Yezu mumane kuela Bafalese patoke bua muvuabu benza malu bilondeshile bilele biabu, wakumbuka ne bayidi bende. Wakaya mu buloba bukese bua Tulo ne Sidona mu Foinike, mu ntanta wa kilometre ya bungi ku nord-ouest.

Yezu wakapeta nzubu uvuaye mua kusomba kadi kavua musue bua bantu bamanye ne: uvua muabu au to. Kadi nansha muaba eu kavua anu mua kusokoma bimpe to. Mamu kampanda muena Greke uvua muledibue muaba au, wakamona Yezu ne kutuadijaye kumusengelela wamba ne: “Mukalenge, Muana wa Davidi, ngumvuilaku luse. Muananyi wa bakaji udi ukenga bikole bua demon udi mumukuate.”​—Matayi 15:22; Mâko 7:26.

Pashishe, bayidi bakambila Yezu ne: “Umupingaje bualu udi utungunuka ne kuela mbila panyima petu.” Yezu wakandamuna umvuija bua tshinyi kavua musue kumutangila wamba ne: “Kabavua bantume kudi muntu mukuabu, anu kudi mikoko mijimine ya nzubu wa Isalele.” Nansha nanku, mukaji au kakalekela to. Wakasemena ne kukulukaye kumpala kua Yezu, umusengelela ne: “Mukalenge, ngambuluisha koku!”​—Matayi 15:23-25.

Bidi bimueneka ne: bua Yezu kuteta ditabuja diende, wakakuata mudimu ne mmuenenu mubi uvua nende bena Yuda bua bantu ba bisamba bikuabu wamba ne: “Ki mbimpe kuangata biakudia bia bana, kubielela bana ba mbua to.” (Matayi 15:26) Padi Yezu wakula bua “bana ba mbua,” udi uleja mudiye umvuila bantu badi kabayi bena Yuda luse. Mushindu udiye wakula ne dîyi dia luse bidi kabidi bileja muvuaye ne luse.

Pamutu pa mukaji eu kufiika munda, udi wakula bua kansungansunga ka bena Yuda, wamba ne budipuekeshi buonso ne: “Mmuomu Mukalenge, kadi bushuwa bana ba mbua batu badia bisunsukila bidi bimata ku mêsa a bamfumu babu.” Yezu wakamona muvua muoyo wa mamu muimpe, ke kuambaye ne: “Wewe mukaji, ditabuja diebe ndinene; bikuenzekele bu muudi musue.” (Matayi 15:27, 28) Biakenzeka nanku, nansha muvua muana wa bakaji kayi muaba au! Pakapingana mamu kuende, wakasangana muanende wa bakaji mulale pa bulalu, mumane kumvua bimpe ne “demon mumane kupatuka.”​—Mâko 7:30.

Yezu ne bayidi bende bavua bumbukile ku Foinike, bakosolole buloba baye batangile ku mutu kua musulu wa Yadene. Pamuapa bavua basabuke Yadene muaba kampanda ku nord kua mbuu wa Galela ne baye mu buloba bua Dekapoli. Kuntu aku bakabanda mukuna kampanda, kadi musumba wa bantu wakabapetaku. Bantu bakatuadila Yezu balema babu, aba bavua batebuka, bampofu, ne tumama. Bakaladika bantu bavua basama aba ku makasa a Yezu, yeye kubondopa. Biakakemesha bantu bikole, ke bobu kutumbisha Nzambi wa Isalele.

Yezu wakatabalela bikole muntu mulume kampanda uvua mpudi matshi ne uvua kayi wakula bimpe. Udi mua kumvua muvua muntu au mudiumvue munkatshi mua musumba wa bantu au. Pamuapa bu muvua Yezu mumone muvua muntu eu mulubakane, wakamumbusha munkatshi mua musumba wa bantu. Padibu pa nkayabu, Yezu udi uleja tshikalaye mua kumuenzela. Udi wela minu yende mu matshi a muntu eu, ne yeye mumane kutuila mate, wakalenga ludimi lua muntu au. Pashishe Yezu wakatangila mu diulu, kuambaye ne: “Efata,” mmumue ne: “Jikuka.” Diakamue, muntu eu wakatuadija kumvua ne kuakula bu bantu bonso. Yezu kavua musue bua bualu ebu bumanyike bikole mu bantu to, kadi uvua ujinga bua bantu bamuitabuje bilondeshile malu avuabu badimuenena ne badiumvuila.​—Mâko 7:32-36.

Bukole bua Yezu bua kuondopa nabu buvua ne buenzeji bua bungi kudi bantu bavua bamona, bualu “bakakema bikole menemene.” Kuambabu ne: “Mmuenze malu onso bimpe. Udi ufikisha too ne bampudi matshi ku diumvua ne tumama ku diakula.”​—Mâko 7:37.