Yesus ben krutu den Fariseiman fu di den e hori densrefi na gwenti di e tyari wini soso gi den wawan. Baka dati en nanga den disipel fu en e gowe. Den e go na den kontren fu Tirus nanga Sidon na ini Fenisia, di de omeni kilometer na noord-westsei.

Yesus e feni wan oso fu tan, ma a no wani sma sabi taki a de drape. Toku den sma e feni en. Wan Griki uma di gebore na ini a kontren disi e kon na Yesus èn a e begi en: „Masra, Manpikin fu David, abi sari-ati nanga mi. Wan ogri yeye e pina mi umapikin kefalek.”​—Mateyus 15:22; Markus 7:26.

Baka wan pisi ten, den disipel fu Yesus e taigi en: „Seni en gowe, bika a e tan bari na wi baka.” Yesus e taigi den disipel fu san ede a no e poti prakseri na a uma. A e taki: „Gado seni mi go soso na den lasi skapu fu a pipel fu Israel.” Ma na uma no e gi abra. A e kon na Yesus, dan a e boigi gi en èn a e begi en: „Masra, yepi mi!”​—Mateyus 15:23-25.

Soleki fa a sori, dan Yesus wani luku efu na uma abi bribi. A e taki: „A no bun fu teki a brede fu den pikin èn trowe dati gi den pikin dagu” (Mateyus 15:26). Yesus sabi taki den Dyu e si den trakondre sma leki dagu. Ma Yesus no abi a srefi denki leki den Dyu. Den wortu „pikin dagu” e sori taki a lobi den trakondre sma tu. Disi de fu si na en fesi èn na a switi fasi fa a e taki nanga na uma.

Na presi fu ati bron, na uma e gebroiki den srefi wortu fu Yesus èn a e taki nanga sakafasi: „Iya mi Masra, ma toku den pikin dagu e nyan den pikin pisi brede di e fadon komoto na a tafra fu den basi fu den.” Yesus e si taki na uma abi wan krin ati. A e taigi en: „Ai uma, a bribi fu yu tranga. Meki a pasa soleki fa yu wani” (Mateyus 15:27, 28). Na dati e pasa tu. A meisje e kon betre aladi a no de drape! Te na uma drai go na oso baka, a e si taki en umapikin e didon na tapu a bedi. „Na ogri yeye ben komoto na en tapu” èn a no siki moro.​—Markus 7:30.

Baka dati Yesus nanga den disipel fu en e gowe libi a kontren fu Fenisia èn den e go na a sei fu Yordan-liba. Soleki fa a sori, den e abra Yordan-liba na a noordsei fu a Se fu Galilea, dan den e go na a kontren fu Dekapolis. Drape den e go na tapu wan bergi, ma den sma e feni den. Den sma e tyari lan sma, malengri sma, breni sma nanga babaw sma kon na Yesus. Den e poti den siki sma disi na Yesus futusei èn a e dresi den. Den sma e fruwondru fu den sani di Yesus e du èn den e gi a Gado fu Israel glori.

Yesus e poti prakseri spesrutu na wan man di dofu èn di no man taki bun. Prakseri fa a man disi di de na mindri so furu sma e firi. Kande Yesus e si taki a man e syen. Dati meki a e puru a man na mindri den sma èn a e tyari en go na seisei. Te den de den wawan, Yesus e sori a man san a o du gi en. A e poti en finga na ini a man yesi èn baka te a spiti, a e fasi a man en tongo. Dan Yesus e luku go na hemel èn a e taki: „Efata”, san wani taki: „Kon opo.” Wantewante a man e yere èn a e taki bun. Yesus e taigi den sma taki den no musu fruteri trawan fu a tori. A wani taki sma bribi na ini en fu di den srefi si san a e du èn yere san a e taki.​—Markus 7:32-36.

Den sma e „fruwondru srefisrefi” taki Yesus abi a makti fu du den sortu wondru disi. Den e taki: „A du ala sani bun. A e meki dofu sma srefi yere baka èn babaw sma taki baka.”​—Markus 7:37.