තමන්ගේ වාසියට සම්ප්‍රදායන් හදාගෙන හිටිය පරිසිවරුන්ව හෙළාදැකපු යේසුස් දැන් ගෝලයන් එක්ක පිටත් වෙනවා. ඔවුන් ගමන් කරන්නේ වයඹදිගින් පිහිටලා තියෙන ෆිනීෂියාවේ තීර් සහ සීදොන්ට අයත් ප්‍රදේශවලට.

යේසුස් දැන් නිවසකට ඇතුල් වෙනවා. කිසි කෙනෙක් ඒ බව දැනගන්නවාට ඔහු අකමැති වුණත් මිනිසුන්ගේ අවධානයට ලක් නොවී ඉන්න ඔහුට පුළුවන් වෙන්නේ නැහැ. ග්‍රීක පුරවැසිභාවය තිබුණු ෆිනීෂියානු ජාතියට අයත් ස්ත්‍රියක් යේසුස්ව හොයාගෙන ඇවිත් මෙහෙම කියනවා. “දාවිත්ගේ පුත්‍ර වූ ස්වාමීනි, මට අනුකම්පා කරන්න. මගේ දුවට භූතයෙක් ආවේශ වෙලා. ඇය එයින් මහත් සේ පීඩා විඳිනවා.”—මතෙව් 15:22; මාක් 7:26.

ඒක අහගෙන ඉන්න ගෝලයන් “ඇය කෑගසමින් අප පසුපස එනවා. ඇයට යන්න කියන්න” කියලා යේසුස්ට කියනවා. ඇගේ ඉල්ලීම ඉටු නොකරන හේතුව ගැන පැහැදිලි කරන යේසුස් පවසන්නේ “මාව එවන ලද්දේ ඊශ්‍රායෙල් වංශයේ නැති වුණු බැටළුවන් වෙතට මිස වෙන කිසිවෙකු වෙතට නොවෙයි” කියලයි. හැබැයි ඒ ස්ත්‍රිය උත්සාහය අත්හරින්නේ නැහැ. ඒ වෙනුවට යේසුස් ළඟට ඇවිත් දණින් වැටෙන ඇය “ස්වාමීනි, මට උදව් කරන්න” කියා පවසනවා.—මතෙව් 15:23-25.

යුදෙව්වන් වෙනත් ජාතීන්ව පහත් කරලා සලකනවා කියලා දන්න යේසුස්, ස්ත්‍රියට මෙහෙම කියනවා. “දරුවන්ගේ රොටි රැගෙන බලු පැටවුන්ට දැමීම සුදුසු නැත.” (මතෙව් 15:26) සමහරවිට ඔහු එහෙම කියන්න ඇත්තේ ඇයට කොයි තරම් විශ්වාසයක් තියෙනවාද කියලා දැනගන්න වෙන්න ඇති. යේසුස් “බලු පැටවුන්” කියන යෙදුම පාවිච්චි කරපු එකෙන් පැහැදිලි වෙනවා යුදෙව් නොවන අය ගැනත් ඔහුට ලොකු අනුකම්පාවක් තිබුණා කියලා. ඔහු ඒ දේ කියපු විදිහෙන් වගේම ඔහුගේ මුහුණේ ඉරියව්වලින් ඒක හොඳින් පැහැදිලි වෙන්න ඇති.

යේසුස් කියපු දේ ගැන කේන්ති ගන්නවා වෙනුවට ඒ ස්ත්‍රිය නිහතමානීව මෙහෙම කියනවා. “ස්වාමීනි, ඔබ කියන දේ හරි. නමුත් බලු පැටවුන් පවා තම ස්වාමිවරුන්ගේ මේසයෙන් වැටෙන කෑම කනවා නේද?” ඇය මොන තරම් අවංක කෙනෙක්ද කියලා තේරුම්ගන්නා යේසුස් මෙහෙම කියනවා. “ස්ත්‍රිය, ඔබ තුළ තිබෙන විශ්වාසය මහත්ය. ඔබේ කැමැත්ත ලෙස ඔබට වේවා!” (මතෙව් 15:27, 28) දැරිය ඒ අවස්ථාවේදී එතැන හිටියේ නැතත් යේසුස් කියපු විදිහටම ඇය සුව වෙනවා. ස්ත්‍රිය තම නිවසට ගියාම ඇඳේ හාන්සි වෙලා ඉන්න තම දැරියගෙන් “භූතයා පිට වී ඇති බව” දකිද්දී ඇයට මොන තරම් සතුටක් දැනෙන්න ඇද්ද!—මාක් 7:30.

