Be ni Yesu ewie eshi Farisifoi lɛ yɛ amɛkusumii ni hãa amɛfoɔ amɛ pɛ amɛnɔ mli lɛ hewɔ lɛ sɛɛ lɛ, ekɛ ekaselɔi lɛ shi. Ewo ehiɛ ewo kooyi-anai, ni enyiɛ shitoi babaoo kɛtee Tiro kɛ Sidon ni yɔɔ Foinike lɛ.

Yesu na shĩa ko ni eyato jɛmɛ, shi esumɔɔɔ ni mɛi leɔ akɛ eyɛ jɛmɛ. Kɛ̃lɛ, aná ale akɛ eyɛ jɛmɛ. Yoo ko ni ji Helanyo ni afɔ lɛ yɛ nakai kpokpaa lɛ nɔ lɛ na Yesu ni ebɔi lɛ faikpamɔ akɛ: “Naa mi mɔbɔ Nuŋtsɔ, David Bi. Daimonio miihao mibiyoo waa.”​—Mateo 15:22; Marko 7:26.

Saŋŋ mli lɛ, Yesu kaselɔi lɛ kɛɛ lɛ akɛ: “Wo lɛ gbɛ ni eya, ejaakɛ eebolɔ kɛmiinyiɛ wɔsɛɛ.” Yesu tsɔɔ nɔ hewɔ ni efooo edaaŋ lɛ, ekɛɛ akɛ: “Atsuuu mi mɔ ko mɔ ko ŋɔɔ, akɛ ja Israel we gwantɛŋi ni elaaje lɛ aŋɔɔ kɛkɛ atsu mi.” Shi yoo lɛ tee nɔ ekpa lɛ fai. Eba ni ebakoto Yesu ekɛɛ: “Nuŋtsɔ, ye obua mi!”​—Mateo 15:23-25.

Yesu wie nɔ ko kɛtsɔɔ bɔ ni Yudafoi lɛ buɔ mɛi ni jɛ maji krokomɛi anɔ amɛhãa lɛ koni ekɛka yoo lɛ hemɔkɛyeli ekwɛ, ewie akɛ: “Ejaaa akɛ aŋɔɔ bii lɛ aboloo lɛ ashɛrɛɔ ashwieɔ gbei abii lɛ ahiɛ.” (Mateo 15:26) Wiemɔ “gbei abii” ni Yesu kɛtsu nii lɛ tsɔɔ akɛ, edɔɔ mɛi ni jeee Yudafoi lɛ ahe. Bɔ ni efee ehiɛ ehã kɛ gbee ni ekɛwie lɛ hu tsɔɔ nakai.

Nɔ najiaŋ ni yoo lɛ mli baafu lɛ, ejɛ nɔ ni Yesu wie lɛ mli ehã hetoo yɛ heshibaa mli akɛ: “Nuŋtsɔ, nakai ni, shi yɛ anɔkwale mli lɛ, gbei abii lɛ yeɔ fufuji ni jɛɔ amɛnuŋtsɔmɛi lɛ akpɔlɔ lɛ nɔ shwieɔ shi lɛ.” Yesu na akɛ yoo lɛ yɛ tsui kpakpa ni ekɛɛ lɛ akɛ: “Oo yoo, ohemɔkɛyeli da; bɔ ni otaoɔ lɛ, aba mli nakai ahã bo.” (Mateo 15:27, 28) Ni eba mli nakai, eyɛ mli akɛ no mli lɛ gbekɛ yoo lɛ bɛ jɛmɛ! Be ni yoo lɛ ku esɛɛ kɛtee shĩa lɛ, eyana ebiyoo lɛ kã saa nɔ ni ehe ewa lɛ​—“daimonio lɛ etee”!​—Marko 7:30.

Be ni Yesu kɛ ekaselɔi lɛ shi Foinike lɛ, amɛwo amɛhiɛ amɛwo Yordan Faa lɛ yiteŋgbɛ. Eeenyɛ efee akɛ amɛfo Yordan Faa lɛ yɛ Galilea Ŋshɔ lɛ kooyigbɛ ni amɛtee Dekapoli kpokpaa lɛ nɔ. Be ni amɛshɛ jɛmɛ lɛ, amɛtee gɔŋ ko nɔ, shi asafoku lɛ na amɛ. Mɛi kɛ akpakei, kpajelɔi, shwilafoi, kɛ mumuii ba Yesu ŋɔɔ. Amɛkɛ helatsɛmɛi nɛɛ baŋmɛlɛ Yesu naji anaa ni etsa amɛ. Mɛi lɛ wo Israel Nyɔŋmɔ lɛ hiɛ nyam, ejaakɛ amɛnaa kpɛ amɛhe.

Yesu gbala ejwɛŋmɔ kɛtee nuu ko ni ji toimulɔ ni nyɛɛɛ awie jogbaŋŋ lɛ nɔ. Ekã shi faŋŋ akɛ nuu nɛɛ he ejɔŋ lɛ yɛ asafoku lɛ teŋ ni eyɔɔ lɛ hewɔ. Ekolɛ Yesu yɔse bɔ ni nuu lɛ nuɔ he ehãa lɛ, no hewɔ lɛ eŋɔ lɛ kɛje asafoku lɛ teŋ kɛtee afã. Be ni amɛsɔŋŋ amɛyɔɔ jɛmɛ lɛ, Yesu fee okadi ko kɛtsɔɔ nuu lɛ nɔ ni eeba ebafee ehã lɛ lɛ. Ekɛ ewaobii wo nuu lɛ toii amli, ni etsɛ̃ lajɔ̃, ni eta nuu lɛ lilɛi he. Kɛkɛ ni Yesu kwɛ ŋwɛi ni ewie akɛ, “Hefata,” eshishi ji, “Gbelemɔ.” Kɛkɛ ni nuu lɛ toii gbele ni ebɔi wiemɔ jogbaŋŋ. Yesu sumɔɔɔ ni ahãa mɛi leɔ nɔ ni efee lɛ, eesumɔ ni mɛi adamɔ nɔ ni amɛ diɛŋtsɛ amɛna ni amɛnu lɛ nɔ amɛhe enɔ amɛye.​—Marko 7:32-36.

Hewalɛ ni Yesu kɛtsaa helai lɛ ná mɛi lɛ anɔ hewalɛ waa, ejaakɛ “amɛhe jɔ̃ amɛhe kɛteke nɔ.” Amɛkɛɛ akɛ: “Efee nii fɛɛ jogbaŋŋ. Ehãa toimulɔi po nuɔ nii, ni mumuii hu wieɔ.”​—Marko 7:37.