Akxni lichuwinanita tuku nitlan tlawamakgo fariseos, Jesús chu xtamakgalhtawakgen tlawankgo lhuwa kilómetros xlakata naʼankgo knoroeste, kkachikin Tiro chu Sidón, nema tapakgsikgo kFenicia.

Jesús tekgsa akgtum chiki niku tlan natawila. Ni lakaskin pi latamanin nakatsikgo niku wi, pero latamanin lakgminkgo asta anta. Chatum puskat nema xnatlatni griegos xwankgonit pero lakachilh kʼuma kachikin, tekgsa Jesús chu tsuku tasaskini: «Kakilakgalhamanti, Malana, xKgawasa David. Kintsumat lu patinama xlakata laktanuma demonio» (Mateo 15:22; Marcos 7:26).

Akxni xtitaxtunita kilhtamaku, xtamakgalhtawakgen Jesús wanikgo: «Kawani pi kaʼalha, xlakata chuntiya tasaskima chu kinkastalaniman». Pero Jesús kawani tuku xlakata ni kuenta tlawani uma puskat: «Dios kimalakgachanit xlakata kajwatiya nakkamakgtaya tiku xalak Israel, tiku litaxtukgo xtachuna xaʼakgtsankgan borregos». Pero puskat ni anta tamakgxtakga. Lakgtalakatsuwi Jesús, tatsokgosta chu tasaskini: «¡Malana, kakimakgtaya!» (Mateo 15:23-25).

Max xlakata Jesús naʼakxilha la xlilhuwa xtakanajla, likgalhti tuku nitlan kalakpuwanikgo judíos latamanin xalak atanu kachikinin: «Ni xlilat natiyakan xkaxtalanchujkan kamanan chu nakamaxkikan laktsu chichi» (Mateo 15:26). Akxni Jesús wan «laktsu chichi», limasiya pi kalakgalhaman tiku ni judíos. Chuna la matsuwi xlakan chu chuna la chuwinan limasiya pi lakgalhamaninan.

Puskat ni lisitsi tuku wanikan, wata taktuju chu maklakaskin tuku Jesús litachuwinan chu wani: «Xlikana, Malana, pero laktsu chichi wakgo xaxpulum nema takta kxmesa xmalanakan». Jesús akxilha pi xlikana kanajla chu wani: «¡Puskat, lu lanka mintakanajla! Kakgantaxtunin chuna la lakaskina» (Mateo 15:27, 28). Chu chuna lay, maski tsumat ni anta wi. Akxni puskat taspita kxchik, aktsu xtsumat ma kputama chu paksnita chu demonio taxtunita (Marcos 7:30).

Jesús chu xtamakgalhtawakgen taxtukgo kFenicia chu patakutkgo kgalhtuchokgo Jordán. Max xlakan patakutkgo kgalhtuchokgo kxnorte pupunu xalak Galilea chu tanukgo kDecápolis. Akxni anta wilakgo, ankgo ksipi, pero latamanin katsikgo niku wilakgo chu linikgo Jesús tiku nila tlawankgo, luntu, lakgatsin chu tiku kgokgo. Kamalakatsuwinikgo chu xla kamapaksa. Latamanin lu kaks lilakawankgo chu tsukukgo malankikgo xDios Israel.

Alistalh, Jesús lu kuenta tlawani chatum chixku tiku akgatapa chu na nila liwana chuwinan. Max uma chixku pekuan xlakata wi kxlakgstipan lhuwa latamanin. Max wa xlakata Jesús lin alakatanu, niku ni lhuwa wilaka, chu akxni xʼakstukan wilakgo masiyani tuku natlawa. Akgaxama chixku chu akxni chujnita, xamani ksimakgat. Alistalh, talakayawa kʼakgapun chu wani «Éffatha», nema wamputun «katalakki». Ama kilhtamaku, chixku tlan kgaxmata chu tsuku chuwinan. Jesús ni lakaskin nalichuwinankan uma milagro xlakata xla lakaskin pi latamanin kakanajlanikgolh xlakata tuku xlakan akxilhkgonit chu kgaxmatkgonit (Marcos 7:32-36).

Litliwakga nema Jesús litlawa milagros lu kaks kamalakawani tiku anta wilakgo. Wankgo: «Putum tuku tlawa, lu tlan. ¡Asta tlawa pi tiku akgatapanin tlan nakgaxmatkgo chu tiku kgokgo tlan nachuwinankgo!» (Marcos 7:37).