Na peko ti so Jésus afa sioni ti angobo ti sarango ye ti aFarizien, so asara nzoni gi na ala wani, lo na adisciple ti lo amû lege ahon. Ala gue na mbage ti sese ti Tyr nga na Sidon, ambeni kodro ti Phénicie, so ayo akilomètre mingi na mbage ti nord-ouest.

Jésus awara mbeni ndo ti lango na ndo ni so, me lo ye pëpe si azo ahinga so lo yeke na place ni so. Me kue gbä, azo ahinga ni. Mbeni wali Grec, so a dü lo na ndo ni so, awara Jésus na lo komanse ti dema, lo tene: “Seigneur, Molenge ti David, sara nzoni bê na mbi, ndali ti so sioni yingo ayeke sara pasi mingi na molenge ti mbi ti wali.”—Matthieu 15:22; Marc 7:26.

A gue ngbii, adisciple atene na Jésus atene: “Tene na wali so ti gue, ngbanga ti so lo ngbâ ti dekongo na peko ti e.” Jésus afa na ala raison so lo sara sanka ti wali ni so, lo tene: “A tokua mbi na azo kue ape, me gi na ataba ti da ti Israël so agirisa.” Atâa so kue, wali ni azia hundango ndo ni ape. Lo ga na tere ti Jésus, lo tï na sese na lo tene: “Seigneur, mû maboko na mbi!”—Matthieu 15:23-25.

Peut-être ti tara mabe ti wali ni, Jésus asara kua na sioni bango ndo so aJuif ayeke na ni na ndo ti tanga ti amara kue. Lo tene: “A yeke na lege ni pëpe ti mû mapa so ayeke ti amolenge ti bi ni na akete mbo.” (Matthieu 15:26). Na tenengo “akete mbo,” Jésus afa nzoni bango ndo so lo yeke na ni na mbage ti azo so ayeke aJuif ape. Zo apeut ti bâ ni lani na yâ ti lê ti lo nga na totongo ti go ti lo.

A hon ti tene bê ti lo ason, wali ni asara kua na bango ndo ti aJuif so ti sara tënë na baba pëpe. Lo tene: “Tâ tënë, Seigneur. Me, akete mbo ayeke te afuku ti kobe so alondo na ndo ti table ti awa ti ala si a tï na sese.” Jésus abâ nzoni ye so ayeke na yâ ti bê ti lo na lo tene na wali ni, lo tene: “Wali! mabe ti mo ayeke biani kota. Zia ye ni asi na mo tongana ti so mo ye.” (Matthieu 15:27, 28). Na a yeke ye so asi la, atâa so maseka-wali ni ayeke na tere ti ala ge ape! Tongana wali ni akiri na yanga-da, lo wara molenge ti lo ni, so asava awe, na langongo ni na ndo ti gbogbo: “Sioni yingo ni asigi na yâ ti lo awe.”—Marc 7:30.

Jésus na adisciple ti lo alondo na kodro ti Phénicie ni, ala gue na kodro so ayeke na mbage ti li ti Ngu ti Jourdain. Âmanke ala fâ Ngu ti Jourdain ni na hongo na mbage ti nord ti Kota ngu ti Galilée, na pekoni ala gue na Décapole. Kâ, ala gue na ndo ti mbeni hoto, me gbâ ti azo ague nga na peko ti ala. Azo ni aga na Jésus azo so gere ti ala abuba, awazin, awaziba nga na azo so ayeke sara tënë ape. A zia azo ni na gbele lo, na lo sava ala. Bê ti azo ni adö, na ala mû gloire na Nzapa ti Israël.

Jésus asara mbeni ye so ayeke nde na mbeni koli so ayeke mä ndo ape nga so ayeke sara tënë nzoni ape. Tara ti bâ tongana nyen la dutingo na popo ti gbâ ti azo ni asara koli ni nzoni ape. Peut-être, teti so Jésus abâ so kamene asara koli ni, lo mû lo, lo gue na lo yongoro kete na tere ti azo ni. Na ngoi so ala yeke gi ala use, Jésus afa na lo ye so lo yeke gue ti sara so. Lo yôro maboko ti lo na yâ ti mê ti koli ni, lo tuku ngu ti yanga ti lo, na lo ndu menga ti koli ni. Na pekoni, Jésus angbâ abâ ndo na nduzu na lo tene “Ephphatha,” so aye ti tene, “Zi yâ ti tere ti mo.” Droit, koli ni akomanse ti mä ndo nga ti sara tënë nzoni. Jésus aye ti tene tënë ni so amû ndo ape, ndali ti so lo ye si azo amä na bê na lo na ndo ti ye so ala wani la amä wala abâ na lê ti ala.—Marc 7:32-36.

So Jésus ayeke na ngangu ti sara mara ti amiracle tongaso, a sara ye mingi na ndo ti azo so ayeke lani dä. Ye so asara si “li ti ala kue akpe,” na ala tene: “Lo yeke sara aye kue nzoni. Même lo sara si azo so mê ti ala akanga amä ndo nga azo so yanga ti ala akanga asara tënë.”—Marc 7:37.