Katapos sawayon ni Jesus an mga Pariseo tungod han mga tradisyon nga hira la an nagpapahimulos, binaya hiya upod an iya mga disipulo. Kumadto hira ha rehiyon han Tiro ngan Sidon ha Fenicia, nga damu ka kilometro tipanorte-weste.

Nakabiling hi Jesus hin balay nga mauukyan pero nadiri hiya nga hibaroan han mga tawo nga aadto hiya. Kondi may nakakita la gihapon ha iya. Usa nga babaye nga Griego nga natawo didto hito nga lugar an nakakita ha iya ngan nakimalooy: “Kalooyi ako, Ginoo nga Anak ni David. An akon anak nga babaye ginsaniban hin demonyo ngan ginpapakurian hiya.”—Mateo 15:22; Marcos 7:26.

Waray pag-iha, ginsidngan hi Jesus han iya mga disipulo: “Paiwasa hiya, kay nagsisinunod hiya ha aton nga nagsisininggit.” Iginsaysay ni Jesus kon kay ano nga ginbalewaray niya an babaye: “Ginpakanhi ako diri para ha bisan hin-o kondi para ha nagkawawara nga mga karnero ha panimalay han Israel.” Pero waray umundang an babaye. Dinaop hiya kan Jesus, yinukbo, ngan nakimalooy: “Ginoo, buligi ako!”—Mateo 15:23-25.

Posible nga basi sarihan an pagtoo han babaye, gin-unabi ni Jesus an negatibo nga panhunahuna han mga Judio ha mga tawo nga iba an nasyonalidad: “Diri angay kuhaon an tinapay han kabataan ngan ig-itsa ito ha gudtiay nga kaayaman.” (Mateo 15:26) Ha pag-unabi han “gudtiay nga kaayaman,” o mga tiyô, iginpahayag ni Jesus an iya pagpaid ha mga diri Judio. Sigurado nga iginpakita liwat niya ito pinaagi ha ekspresyon han iya nawong ngan malumo nga tingog.

Imbes nga masina an babaye, hinsabtan niya nga an gin-uunabi ni Jesus amo an diskriminasyon han mga Judio salit mapainubsanon hiya nga nagsiring: “Oo, Ginoo. Pero an gudtiay nga kaayaman nakaon han nahuhulog nga mga pagkaon tikang ha lamesa han ira mga agaron.” Nakita ni Jesus nga maopay an kasingkasing han babaye salit nagsiring hiya: “O Babaye, daku gud an imo pagtoo; matuman unta an imo karuyag.” (Mateo 15:27, 28) Ngan ito gud an nahitabo bisan kon hito nga takna diri upod han babaye an iya anak! Pag-uli han babaye ha ira balay, nakita niya an iya anak nga nahigda ngan natambal na—“ginawas na an demonyo”!—Marcos 7:30.

Tikang ha rehiyon han Fenicia, hi Jesus ngan an iya mga disipulo tinabok ha nasud ngadto ha may igbaw han Salog Jordan. Posible nga tinabok hira ha Jordan ha norte han Dagat han Galilea ngan kinadto ha rehiyon han Decapolis. Didto sinagka hira ha bukid, pero nakita hira han mga tawo. Gindara han mga tawo ngadto kan Jesus an mga piay, baldado, buta, ngan ngula. Ira iginbutang an mga may sakit ha tiilan ni Jesus, ngan iya hira gintambal. Nahipausa an mga tawo salit ira gindayaw an Dios han Israel.

Gintagan ni Jesus hin espesyal nga atensyon an usa nga lalaki nga bungol ngan may diperensya ha pagyakan. Masasabtan mo nga diri hiya komportable samtang nakada hiya ha damu nga tawo. Bangin nakita ni Jesus nga ginkukulba hiya salit iginhirayo niya hiya ha mga tawo. Han hira na la nga duha, iginpakita ni Jesus kon ano an iya bubuhaton ha lalaki. Iginbutang ni Jesus an iya mga tudlo ha talinga han lalaki ngan katapos lumura, iya ginkaptan an dila. Kahuman, humangad hi Jesus ha langit ngan nagyakan ha Semitiko nga pinulongan nga nangangahulogan hin “Maabrihan ka.” Hito nga takna, nakabati utro an lalaki ngan nakayakan hin maopay. Nadiri hi Jesus nga ipanumat ini kay karuyag niya nga an mga tawo tumoo ha iya tungod han ira mismo nakita ngan nabatian.—Marcos 7:32-36.

An gahum ni Jesus ha pagbuhat hin sugad nga panambal may daku nga epekto ha mga nakakita nga “nahipausa gud.” Hira nagsiring: “Urusahon gud an ngatanan nga iya ginbuhat. Gintambal pa ngani niya an mga bungol ngan mga ngula.”—Marcos 7:37.