Dung dipasingot Jesus halak Parise alani adat ni nasida, borhat ma Jesus dohot angka siseanna tu sabola barat. Nasida borhat tu kota Tirus dohot Sidon na di Penisia.

Jumpang ni Jesus ma sada jabu gabe ingananna disi. Nang pe ndang lomo roha ni Jesus botoon ni halak ibana disi, alai sai jumpang ni halak do ibana. Ro ma sahalak boru Junani na di huta i mandapothon Jesus. Ninna ma, “Asi ma roham di ahu ale Tuan, Anak ni si Daud. Mansai hansit do dihilala borungku ala disonggopi suru-suruan na jahat ibana.”​—Mateus 15:22; Markus 7:26.

Alai didok angka siseanna i ma tu Jesus, “Palao ma ibana, ai sai jou-jou do ibana di pudinta.” Boasa ndang dioloi Jesus borua i? Jesus mandok, “Holan tu halak Israel na songon biru-biru na lilu i do ahu disuru.” Alai ndang olo laho borua i. Marsinggang ma ibana tu pat ni Jesus jala ninna ma, “Urupi ma ahu Tuan!”​—Mateus 15:23-25.

Ra, naeng idaon ni Jesus do sadia balga haporseaon ni borua i. Tingki i, lea do roha ni halak Jahudi mangida halak na sian bangso na asing. Alani i, didok Jesus ma, “Ndang patut buaton roti ni dakdanak jala sampathonon tu anak ni biang.” (Mateus 15:26) Dipangke Jesus do hata “anak ni biang” laho patuduhon na asi do rohana mangida halak na sian bangso na asing. Tontu dipatuduhon Jesus do pangkilalaanna i sian bohi dohot soarana na lambok.

Ndang hansit roha ni borua i mambege hata ni Jesus. Didok ibana do tu Jesus, “Toho do i Tuan, alai roti na madabu sian meja ni tuanna i do diallang anak ni biang i.” Gabe diboto Jesus ma na balga do haporseaonna. Didok Jesus ma, “Balga do haporseaonmu, saut ma na pinangidomi.” (Mateus 15:27, 28) Dipamalum Jesus ma boruna i nang pe ndang diboan ibana tusi. Tingki mulak boru Junani i tu jabuna, diida ibana ma boruna i peak di podoman, nunga malum, jala “nunga kaluar suru-suruan na jahat i” sian ibana.​—Markus 7:30.

Borhat ma Jesus rap dohot angka siseanna sian Penisia tu huta na di sabola Sunge Jordan. Ra menyeberang do nasida sian sabola utara ni Laut Galilea jala sian i borhat ma nasida tu Dekapolis. Dung sahat disi, nangkok ma nasida tu dolok. Alai godang do halak na mamboto i. Diboan nasida ma tu Jesus angka na lumpu, na cacat, na mapitung jala na bisu manang na ngungu. Dipeakkon nasida ma angka na marsahit i jonok tu pat ni Jesus jala dipamalum ibana ma nasida sude. Alani i, dipuji nasida ma Jahowa Debata ni halak Israel.

Sai diparrohahon Jesus ma sahalak baoa na nengel jala na bisu. Ra, maila do ibana tingki di tonga-tonga ni godang halak i. Jala diboto Jesus do i. Boi ma tabayangkon pangkilalaanna tingki ditogihon Jesus ibana laho pulik sian angka jolma i. Dung holan nasida na dua, dipamasuk Jesus ma jari-jarina tu pinggol ni baoa i. Marsitijur ma Jesus jala dijama ma dilana. Huhut diida Jesus tu langit, ninna ma, “Hepata,” lapatanna, “Bungka ma.” Satongkin i, boi ma baoa i marbinege jala denggan ma ibana mangkatai. Diorai Jesus do ibana paboa-boahon tu jolma. Lomo do rohana asa porsea angka jolma tu na niida ni nasida dohot tu na binege ni nasida sian Jesus.​—Markus 7:32-36.

“Longang” do roha ni angka jolma i alani tanda halongangan na binahen ni Jesus. Didok nasida ma, “Denggan do dibahen ibana saluhutna. Haru na nengel boi marbinege jala na ngungu [manang, bisu] boi mangkatai dibahen ibana.”​—Markus 7:37.