Ntangu Yezu me manisa kutubila Bafarize nde bo ke sadilaka bansiku ya bantu sambu na mambote na bo mosi, yandi ti balongoki na yandi me katuka pana. Yandi me kwenda na ntoto ya Tire mpi ya Sidoni na Fenisia ntama na ndambu ya nordi-westi.

Yezu me zwa nzo ya kuvanda, kansi yandi ke zola ve bantu kuzaba nde yandi kele na nzo yina. Ata mpidina, bantu me zaba nde yandi me kwisa. Nkento mosi ya Mugreki yina me butukaka na bwala yai me mona yandi mpi me bondila yandi nde: “Mfumu, Mwana ya Davidi, wila mono mawa. Mwana na mono ya nkento kele ti demo mosi yina ke niokula yandi ngolo.”—Matayo 15:22; Marko 7:26.

Na nima ya ntangu mosi buna, balongoki ya Yezu me songa yandi nde: “Kula yandi, sambu yandi ke landa kutula makelele na nima na beto.” Yezu me tendula sambu na nki yandi ke sala bonso nde yandi me wa ve mambu yina nkento yai ke tuba. Yezu me tuba nde: “Nzambi tindaka mono ve na bantu yonso, kansi kaka na mameme ya me vilaka ya nzo ya Izraele.” Kansi nkento yina me yambula ve, yandi ke landa kaka kubondila yandi. Yandi me pusana pene-pene mpi me bwa na ntwala ya Yezu, yandi me tuba nde: “Mfumu, sadisa mono!”—Matayo 15:23-25.

Ziku sambu na kutala kana nkento yai kele ti lukwikilu, Yezu me tubila bangindu ya mbi yina Bayuda ke vandaka ti yo sambu na bantu ya bansi ya nkaka. Yandi me tuba nde: “Yo kele mbote ve na kubaka mampa ya bana mpi kulosila yo bana ya bambwa.” (Matayo 15:26) Ntangu Yezu me tubila “bana ya bambwa,” yandi me monisa zola yina yandi kele ti yo sambu na bantu yina kele ve Bayuda. Yo fwete vanda nde, mawi na yandi ke monana mpi na luse na yandi ti na ndinga na yandi ya mawete.

Nkento yina me wa ve makasi, kansi yandi me bakisa mambu yina Yezu me tuba sambu na bangindu ya mbi yina Bayuda ke vandaka ti yo sambu na bantu ya nkaka; yandi me tuba na kudikulumusa yonso nde: “Ee Mfumu, kansi bana ya bambwa ke diaka bitini ya mampa yina ke bwaka na nsi ya mesa ya bamfumu na bo.” Yezu me bakisa nde nkento yai kele ntima-mbote, yo yina yandi me zabisa yandi nde: “O nkento, nge kele na lukwikilu ya nene; bika yo salama kaka mutindu nge ke zola.” (Matayo 15:27, 28) Yo me salama kaka mutindu yina ata mwana yina ya nkento kele ve pana. Ntangu nkento yina me vutuka na nzo, yandi me kuta mwana na yandi me lala na mbeto mpi yandi me beluka kibeni, disongidila “demo me basika.”—Marko 7:30.

Yezu ti balongoki na yandi me katuka na Fenisia mpi bo ke kwenda na ndambu ya zulu ya Nzadi Yordani. Ziku, bo me sabuka Yordani na nordi ya Nzadi-Mungwa ya Galilea mpi bo me kwenda na ntoto ya Dekapolisi. Kuna, bo me tombuka na ngumba, kansi bimvuka ya bantu me mona bo. Bantu me natila Yezu bantu ya makulu-kifu ti ya maboko-kifu, bifwa-meso mpi bababa. Bo me tula bambefo yai na makulu ya Yezu, mpi yandi ke belula bo. Bantu ke yituka mpi bo ke pesa Nzambi ya Izraele nkembo.

Yezu me tula dikebi ya mingi na bakala mosi yina kele kifwa-makutu mpi baba. Yindula mutindu yandi fwete kudiwa na kati ya kimvuka ya bantu mingi. Ziku, Yezu me bakisa nde bakala yai ke wa boma; yo yina Yezu me nata yandi ntama ti kibuka ya bantu. Bo kele kaka bo zole, ebuna Yezu me songa yandi mambu yina yandi ke zola kusadila yandi. Yezu me tula misapi na yandi na makutu ya bakala yina, mpi na nima ya kulosa mate, Yezu me simba ludimi na yandi. Na nima, Yezu me tala na zulu mpi me tuba ngogo mosi ya Bayuda ya ke tendula “Kanguka.” Ebuna, bakala yina me yantika kuwa mpi kutuba mbote. Yezu ke zola ve nde bantu ya nkaka kuzaba diambu yai, kansi yandi ke zola nde bo kwikila na yandi na nsadisa ya mambu yina bo mosi ke mona mpi ke wa.—Marko 7:32-36.

Ngolo yina Yezu me sadila sambu na kubelula muntu yai me simba kibeni ntima ya bantu yina me mona yo, yo yina bo ‘me yituka mingi kibeni.’ Bo me tuba nde: “Yandi me sala mambu yonso mbote. Yandi ke sala nkutu nde bifwa-makutu kuwa mpi bababa kutuba.”—Marko 7:37.