Costumbrinkunarëkur fariseukunata condenarirmi, Jesuswan qateqninkunaqa alläpa karuta ëwakuyarqan Fenicia ëwëkunachö këkaq Tïru y Sidon markakunayaq.

Jesusqa juk wayichömi posadakurqan. Y manam munarqantsu nunakuna mëchö këkanqanta musyayänanta, peru nunakunaqa ashikäyarqanllam. Fenicia ëwëkunapita juk warmim qepankunapita sinchipa kënö nirqan: “Teytë, Davidpa Tsurin, ankupëkallämë. Warmi wamrallämi supëyoq karnin alläpa sufrikan” (Mateu 15:22; Marcus 7:26).

Tsëmi Jesuspa qateqninkunaqa kënö niyarqan: “Ëwakunampaq nïkï, porqui qepantsiktam sinchipa rogakurnin shamïkan”. Jesusqa imanir mana cäsushqa kanqantam, kënö entienditsirqan: “Noqataqa Dios kachamashqa oqrakashqa üshakunanö këkaq Israel nacion kaqkunallamanmi”. Peru warmiqa respetarninmi puntanman qonqurikïkur kënö nirqan: “¡Teytë, yanapëkallämë!” (Mateu 15:23-25).

Itsa markäkoq kanqanta musyëta munarnin, Jesusqa juk nacion nunakunata judïukuna mana allipa rikäyanqanwan igualatsirninmi kënö contestarqan: “Manam allitsu wamrakunapaq kaq tantata tsarirkurnin chushchukunapaq jitëkïqa” (Mateu 15:26). ‘Chushchukuna’ nirqa, mana judïu nunakunata alläpa ankupanqantam Jesusqa rikätsikïkarqan. Qaqllan imanö këkanqan y shumaqllapa parlapanqanqa alläpa kuyakoq kanqantachi rikätsikurqan.

Piñakunampa rantinmi, tsë warmiqa Jesus ninqanta yachëllapa contestarnin kënö nirqan: “Awmi Teytë, peru rasumpa kaqchöqa, chushchukunaqa duëñunkunapa mësankunapita mikï shikwanqantam mikuyan”. Tsënam Jesusqa markäkoq warmi kanqanta cuentata qokurirnin kënö nirqan: “Äh warmi, jatunmi markäkïniki, munanqëkimannö rurakätsun” (Mateu 15:27, 28). Y warmi wamran mana tsëchö këkaptimpis, tsënömi pasakurqan. Tsë warmi wayinta kutirirqa, wamran chipyëpa kachakashqatana y supëpis yarqushqatanam taririrqan (Marcus 7:30).

Jesuswan qateqninkunaqa Feniciapitam ewkuyarqan y Jordan mayu witsëpam ëwayarqan. Itsa Galilëa qochapa uma kaq lädumpa mayuta tsimpayarqan y Decäpolis ëwëman chäriyarqan. Y tsëpitanam juk jirkaman witsäyarqan, peru nunakunaqa mëchö këkäyanqanta musyarirmi cöjukunata, lisiädukunata, wiskukunata y müdukunata Jesus kaqman apayarqan; y tsëmi pëqa llapanta kachakäratsirqan. Tsërëkurmi nunakuna espantakurnin Diosta alabar qallëkuyarqan.

Tsëpitanam Jesusqa juk sordu y alleqlla parlëta mana puëdeq nunata ankupanqanta rikätsikurqan. Tsë nunaqa alläpa mantsakashqachi këkarqan. Itsa tsërëkur, Jesusqa mëtsika nunakunapita japallanllata karuman aparqan. Tsëpitanam, tsë nunapa ishkan rinrinman dëdunta yakarqan, y toqarirmi, qallunta yatëkurqan. Y ciëluman rikëkurmi, Jesusqa “Ëffatha” nirqan, tsëqa “kichakäri” ninanmi. Tsë höram, nunapa rinrin kichakärirqan y allinam parlarpis qallëkurqan. Peru Jesusqa manam munarqantsu ruranqan milagrupita parlayänanta, porqui pëqa munarqan nunakuna kikinkuna rikäyanqampita y wiyayanqampita pëman markäkuyänantam (Marcus 7:32-36).

Jesus ruranqan milagrukunachö alläpa puëdeq kanqanta rikarninmi, nunakunaqa alläpa ‘espantakur chipyëpa mantsakäkuyarqan’. Y kënömi niyarqan: “Imëka ruranqampis alläpa allim kashqa. Sordukunatapis wiyatsinmi, y müdukunatapis parlatsinmi” (Marcus 7:37).