Guníʼ si Jesús cadi jneza ca tradición ni rinanda ca fariseu, biree zeʼ ne ca discípulo stiʼ, guzacaʼ stale kilómetru ladu noroeste, ne yendacaʼ Tiro ne Sidón, chupa guidxi ni nuu lu región stiʼ Fenicia.

Bidxela Jesús ti yoo ra guiaana. Qué naʼ Jesús ganna binni paraa nuu, neca zaqué gunna binni paraa nuube ne guyecaʼ ra nuube. Óraque, guyé ti gunaa ni zá de binni griegu peru gule lu región stiʼ Fenicia ra nuube ne ná rabi laabe: «¡Biá naa, Señor, Xiiñiʼ David! Guizáʼ feu modo cayuniná ti demonio xiiñedxaapaʼ» (Mateo 15:22; Marcos 7:26).

Ratu si que, gunabaʼ ca discípulo stiʼ Jesús laa: «Gudxi laabe chebe, purtiʼ nándabe laanu ne cadi cusaana de gucaabe ridxi». Peru bisiene Jesús laacabe xiñee qué naʼ gulabi gunaa que: «Biseendacabe naa ra nuu si ca dendxuʼ ni cananiti stiʼ guidxi Israel». Neca zaqué qué niree gunaa que gana. Bidxíñabe Jesús, biábabe xañee ne gúdxibe laa: «¡Señor, gucané naa!» (Mateo 15:23-25).

Zándaca para guʼyaʼ Jesús pabiáʼ fe napa gunaa riʼ, gúdxibe laa ti cosa ni cadi jneza riníʼ ique ca judíu de binni de sti guidxi: «Cadi jneza diʼ gaxha binni pan ca xiiñiʼ ne gulaa ni lu ca biʼcuhuiiniʼ» (Mateo 15:26). Ra guniʼbe «biʼcuhuiiniʼ», bisihuínnibe riabe ca binni ni cadi judíu. Nánnanu biabe laacaʼ pur modo guniʼbe.

Lugar de nidxiichi gunaa riʼ, biquiiñeʼ ni guníʼ Jesús riʼ ne guca humilde ora bicábibe laa: «Dxandíʼ, Señor, peru ca biʼcuhuiiniʼ rocaʼ bigú ni riaba xaʼnaʼ mexaʼ xpixuaanacaʼ». Bidii Jesús cuenta nayá ladxidóʼ gunaa riʼ ne gudxi laabe: «¡Aque naroʼbaʼ fe stiluʼ xa gunaa! Gaca ni racaláʼdxiluʼ» (Mateo 15:27, 28). Ne bianda xiiñiʼ gunaa que, neca qué guinni dxaapahuiiniʼ que raqué. Ora bibiguetaʼ gunaa que ra lidxi, biiyaʼ nexheʼ dxaapahuiiniʼ stiʼ lu cama maʼ biree demonio que lu xcuerpu ne maʼ nuu nazaaca (Marcos 7:30).

Óraque, biree Jesús ne ca discípulo stiʼ de región stiʼ Fenicia ne zecaʼ neza ra nuu guiiguʼ Jordán. Zándaca gudíʼdicabe lu nisa stiʼ guiiguʼ Jordán, ladu guiaʼ de nisadóʼ stiʼ Galilea para biuucabe ndaaniʼ región ni rábicabe Decápolis. Yendasícabe raqué, gudxíbacabe ti dani, peru bidii ca binni que cuenta paraa nuucabe ne yenecaʼ ca binni nachiitaʼ ñee, ni nabidxi náʼ, ciegu ne ca mudu ra nuu Jesús. Ne gudíxhecaʼ ca binni huará que xañeebe ne bisiándabe laacaʼ. Nabé bidxagayaa ca binni que ne bizulú bisisácacaʼ Dios stiʼ Israel.

Óraque, biiyaʼ Jesús nuu ti hombre ni qué runadiaga ne qué riníʼ chaahuiʼ lade ca binni que. Cumu nuu stale binni raqué la? zándaca cadxibi hombre que. Zándaca pur ngue yené Jesús laabe ti ladu, zituhuiiniʼ de ra nuu ca binni que ne óraque gudxi Jesús laabe xi chiguni. Guluube bicuini nabe ndaaniʼ guiropaʼ chú diaga hombre que ne despué de bichá xhínnibe, gudáʼnabe ludxi. Óraque biiyadxí Jesús guibáʼ ne gudxi laabe: «Éffatha» ni raca significar «bixeleʼ». Oraqueca bixeleʼ diaga hombre que ne bizulú guníʼ. Qué naʼ diʼ Jesús ganna binni milagru riʼ purtiʼ ni racaláʼdxibe nga guni cré binni laabe pur ni gúʼyacaʼ ne ni gunadiágacaʼ (Marcos 7:32-36).

«Nabé bidxagayaa ca binni que» ora bíʼyacaʼ pabiáʼ naroʼbaʼ poder stiʼ Jesús ra biʼniʼ ca milagru que, ne guníʼ ca binni que: «Jneza modo rúnibe guiráʼ ni. ¡Dede ruxhélebe diaga ca ni qué runadiaga ne rusiniʼbe ca mudu!» (Marcos 7:37).