Éyoñ a maneya kulane mbia metume Bepharisien, Yésus ba beyé’é bé ba té. Ba ke mfa’a ya Tyr a Sidon e Phénicie, abui bekilimita e nord-ouest.

Yésus a yene nda ya tabe, ve a nji yi na bôte be yeme na a ne valé. Ve, to’o vôm ate a vo’o sobô. Minga a too ngone Begrec a nga bialé vôm ate, a zu koone Yésus a taté fe na a ye’elan nye a jô’ô na: “A Tat, mone David, ko me éngôngo; ngo’ jam je adañe yen abé amu mbia nsisim.”​—Matthieu 15:22; Marc 7:26.

Éyoñe be wuluya ôbe nté, beyé’é be Yésus ba yemete nye na: “Tita’ane nye amu a yône bia mvus.” Yésus a yalan a liti’i amu jé a bo ve ane a nji nyoñe nye ngap: “Me nga lômban v’asu mintômba ya nda Israél mi ne njañan.” To’o nalé, minga a nji jô’é. A subu Yésus bebé a zu ku mebo mé si, a ja’é nye na: “A Nti, volô’ô ma!”​—Matthieu 15:23-25, Mfefé Nkôñelan.

Éko éziñ asu na a yen abime mbunan a bili, Yésus a belan mbia ôsimesane Bejuif be bili a lat a bôte ya meyoñe mefe a jô’ô na: “E nji bo mvaé ya nyoñe belete bon a wua je bone bemvu.” (Matthieu 15:26, Mfefé Nkôñelan) Éyoñe Yésus a belan éfia “bone bemvu,” a liti na a bili édo’o nye’an asu bôte be nji bo Bejuif. Asu dé, a mbamba tyiñe nkoon éngôngol wé bia tu’a liti aval a wô’ôtan.

A li’i wô’ ôlun, minga a nyoñ éve’ane ya avale Bejuif ba yene be, éyoñ éte a jô a éjote nyule na: “Yaa a Nti, e ne fe bebela na: Bone bemvu ba di afufus da ku e tawôlô si masa wop.” Yésus a yemelane mbamba été nleme wé a jô fe na: “A minga, mbunane wôé ô ne anen! E bo’o wo ane wo kômbô.” (Matthieu 15:27, 28, Mfefé Nkôñelan) Da bobane fe nalé, to’o na mona minga a nji bo valé! Éyoñe minga a bulane nda, a koone ngo jé é bôô énoñ é maneya bo mvo’é: “mbia nsisim a suuya nye”!​—Marc 7:30, Mfefé Nkôñelan.

E Phénicie, Yésus ba beyé’é bé ba lôte si ése be kelee mfa’a ya beta ôsôé ya Jourdain. Éko éziñe ba tyi’ilane Jourdain vôm éziñ e nord ya Mañ ya Galilée a ke si ya Décapole. Valé, ba bete nkôle yôp, ve nsamba bôt wo yene be. Bôte ba zu Yésus miñyeyem, mimbômbôk, mindindim a mimvumvuk. Ba zu bôé Yésus minkôkone mite mebo été, nnye ve mane saé mie. Bôte ba kam a ve Zambe ya Israël duma.

Yésus a nyoñe môt a ne ndôndok a mvumvuk ngap ngum avale nyoñan. Mi ne ve’ele tebe été jé ékôane bôt été. Éko éziñ éyoñ a yen avale nju’u môte nyi a bili, Yésus a vaa nye ékôane bôt été. Éyoñe be keya vôm be ne étam, Yésus a kate jam a zu bo asu dé. A futi môt anyui melo, a éyoñ a tuiya menden, Yésus a nambe môt ôyem. Nde fe éyoñ a bete mise yôp, Yésus a tot éfia ja tinane na, “Yombô’ô.” Été été, môt a taté na a wôk, a nga kobô fe mvo’é. Yésus a nji yi na foé éte é mialan, ve a yi na be buni nye amu mame bebiene ba yen a wôk.​—Marc 7:32-36, Mfefé Nkôñelan.

Ngule Yésus a bili na a saé bôt aval ete ja nambe bôte ba yene nye nya abuii, ba ‘semé angôndô ya abui.’ Ba jô na: “A boya mame mese mvaé, a bo’o mindôndok na mi wôk, a bo’o mimvumvuk na mi kobôô.”​—Marc 7:37, Mfefé Nkôñelan.