Jesusqa fariseo runakunata qaqchasqanmantam qatiqninkunawan kuska Tiro hinaspa Sidon llaqtakunamanña rirqa, chayqa Fenicia lawpim karuniqpiña karqa.

Chaypim Jesusqa huk wasiman samapakunanpaq yaykurqa, hinaspam mana munarqachu chaypi kasqanta pipas yachanantaqa. Chaywanpas runakunaqa maypi kasqanta yacharuspankum rirqaku. Chay lawpiqa Grecia runakunamanta huk warmim Jesusta tariruspan pitukuykuspa nirqa: “¡Davidpa churin señorlláy llakipayariykullawayá! Warmi wawallaymi demoniopa llumpay ñakarichisqan kachkan”, nispa (Mateo 15:22; Marcos 7:26).

Chaypim manapas unaymanta qatiqninkuna Jesusta nirqaku: “Pasakunanpaqyá niykuy, qipanchiktam qayaykachakustin hamuchkan”, nispa. Jesusñataqmi imanasqa mana uyariqpas tukusqanmanta nirqa: “Ñuqataqa kachamuwarqa Israel nacionniyuq chinkasqa ovejakunallamanmi”, nispa. Chayna kaptinpas chay warmiqa Jesusman asuykuspanmi pitukuykuspa kaqlla nirqa: “¡Yanapaykullawayá señor!”, nispa (Mateo 15:23-25).

Judio runakunaqa chiqniqkum huk law llaqtayuq runakunataqa, chaymi Jesusqa chay warmi imayna sunquyuq kasqanta yachananpaq nirqa: “Manam allinchu wawa-churikunamanta tantata qichuspa allquchakunaman wischuykuyqa”, nispa (Mateo 15:26). Jesusqa “allquchakunaman” nispanqa mana judio casta runakuna llakipayasqantam qawachirqa. Chaytachá qawachirqa uyanpas hinaspa imayna rimasqanpas.

Chay warmiñataqmi Jesuspa nisqanwan mana hukmanyaspan nirqa: “Arí, chaynam señor, ichaqa allquchakunapas dueñonkupa mesanmanta wichiqkunatam mikunku”, nispa. Jesusñataqmi allin sunquyuq kasqanta musyaspan nirqa: “Mamáy, ancha iñiyniyuqmi kanki, munasqaykiman hinayá ruwasqa kachun”, nispa (Mateo 15:27, 28). Hinaptinmi warmanqa karupi kaspanpas chaylla allinyarurqa. Chaymi mamanqa wasinman kutispan wawantaqa manaña demonioyuqta camanpi sirirayachkaqta allintaña tarirurqa (Marcos 7:30).

Chaymantam Jesusqa qatiqninkunawan kuska Fenicia lawmanta Jordan mayupa qallarisqan lawman rirqaku, hinaspam mayuta chimpaspanku Decapolis lawman chayarqaku. Chaypi kaspankuñataqmi urqu lawman rirqaku, hinaptinmi runakunaqa yacharuspanku Jesusman wistukunata, suchukunata, ñawsakunata hinaspa mana rimay atiqkunata pusarqaku. Hinaspam Jesuspa ñawpaqninpi saqiykuptinku pay hampirqa. Hinaptinmi runakunaqa kusikuymanta Diosta hatuncharqaku.

Jesusmanqa pusarqakutaqmi mana uyariq hinaspa rimayta sasachakuq runatapas. Chay runaqa yaqachusmi pinqapakurqa achka runakuna kasqanrayku. Chaychusmi Jesusqa kuyakuq kaspan runakunamanta karuniqman pusaspanraq hampiykurqa. Jesusqa chay runapa iskaynin rinrinmanmi makinta churarqa, hinaspam dedonpi tuqaykuspan qallunta llachpaykurqa. Hinaspam hanaq pachata qawarispan nirqa: “Efata”, nispa. Chay ninanqa “kicharikuy” ninanmi. Hinaptinmi chay runaqa uyarikuyta qallaykuspan rimaytapas qallaykurqa. Jesusñataqmi ama pimanpas willakunanpaq kamachirqa, chaytaqa nirqa imapas ruwasqanta kikinku qawaspa runakuna iñinankupaqmi (Marcos 7:32-36).

Chayta qawaspam runakunaqa llumpa-llumpay kusikuywan uyarayarusparaq nirqaku: “Tukuy imatam allinta ruwan, mana uyariqkunatam uyarichin, mana rimaqkunatapas rimachinmi”, nispa (Marcos 7:37).