Byo anenene Bafaliseo pa mambo a bisho byabo, Yesu ne baana banji ba bwanga bafuminepo. Bayile ku mapunzha a Tila ne Shidona mu kibunji kya Fenesha ku kabeta ka buyeke muzhika palepele bingi.

Yesu wataaine nzubo mwa kufikila, pano bino, kechi wakebele muntu nangwa umo kuyuka ko ajinga ne. Nangwatu mu ino nyaunda bantu bamumwene. Mwanamukazhi Mungiliki wasemekejilwe mu ino mpunzha wamutaaine ne kumusashijila’mba: “Nkambo, anweba Mwana Davida ngubilai lusa. Mwanami wa mukazhi bamumanyika bingi ku ndemona.”—Mateo 15:22; Mako 7:26.

Byo papichileko ka kimye, baana ba bwanga baambijile Yesu amba: “Mwambilai abwelemo, mambo ubena kwitulondela na kwitubijika.” Yesu wibalumbulwijile ene mambo o amulekejile uno mwanamukazhi. Waambile’mba: “Amiwa kechi bantumine ku bonse ne, kana ku mikooko yaeleka ya kisaka kya Isalela.” Bino, uno mwanamukazhi kechi wabwelelemo ne. Waishile kwi Yesu ne kufukama kabiji wamusashijile’mba: “Nkambo, nkwashai!”—Mateo 15:23-25.

Kyamweka Yesu wakebelenga kweseka lwitabilo lwa uno mwanamukazhi byo aambile pa Bayudea byo bamonanga bantu ba mu bisaka bikwabo mu jishinda jatama. Waambile’mba: “Kechi kyawama kushikula kajo ka baana ne kupa twana twa kabwa ne.” (Mateo 15:26) Kupichila mu kwamba pa “twana twa kabwa,” Yesu wasolwele byo aubijile lusa bantu babujile Bayudea. Ñambilo ya lusa ne mwekelo ya kilungi, nabyo byamwesheshe kino kyubilo kya lusa.

Uno mwanamukazhi kechi wazhingijile ne, bino waambile na kwipelula pa byaambile Yesu pa misalululo ya Bayudea amba: “Ibyo Nkambo, pano bino twana twa kabwa tuja bukuku bupona ku tebulu wa bankambo yato.” Yesu wayukile’mba uno mwanamukazhi uji na muchima wawama waambile’mba: “Obewa mwanamukazhi, uji na lwitabilo lukatampe; kyubiwe monka mo wakebela.” (Mateo 15:27, 28) Kabiji kyaubiwe nangwa kya kuba mwananji kechi wajingapo ne. Mwanamukazhi byo abwelele ku nzubo wataaine mwananji wa mukazhi walaala pa mwanya saka abukwa, “ndemona wafumamo kala.”—Mako 7:30.

Byo afumine mu kibunji kya Fenesha, Yesu ne baana banji ba bwanga bayile ne kukapita ku nsulo ya Mukola wa Yodano. Kyamweka baabukile pa mwaba wa Yodano ku kabeta ka ku buyeke bwa Kalunga ka Ngalilea ne kutwela mu mapunzha a Ndekapoli. Akwa bakanjijile pa mutumba, bino jibumba jikatampe jaishile ko bajinga. Bantu bamuletejilenga Yesu bantu balemana, bampofu ne bakamaama. Bebatujile ku maulu anji ne aye wibabukile. Bantu byo bakuminye pa kumona kino, bamutumbijikile Lesa wa Isalela.

Yesu watele bingi muchima ku muntu umo washinkile matwi kabiji wabulanga kwamba. Mwakonsha kufwanyikizha uno muntu byo aumvwinenga pa kwikala paji bantu bavula. Kyamweka Yesu wamwene’mba uno muntu waakamwa, onkao mambo, na mambo a lusa wamutwajile kwa bunke kumufumya mu jibumba. Byo bajinga kwa bunke bwabo, Yesu wamwesheshe kintu kyo akebele kumubila. Wakujile minwe yanji mu matwi a uno muntu, byo ashipile mate wamukwachile pa lujimi. Yesu byo atajile mwiulu, waambile kyambo kilumbulula’mba “Ashinkuke.” Ponkapo matwi a uno muntu ashinkukile kabiji watatwile ne kwamba. Yesu kechi wakebelenga’mba bantu bavula bayuke kino kyo aubile ne, bino wakebelenga bantu kumwitabila na mambo a bintu byo bemwenejile bene ne kumvwa.—Mako 7:32-36.

Bulume bwa kwa Yesu bwa kubuka bantu bwalengejile bantu bamweneko kukumya bingi, “Kine bakuminye bingi.” Kabiji baambile’mba: “Wauba bingi bulongo bintu byonse. Ulengela ne bashinka matwi kumvwa ne bakamaama kwamba.”—Mako 7:37.