A Zeezi sẽn ning Fariizẽ-rãmbã taal b sẽn tũud ninsaalb minundã poore, yẽ ne a karen-biisã loogame. B rɩka sor n tees Tɩɩr ne Sɩdõ sẽn be Fenisi soolmẽ wã. Zãra ne Kapɛrnawom.

B sẽn ta wã, b paama zak n sigi. A Zeezi ra pa rat tɩ tẽngã neb bãng t’a waa be ye. La baa sẽn pa Israyɛll tẽngã, neb n bãng a Zeezi. Pag a ye n yã-a n bãng-a. Pagã yaa Gɛrke, la a roga Fenisi. A ra pʋgda a Zeezi n kot-a woto: “Zu-soaba! A Davɩɩd Bi-ribla! Zoe-y mam nimbãanega. Zĩn n namsd mam bi-pugl hal wʋsgo.”—Matye 15:22; Mark 7:26.

Karen-biisã wa n baas n yeela a Zeezi yaa: “Rig-y-yã t’a looge, bala a pʋgda tõnd n kelemdẽ.” La a wilg-b-la a sẽn pa kelgd pagã võore. A yeelame. “B sẽn tʋm maamã, yaa Israyɛll buudã pe-menemdsã nengẽ bala.” La pagã yẽ kell n talla pẽdgre. A wa n wõgemda a Zeezi taoore, n yeele: “Zu-soaba, sõng-y-ma.”—Matye 15:23-25.

A Zeezi goma ne pagã, n togs gomd sẽn wilgd tɩ zʋɩf-rãmbã ra pa nand buud a taabã neb ye. Wõnda yaa sẽn na n mak pagã n bãng a sã n tara tẽebo. A yeel-a lame: “Ka sõama tɩ b rɩk kamb dɩɩb n lob ba-bi ye.” (Matye 15:26) A Zeezi sẽn bool bu-zẽmsã neb tɩ “ba-bi” wã pa rat n yeel tɩ yẽ me kis-b lame ye. Sãmbg kae me t’a nen-wamdã, n paas a sẽn bʋkd a koɛɛgã n gomd ne-bã wilgdame t’a nong-b lame.

Pagã pa yik a sũur ye. A pʋd n tika a Zeezi sẽn yeelã zug n leok ne sik-m-meng yaa: “Zu-soaba, yaa sɩda, la baoosgo, ba-bi rɩta rɩ-zersã sẽn lʋɩt b zu-soben-dãmbã taabl tẽngrã.” A Zeezi yãame tɩ pagã tara sũ-sõngo. A yeel-a lame yaa: “Paga, ad f tẽebã yaa kãsenga. Bɩ fo sẽn datã yɩ.” (Matye 15:27, 28) La sɩd yɩɩ wa pagã sẽn datã, baa ne a bi-puglã sẽn da pa be beenẽ wã. Pagã sẽn kulã, a tɩ mikame tɩ “zĩnã yii n basa a bi-puglã,” t’a gãe a gãagẽ.—Mark 7:30.

A Zeezi ne a karen-biisã yii Fenisi n tees Zʋrdẽ kʋɩlgã sẽnese. Tõe tɩ b pasga kʋɩlgã n bas Galɩle mogrã b nug-rɩtgo, n kẽng Dekapoll soolmẽ wã. B sẽn ta be, b kẽnga tãng a ye zugu. La neb kʋʋng bãnga b zĩiga, n tall põyã, wobse, zoens la mugs n wa a nengẽ. B gãnega bãad-rãmbã a Zeezi taoore, la a sãooga b fãa. Nebã sũy yɩɩ noog wʋsg hal tɩ b pẽg Israyɛll Wẽnnaamã.

Rao a ye n da be be n yaa wʋng la muka, t’a Zeezi ges a yell neere. Ned a woto sã n be kʋʋng sʋka, pa nana ne-a ye. Wõnda a Zeezi bãngame tɩ sɩd yaa toog ne raoã. A peeg-a lame n yi kɛɛnga, n bilg t’a bãng bũmb ning a sẽn dat n maan n kõ-a wã. A Zeezi ninga a nug-bi wã raoã tʋbẽ, n tʋbs kolkood la a tẽk a zɩlemdã. Rẽ poore a nak n gesa saasã, n yeel yaa: “Efata,” sẽn dat n togs tɩ “yoke.” Zĩig pʋgẽ, raoã tʋbã yoosame, t’a zɩlemdã me lak t’a tõe n gome. La a Zeezi ra pa rat tɩ kibarã yelg ye. Bala a ratame tɩ ned sã n na n tẽ yẽnda, bɩ yɩ a mengã sẽn yã la a wʋm bũmb nins yẽ sẽn maandã yĩnga.—Mark 7:32-36.

Nebã sẽn yã t’a Zeezi tara tõog n sãoogd bãad-rãmb la koms-rãmbã, b “yɛɛsa hal wʋsgo.” B yeelame: “Bãmb maanda bũmb fãa neere. Bãmb kɩtdame tɩ baa wʋms wʋmdẽ, tɩ mugs gomda.”—Mark 7:37.