mbôdôl nok, a nla yak pot. Yésu a gwé bé ngôñ le bôt ba hémle nye inyule ba nok miñañ, ndi a nsômbôl le bôt ba hémle inyu mam ba ntehe ba nok ki.—Markô 7:32-36.
Mu kiki ba nyimbe le Yésu a gwé hélha ngui, “ba hel iloo héga.” Ba kal le: “Mam mé momasôna ma yé hélha. A mboñ ki le bôt ba ndok ba noga, yak mbuk bôt i pot.”—Markô 7:37.