යේසුස් සහ ගෝලයන් දැන් ෆිනීෂියාවේ ඉඳන් දෙකපොලිසයට යනවා. පෙනෙන විදිහට ගලීල මුහුදට උතුරින් යොර්දාන් ගඟ හරහා තමයි ඔවුන් එහෙට යන්නේ. එහෙට ගියාට පස්සේ ඔවුන් කන්දකට නැඟ ගියත් සෙනඟ ඔවුන්ව හොයාගෙන එතැනට එනවා. ඒ අය කොර, අබ්බගාත, අන්ධ සහ ගොළු මිනිසුන්ව යේසුස් ළඟට අරන් ඇවිත් ඔවුන්ව යේසුස්ගේ පාමුල තියනවා. යේසුස් ඒ හැමෝවම සුව කරද්දී විස්මයට පත් වෙන සෙනඟ ඊශ්‍රායෙලයේ දෙවිට ප්‍රශංසා කරනවා.

රෝගීන් අතරේ ඉන්න බිහිරි වගේම කතා කිරීමේ ආබාධයක් තියෙන මිනිසෙකුට යේසුස් වැඩි අවධානයක් දෙනවා. සෙනඟක් අතරේ ඉද්දී ඒ රෝගියා ලොකු අපහසුතාවකින් ඉන්න ඇති! ඔහු ලැජ්ජාවෙන් බයෙන් ඉන්නවා කියලා තේරුණු නිසා වෙන්න ඇති යේසුස් ඔහුව සෙනඟ අතරින් ටිකක් ඈතට ගෙනියන්නේ. ඔහුව සුව කරන්න කලින් යේසුස් ඒ බව ඔහුට දැනෙන්න සලස්වනවා. මුලින්ම යේසුස් ඒ මිනිසාගේ කන්වලට ඇඟිලි දමනවා. ඊටපස්සේ තම ඇඟිල්ලකට කෙළ ගසන යේසුස් ඔහුගේ දිව ස්පර්ශ කරනවා. දැන් යේසුස් අහස දෙස බලා “ඇරෙන්න” කියා පවසද්දී ඒ මොහොතේම ඒ මිනිසාට කතා කිරීමේ හැකියාවත් ඇසීමේ හැකියාවත් ලැබෙනවා. කොහොමවුණත් ඒ ආරංචිය හැමෝම දැනගන්නවාට යේසුස් කැමති වෙන්නේ නැහැ. මොකද යේසුස් කැමති මිනිසුන් කටකතා මාර්ගයෙන් ඔහු ගැන විශ්වාසයක් ඇති කරගන්නවාට නෙවෙයි, ඔහු කරන දේවල් දැකලා ඔහු උගන්වන දේවල් අහලා ඔහු ගැන විශ්වාසයක් ඇති කරගන්නවාටයි.—මාක් 7:32-36.

යේසුස්ට ඒ තරම් දේවල් කරන්න බලයක් තියෙනවා කියලා දකිද්දී ඒ ගැන “අතිශයින් පුදුම” වෙන මිනිසුන් මෙහෙම කතා වෙනවා. “ඔහු බිහිරි අයට ඇසෙන්නත් ගොළු අයට කතා කරන්නත් සලස්වනවා. ඔහු කරන්නේ මොන තරම් හොඳ සේවයක්ද!”—මාක් 7:37.