Zezi seli Farizifuɛ’m be kɛ mmla kaka nga be kpɛli be’n, be fa yo be bɔbɔ be klun sa. I sin’n, ɔ nin i sɔnnzɔnfuɛ’m be ɔli Tir nin Sidɔn mɔ be o Fenisi mɛn’n nun lɔ’n su. Lika sɔ’m be o wia atɔliɛ bue liɛ’n su lɔ. Be o mmuammua kpa.

Be sikeli i sua kun nun. Yɛ ɔ kunndɛman kɛ sran’m be si kɛ ɔ o lɛ. Sanngɛ kan kwlaa nga Zezi o’n, sran’m be si sɔ. Ɔ maan Glɛki bla kun mɔ be wuli i Fenisi lɛ’n, ɔ wa toli i naan w’a srɛ i kpa. Ɔ seli i kɛ: “Nannan, Davidi Wa, si min aunnvuɛ. Min wa bla’n su wun ɲrɛnnɛn kpa afin mmusu kun w’a saci i.”​—Matie 15:22; Marki 7:26.

Kɛ ɔ cɛli kan’n, Zezi i sɔnnzɔnfuɛ’m be srɛli i kpa. Be seli kɛ: “Se i kɛ ɔ wɔ, afin ɔ te kpan te su e su.” Zezi kannin like nga ti yɛ ɔ nin-a tɛman bla’n su’n, i ndɛ. Ɔ seli kɛ: “B’a sunmanman min sran kwlaa sin. Izraɛli osu’n nun bua mɔ b’a mlin’n, be ngunmin be sin yɛ be sunmannin min-ɔn.” Sanngɛ bla’n w’a yaciman Zezi srɛlɛ. I kpa bɔbɔ’n, ɔ wunngeli Zezi wun lɛ, ɔ kotoli i bo naan w’a srɛ i kɛ: “Nannan, yo min ye!”​—Matie 15:23-25.

Zezi boli sa nga ti yɛ Zuifu’m be buman nvle uflɛ nunfuɛ’m be sran’n, i su. Atrɛkpa’n, ɔ yoli sɔ naan ɔ́ nían sɛ bla’n lafi Ɲanmiɛn su sakpa-o. Ɔ maan ɔ seli kɛ: “Ɔ timan su kɛ be fa ba kanngan’m be kpanwun’n be yi i alua ba’m be bo.” (Matie 15:26) Be nga be timan Zuifu’n yɛ Zezi flɛli be ‘alua ba mun-ɔn.’ I sɔ’n kle kɛ ɔ klo be naan be ndɛ lo i. Kɛ ɔ́ kán ndɛ sɔ’n, wafa ng’ɔ yoli i ɲrun’n ɔ nin i nɛn m’ɔ kɛnnin i ase ijɔli wɛtɛɛ su’n, be kle sɔ weiin wie.

Ndɛ nga Zezi kannin’n w’a loman bla’n i ngasi. I kpa bɔbɔ’n, ɔ tɛli Zezi su wɛtɛɛ su. Ɔ jrannin ndɛ sɔ’n su seli i kɛ: “Nannan, ɔ ti sɔ, sanngɛ kusu alua ba’m be di kpanwun buebue kanngan nga be fin be min’m be tabli’n su gua’n.” Zezi wunnin kɛ bla’n ti sran kpa. I ti’n, ɔ seli kɛ: “Ɔo mmo, ɔ Ɲanmiɛn sulafilɛ’n ti dan. Maan ɔ yo kɛ nga a fa sunnzun’n sa.” (Matie 15:27, 28) Kɛ ɔ́ yó sɔ’n, nn ba bla’n nunman be wun lɛ. Kɛ bla’n sɛli i sin i awlo’n, ɔ wunnin kɛ i wa bla’n w’a yo juejue. Yɛle kɛ “mmusu’n w’a jaso i su.”​—Marki 7:30.

Zezi nin i sɔnnzɔnfuɛ’m be jasoli Fenisi mɛn’n nun lɛ be ɔli Zurdɛn nzue ba’n i nglo lɔ bue liɛ’n su. Atrɛkpa’n, kɛ bé kɔ́’n, be kpɛli Galile Jenvie’n naan b’a wlu Dekapɔlu mɛn’n nun. Kɛ be juli lɛ’n, be fuli oka kun su. Sran kpanngban kpa be wunnin be. Ɔ maan be ko fali be sran mɔ be ja timan kpa’n, nin be nga be sa timan kpa’n, nin aɲinsifuɛ mun, nin bobo mun be blɛli Zezi naan w’a yo be juejue. I sɔ’n boli be nuan naan b’a manman Izraɛli Ɲanmiɛn’n.

Sanngɛ Zezi fɛli i ɲin sieli i bian kun su. Ɔ ti sutrefuɛ, kpɛkun ɔ kwlá ijɔman. Atrɛkpa kɛ sran sɔ’n wo sran kpanngban be afiɛn’n, ɔ wunmɛn i wun fɛ. Zezi wunnin i sɔ’n naan w’a fɛ i w’a ɔ aamiɛn. Kpɛkun ɔ kleli i like ng’ɔ su wa yo mɛn i’n. Ɔ fɛli i sa mma wlali bian’n i su’m be nun. Ɔ tili i nuan nzue, kpɛkun ɔ kannin bian’n i taaman’n. I sin’n, ɔ niannin ɲanmiɛn su lɔ, kpɛkun ɔ seli bian’n kɛ: “Efata.” I bo’n yɛle “Tike.” Kɛ ɔ yoli sɔ’n, bian’n i su’m be tikeli. Kpɛkun ɔ kwla ijɔli kpa siɛn’n. Zezi seli kɛ nán be bo sa sɔ’n su be kle sran. Afin ɔ kunndɛman kɛ bewanbewan ndɛ’n su yɛ sran’m be jran be lafi i su-ɔ. Ɔ kunndɛli kɛ sran’m be bɔbɔ be wun i naan be ti ndɛ ng’ɔ kan’n naan be lafi i su.​—Marki 7:32-36.

Kɛ sran’m be wunnin atrɛ nga Zezi yili be’n, “ɔ boli be nuan tratrali su.” Ɔ maan be seli kɛ: “Like kwlaa ng’ɔ yo’n, ɔ yo ye. Ɔ yo maan sutrefuɛ’m be ti sa, yɛ bobo’m be ijɔ bɔbɔ.”​—Marki 7:37.