Ka tsʼoʼok u yaʼalik Jesús maʼ maʼalob le baʼax ku beetik le fariseoʼoboʼ, bin yéetel u disipuloʼob tu jáal u luʼumil Tiro yéetel Fenicia. Yaʼab kilómetros xaman-chikʼin.

Jesuseʼ tu kaxtaj tuʼux u pʼáatal, baʼaleʼ maʼ u kʼáat ka ojéeltaʼak wa tiaʼaniʼ. Kex beyoʼ séeb ojéeltaʼabik. Taal juntúul koʼolel sijnáal Greciaeʼ ka joʼopʼ u yaʼaliktiʼ: «Chʼaʼten óotsilil Yuumtsil, u Paal David, in hijaeʼ okaʼan juntúul demonio tiʼ» (Mateo 15:22; Marcos 7:26).

Maʼ sáameʼ le disipuloʼoboʼ tu yaʼaloʼob tiʼ Jesús: «Aʼaltiʼ ka xiʼik, tumen maʼ tu xuʼulul u taal u yawat t-paach». Jesús túuneʼ tu yaʼalajtiʼ baʼaxten maʼ tu beetik u cuentail: «Teneʼ chéen túuxtaʼaben utiaʼal in wáant le israelitaʼob beyoʼob tamanoʼob saatloʼoboʼ». Baʼaleʼ le koʼoleloʼ maʼ biniʼ. Tu natsʼubaeʼ ka xolaj yiknal Jesús, ka joʼopʼ u kʼáat óoltik: «¡Yuumtsil, áanteniʼ!» (Mateo 15:23-25).

Maʼ xaaneʼ, utiaʼal u yilik Jesús bukaʼaj nojchil u fejeʼ, tu kʼaʼajsajtiʼ bix u yilaʼal le j-táanxel luʼumiloʼob tumen le judíoʼoboʼ: «Maʼ uts ka chʼaʼabak u yoʼoch waaj le paalaloʼob utiaʼal pulbil tiʼ le mejen peekʼoʼoboʼ» (Mateo 15:26). Le tʼaan «mejen peekʼoʼoboʼ» ku yeʼesik bix u yilik Jesús le máaxoʼob maʼ judíoʼoboʼ. Le bix u paakat yéetel le bix úuchik u yaʼaliktiʼoʼ tu yeʼesaj u yaabiltmoʼob.

Le koʼoleloʼ maʼ kʼuuxilnajiʼ, baʼaxeʼ tu seguertaj le baʼax tu yaʼalaj Jesusoʼ, ka tu yaʼalaj yéetel kabal óolal: «Jaaj, Yuumtsil, baʼaleʼ u jaajileʼ le mejen peekʼoʼoboʼ ku jaantkoʼob le u xiixel waaj ku júutul yáanal u mesa u yuumiloʼoboʼ». Jesuseʼ tu tsʼáaj cuenta jach tu jaajil uts u puksiʼikʼaleʼ, ka tu yaʼalajtiʼ: «Koʼolel, jach táaj nojoch a fe; úuchuk le baʼax ta kʼáatoʼ» (Mateo 15:27, 28). Lelaʼ bey úuchik, kex minaʼan u hija tu yiknaloʼ. Ka suunaj tu yotocheʼ tu yilaj u hijaeʼ chilikbal tu cama, tsʼoʼok u yutstal, «le demoniooʼ tsʼokaʼan u jóokʼoltiʼ» (Marcos 7:30).

Jesuseʼ lukʼ yéetel u disipuloʼob tu luʼumil Fenicia, ka binoʼob tu jáal u jaʼil le Jordanoʼ. Maʼ xaaneʼ tu chʼaktoʼob u áalkab jaʼil le Jordán ku pʼáatal tu xaaman u kʼáaʼnáabil Galileaoʼ ka binoʼob tu luʼumil Decápolis. Teʼeloʼ naʼakoʼob yóokʼol junpʼéel puʼuk, baʼaleʼ ilaʼaboʼob tumen le máakoʼoboʼ. Ka tu bisoʼob tu yiknal juntúul máak móoch, kóok yéetel istikyaj u tʼaan. Letiʼobeʼ tu natsʼoʼob yiknal Jesuseʼ ka tu tsʼakaj. Ka tu yilaj le máakoʼob lelaʼ joʼopʼ u tsʼáaikoʼob nojbeʼenil tiʼ u Dios le israelitaʼoboʼ.

Jesuseʼ jach tu chʼaʼaj óotsilil tiʼ le máak kóok yéetel istikyaj u tʼaanoʼ. Chéen máans ta tuukul bix u yuʼubikuba ken yanak ichil yaʼab máakoʼob. Maʼ xaaneʼ Jesuseʼ tu yilaj jach nervioso, ka tu bisaj junpáayil. Ka pʼáatoʼob chéen tu juunaloʼobeʼ, Jesuseʼ tu yeʼesajtiʼ baʼax ken u beete. Tu tsʼáaj u kʼab tu xikin le máakoʼ, túubnajeʼ ka tu machaj u yaakʼ. Paakatnaj teʼ kaʼanoʼ ka tu yaʼalaj: «Jeʼepajkech». U xikin le máak túunoʼ jeʼepaji yéetel páajchaj u tʼaan tubeel. Jesús túuneʼ tu yaʼalajtiʼ maʼ u yaʼalik tiʼ mix máak, tumen u kʼáat ka u tsʼáa u fe le máakoʼob tiʼ letiʼ yoʼolal le baʼaxoʼob ku yilkoʼob yéetel ku yuʼubikoʼob letiʼoboʼ (Marcos 7:32-36).

Le máakoʼoboʼ «jaʼakʼ u yóoloʼob» ka tu yiloʼob le milagroʼob ku beetik Jesusoʼ. Ka tu yaʼaloʼob: «Tuláakal le baʼaloʼobaʼ jach maʼalob úuchik u beetik. Tak le kóokoʼoboʼ ku beetik u jeʼepajal u xiknoʼob yéetel le tootoʼoboʼ ku beetik u tʼaanoʼob» (Marcos 7:37).