Udul dhanu ma lee ucokiri ibang’ Yesu, kinde ma eni Dekapoli yo nyangu mi nam Galilaya. Gibino kara giwinj ponji pare man kara ekei kumgi; giyeyo cam migi giwotho ko.

Ing’ei saa moko, Yesu uyero ni julubne kumae: “Ngisi benega kum udul dhanu, kum gibedo i bang’a kawono udoko ceng’ adek, ma cam umbe kugi: tek alalugi ya gidok thugi ku kec, gibivoc i yo; ju moko m’i kindgi de giai bor.” Julub gipenje kumae: “I ka ma ngele keni jucopo nwang’u kwen m’ang’ina ma ci yeng’o dhanu maeni kani?”​—Marko 8:2-4.

Yesu uyero kumae: “Wutie ku lungu kwen adi?” Man giwacu ire kumae: “Abiro, ku rec moko ma thindho.” (Matayo 15:34) Yesu ugam ung’olo ni dhanu nia gibed i ng’om. E eting’o kwen man rec, ekwayu Mungu man emie ibang’ julub kara gipoke ni dhanu. Lembe mi zungo madit, dhanu m’ubino keca, niwacu jumaco 4 000 ku mon kud awiya ceke gicamu man giyeng’. Donge m’udong’ gicoko upong’o katoko abiro ma dongo!

Yesu ugam ulalu udul dhanu, ing’eye gimaku yei ku julubne gicidho i Magdala i dhu wat mi ng’ete ma yo reto mi nam Galilaya. Jufarisayo ku Jusadukayo moko gicidh ginwang’u Yesu kuca, man pi nimulo ie, gipenje nia ekenyuth igi giranyutha moko m’uai i polo.

Kinde ma Yesu unyang’ ikum thelembe m’uketho gibepenje, edwoko igi kumae: “Ka piny udoko uthieno, wuwacu kumae, piny bivuto: kum polo bogre. Kugweno wuwacu kumae, piny bibedo rac tinuni kum polo bogre piny de mino. Wung’eyo ng’io wang’ polo; ento wucopo ng’io giranyutha mi nindo ngo.” (Matayo 16:2, 3) Yesu uyero ni Jufarisayo ku Jusadukayo nia m’uweko giranyutha pa Yona, mange ma bimiere igi umbe.

Yesu ku julubne gimaku yei man gicidho i Bethsaida yor i dhu wat mi ng’ete ma yo malu mi nam Galilaya. Kinde ma giwok i gengi, julub gipoi nia giting’o lungu kwen acel kende ma copo romogi ngo. Nwang’u iwang’e nyanok Yesu giai giweco ku Jufarisayo man Jasadukayo ma gitie ju pa Herode; e nimakere ku paru ma giweco iwie, ecimo julubne kumae: “Wubed ku weng’wu, wukuru ni thobi mi Jufarisayo ku thobi pa Herode.” Julub giparu nia nyo ebeyero igi pi kwen ma wigi wil niting’o lee. Ento paru migi ubino rac, pieno kinde ma Yesu unyang’, ewacu igi kumae: “wuporo lembe nedi kum kwen mu mbe?”​—Marko 8:15-17.

Iwang’e nyanok, Yesu uai unyayu cam ni dhanu dupa. Pieno, nwang’u julub gicikiri ngo niparu nia Yesu ubedieng’ nia kwen birem. E epenjogi kumae: “Wupoi de ngo? Kinde m’ang’weko i lungu kwen abic ni dhanu rubanga abic, wucoko padune m’udong’ upong’o katoko adi?” Giwacu kumae: “Apar wi ario.” Yesu  umedo kumae: “[Kinde m’ang’weko i lungu kwen] abiro i kind rubanga ang’wen wucoko padune katoko adi?” Gidwoko kumae: “Abiro.”​—Marko 8:18-20.

Yesu upenjogi kendo kumae: “Wung’eyo ngo nedi ya ayero iwu pi kwen ungo?” Emedo kumae: “wukuru ni thobi mi Jufarisayo ku Jusadukayo.”​—Matayo 16:11.

E julub gigam ginyang’. Ka jukonjo thobi i kwend mukati, ewathu i kwende man ekwode. I lapor maeni, Yesu utio ku thobi pi ninyutho nyoth. Pieno, ebecimo julub nia gibed ku wang’gi ikum “ponji mi Jufarisayo ku Jusadukayo” ma copo ninyothogi.​—Matayo 16:12.