Jesu hasanyazize Bafalisi bakeñisa lizo zabona za buitati, uzwa mwa sibaka seo ni balutiwa bahae. Uya kwa libaka za Tire ni Sidoni mwa Fenisia, ili likilomita zeñata kuya kwa mutulo-wiko.

Jesu ufumana ndu mwa kuina kono halati kuli batu bazibe kuli uteñi mwa ndu yeo. Nihakulicwalo, batu balemuha kwainzi. Musali wa Mugerike yanaapepezwi mwa sibaka se, ufumana Jesu mi umukupa kuli: “Haku nishwele makeke, Mulena, Mwanaa Davida. Mwanaka wamusizana ukatazwa hahulu ki madimona.”—Mateu 15:22; Mareka 7:26.

Hamulaho wa nako, balutiwa ba Jesu bamukupa kuli: “Haku mubulelele aye, kakuli uswalelezi kuhuwaka mwamulaho waluna.” Jesu ubaalaba ka kufa libaka hasaezi zamukupa musali yo, uli: “Nenisika lumelwa ku mutu ufi kamba ufi, haisi kwa lingu zelatehile za ndu ya Isilaele.” Nihakulicwalo, musali yo hazwafi. Uatumela Jesu ni kukubama fapilaa hae, mi uli: “Mulena, haku nituse!”—Mateu 15:23-25.

Mwendi ka kulika tumelo ya musali yo, Jesu uama kwa mubonelo womaswe wa Majuda kwa batu ba sicaba sisili, uli: “Hakusika luka kuunga sinkwa sa banana ni kusinepela tunjanana.” (Mateu 15:26) Habulela za “tunjanana,” Jesu ubonisa mufelañeke wahae kwa batu besi Majuda. Ponahalo ya fa sifateho ni linzwi lahae leli musa ni zona libonisa cwalo.

Mwa sibaka sa kunyema, musali yo ni yena uama kwa mubonelo wa Majuda wa ketululo mi ka buikokobezo uli: “Ki cwalo, Mulena, kono ni tona tunjanana tucanga kwa buungululwa bobuwa kwa tafule ya malenaa tona.” Jesu ulemuha kuli musali yo unani pilu yende, mi uli: “Wena musali, tumelo yahao ki yetuna; kuezahale ku wena moubatela.” (Mateu 15:27, 28) Mwanaa hae wafola, nihaike kuli nasiyo ni yena! Musali hakutela kwa ndu ufumana kuli mwanaa hae ulobezi fa mumbeta, mi ufolile kufolelela—“mudimona uzwile ku yena”!—Mareka 7:30.

Jesu ni balutiwa bahae habazwa mwa sibaka sa Fenisia baya kwa sibaka sesi kwa ñambamo ya Nuka ya Jordani. Mwendi basilela Nuka ya Jordani kwa mutulo wa Liwate la Galilea mi kihona baya mwa sibaka sa Dekapolisi. Habafita koo, bakambama lilundu, kono buñata bwa bafumana fateñi. Batu batiseza Jesu lihole, liyanga, libofu, ni limumu. Babeya bakuli babona kwa mahutu ahae, mi wabafolisa. Batu bakomoka mi balumbeka Mulimu wa Isilaele.

Jesu uisa hahulu pilu ku muuna wa susu, yasakoni kubulela hande. Munahane feela mwaikutwela muuna yo mwahalaa batu babañata. Mwendi ka kubona kuli muuna yo uikalezwi, Jesu umuisa kwa mukunda. Habali kwa mukunda, Jesu ubonisa zabata kueza ku muuna yo. Ukenya minwana mwa lizebe za muuna yo, mi hasakwile mati, uswala muuna yo fa lulimi. Cwale Jesu utalimela mwahalimu, ni kubulela kuli “Effata,” yetalusa kuli “Tibuluha.” Honafo muuna yo ukala kuutwa, mi ukalisa kubulela hande. Jesu hatabeli kuli taba ye ihasanyezwe kwa batu babañata, kakuli ubata kuli batu babe ni tumelo ku yena kabakala lika zebaiponezi ni kuikutwela.—Mareka 7:32-36.

Maata anani ona Jesu akufolisa batu ‘akomokisize hahulu’ batu. Bali: “Mutu yo ukondisize lika kaufela. Mane utahisa kuli bo susu bautwe ni kuli limumu libulele.”—Mareka 7:37.