Nuumala Yesu waapwapwela aFarisi mwaha wa soolema saya, owo ni awiixutti awe aahikhuma. Yesu aahirowa mpantta onikela epheyo wa mittetthe sa oTiro, oSidoni ni oFenisia.

Yesu aahiphwanya opuro woomaka, nnaamwi aahaaphavela wira atthu esuwele opuro ari awe. Masi atthu yaahisuwela. Muthiyana mmosa muGriki, yoowo aayariwe muttetthe ole aahimphwanya Yesu onamuxonttela wira: “Pwiya, Mwana a Davidi, mukimorele ikharari! Mwan’aka mwamuthiyana ori ni nlaikha na Satana”.​—Matheyo 15:22; Marko 7:26.

Nuumala-vo, awiixutti a Yesu yaahimuleela wira: “Mwireleni envekelawe, ononnyakula anttharelelaka”. Owaakhulaka Yesu aahaaleela nthowa naya aahaamucalela awe oriki: “Miyo nkirumiheliwe w’atthu akina ehikhanle atthu a Isarayeli, ari ntoko ipwittipwitthi sirimenle”. Masi muthiyana ole khooceyale. Owo aahimwaattamela Yesu khukokhora onahimya wira: “Xontte, Pwiya! Mukikhaliherye!”​—Matheyo 15:23-25.

Woonasa wene, eehereryaka waamini wa muthiyana ole, Yesu aahilavula moota aYuda yawoonela aya atthu a maloko makina, oriki: “Khivarenre owakha anamwane yolya, khwarihela axana àlapwa!” (Matheyo 15:26) Mwaha woowaahimya “axana àlapwa”, Yesu aahooniherya wira aanaathokorerya ale yahaakhanle aYuda. Nave aahooniherya eyo mwa enamuna aalavula awe.

Muthiyana ole khaanyoonyiwe, masi aahoona wira waari mwaha wa nthalu aYuda yaarina aya, tivo mowiiyeviha, aahimmye wira: “Ayo, Pwiya! Nto, axana àlapwa yawo annolya itathela simmora vamesa v’axipwiy’aya!” Yesu aahoona wira muthiyana ole aahikhalana murima wooloka, khumuhimeerya wira: “Muthiyana! Wamini wanyu ti wulupale! Mwireliwe emphavelanyu”. (Matheyo 15:27, 28) Nto eyo yaahiiraneya nnaamwi mwanawe aari ottaiwene! Vaavo muthiyana ole aatthikenle awe owaani aahimphwanya mwanawe immaathale ene ni ori ene mukumi, maana “nlaikha nlo nahimuhiya”!​—Marko 7:30.

Okhumaka elapo ya oFenisia, Yesu ni awiixutti awe yaahirowa mpantta mukina wa Muro Yordani. Woonasa wene, yaahilapuwa muro Yordani mpantta onikela epheyo wa Ephareya ya oGalileya arowaka muttetthe wa oDekaapoli. Awo yaahirowa omwaako, masi muttitthi ole waahaaphwanya. Atthu ale yaahimuroihela Yesu, atthu oorakala, yaatuthunya, yahoona ni yahaalavula. Awo yaanaahiya ohoolo wa Yesu wira aapenuxe. Atikinihiwe ene, atthu ale yaahinvuwiha Muluku a Isarayeli.

Yesu aahimoona mulopwana ahiiwa ni ahoona. Tthiri mulopwana ole aahivela-vela ni aahixanka. Nto Yesu aahimuroiha okhwipi wa muttitthi ole. Ori ene ni mulopwana ole, Yesu aahimooniherya wira yookhala aarowa awe opaka. Yesu aahihela ikatha sawe owaruni wa mulopwana ole, khusena, onoottiha nlumi na mulopwana ole. Nuumala-vo Yesu aahiweha wiirimu khuhimya so: “Otthukuwe”. Mulopwana ole aahipacerya wiiwa ni olavula oratteene. Yesu khaaphavela wira mulopwana ole olaleye, maana aaphavela wira atthu amwaaminiki moovarihana ni itthu yaiwa aya ni yoona aya.​—Marko 7:32-36.

Miiriirya sa Yesu saanaavara murima vanceene atthu yaaweha nto “othene yanitikinihiwa”. Awo yaanihimya wira: “Owo ohìra orattene itthu sothene. Ohatthukula màru atthu yahaiwa; ohataphula nlumi atthu yahalavula”.​—Marko 7:37.