Walja jaqenakaw Jesusar istʼañatakisa qollayasiñatakis Decapolisar jutapjjäna. Galilea Qotat inti jalsu toqeru. Uka jaqenakajja manqʼjja jachʼa canastanakaruw apasinipjjäna.

Mä qhawqha tiempotjja Jesusajj discipulonakapar akham sänwa: “Aka jaqenakat wal sinttʼasta, jupanakajj kimsa urunakaw nayamp chikäjjapjje, janirakiw kuna manqʼañas jupanakan utjkiti. Utanakapar jan manqʼat khitjjerista ukhajja, thak sarkasaw thayjtapjjaspa, yamas yaqhepajj wali jayatwa jutapjje” sasa. Discipulonakapajj sapjjänwa: “¿Aka jaqenakar manqʼayañatakejj kawkitarak maynejj aka chʼusa lugaran tʼantʼa jikjjataspasti?” sasa (Marcos 8:2-4).

Jesusasti sänwa: “¿Qhawqha tʼantʼas utjapjjtam?” sasa. Jupanakasti “paqallq tʼantʼampi mä qhawqha jiskʼa chawllanakampikiw utjapjjetu” sasaw sapjjarakïna (Mateo 15:34). Ukatjja Jesusajj oraqeruw jaqenakarojj qontʼayäna. Uka paqallq tʼantʼampi chawllanakampi aptasajj Diosaruw yuspäräna, ukatjja discipulonakaruw lakirapjjañapatak churäna. Taqenirakiw sistʼasiñkam manqʼapjjäna. Jiltʼanakjja paqallqo jachʼa canastanakaruw phoqa phoq apthapipjjarakïna. Ukanjja 4.000 chachanakaw manqʼapjjäna, warminakas wawanakas utjarakïnwa.

Ukatjja Jesusajj jaqenakar khitanukjjänwa. Boter sarjjatasasti discipulonakapampiw Magadán cheqar sarjjäna, Galilea Qotat inti jalanta toqeru. Ukanwa fariseonakasa saduceonakas Jesusar yantʼañ laykojj alajjpachat mä señal uñachtʼayapjjeta sasin sapjjäna.

Amtanakap yatisajj Jesusajj sänwa: “Niya arumäjje ukhajja, jumanakajj akham sapjjtawa: ‘Alajjpachajj wilakiw kʼajtani, ukhamajj janiw jallojj purkaniti’ sasa. Alwasti akham sapjjaraktawa: ‘Alajjpachajj wilakiw kʼajtani, qenayrantatarakiwa, ukhamasti jichhürojj janiw suma urükaniti, jallu urüniwa’ sasa. Alajjpachajj kunjamäskis ukjja, wal jumanakajj uñchʼukipjjtajja, janirakiw tiemponakan señalanakapsa amuyapktati” sasa (Mateo 16:2, 3). Jesusajj fariseonakarusa saduceonakarusa janiw kuna señalsa uñjapkätati, jan ukasti Jonás profetan señalapakwa uñjapjjäta sasaw säna.

Jesusampi discipulonakapampejj boter sarjjatasajja, Betsaidaruw sarjjapjjäna, Galilea Qotat alay toqeru. Discipulonakajj tʼantʼa apañ armasipjjatapwa sarkasin amuyasipjjäna, mä tʼantʼakiw utjäna. Jesusajj fariseonakampi Herodesar apoyiri saduceonakampi kuntï parlkäna uk amtasajja, akham sasaw discipulonakapar säna: “Fariseonakana ukhamarak Herodesan levadurapat amuyasipjjapunim” sasa. Jupanakajja tʼantʼa armasipkatayna uka toqetsa Jesusajj parlaskaspa ukham amuyapjjäna, uk yatisaw Jesusajj akham säna: “¿Kunatsa jumanakkam tʼantʼat jiskhisisipkta?” sasa (Marcos 8:15-17).

 Jesusajj uka nayrakiw waljanir manqʼayäna, ukhamasti discipulonakajj janiw llakisipjjañapäkänti. Jesusajj sänwa: “¿Janit amtasipkta? Phesqa tʼantʼat pachjasin phesqa waranqa chachanakar manqʼaraykta ukhajja, ¿qhawqha canastanakarus jiltʼanak phoqa phoq apthapipjjayätajja?” sasa. Jupanakasti sapjjänwa: “Tunka payaniruw apthapipjjta” sasa. Jupasti saskakïnwa: “Paqallq tʼantʼat pachjasin pusi waranqa chachanakar manqʼaraykta ukhajja, ¿qhawqha jachʼa canastanakarus jiltʼanakjja phoqa phoq apthapipjjta?” sasa. Jupanakasti sapjjarakïnwa: “Paqallqoruw apthapipjjta” sasa (Marcos 8:18-20).

Jesusasti sarakïnwa: “Janiw nayajj tʼantʼat parlapksmati, ¿janit uk amuyapkta? Antisas fariseonakana ukhamarak saduceonakan levadurapat amuyasipjjam” sasa (Mateo 16:11).

Ukhakiw discipulonakapajj Jesusan arunakap amuyapjjäna. Levadurajj tʼantʼa masar fermentayañatakiw apnaqasi, ukhamajj kunjamsa levadurajj jan waltʼayaspa uka toqetwa parlaskäna. “Fariseonakana ukhamarak saduceonakan [jan waltʼayir] yatichäwinakapat” amuyasipjjañapatakiw Jesusajj ewjjaskäna (Mateo 16:12).