I Dékapôli, limut likeñi li nlo yak Yésu, i pes likôl i tuye Galiléa. Ba nlo emble nye ni le a mbuubaha bo, ba nlona mbôm bisel bi bijek.

Ndi kiki ngéda i yé tagbe, Yésu a nkal banigil bé le: “Me nkon limut ngoo inyule hala a yé dilo daa le ba yé ni me, ndi ba gwé bé yom yo ki yo i je. Ibale me huuha bo njal i mambai map, ba ga kwo i njel inyule bahogi ipôla yap ba nlôl haa.” Banigil ba mbat le: “Hee mut a’ yôñôl bret bi nkola munu ñoñ inyu boñ le i bôt bana bobasôna ba je, ba nuu?”​—Markô 8:2-4.

Yésu a ntimbhe le: “Ni gwé bret gwañen?” Banigil ba ntimbhe le: “Bisaambok, ni ndék bon ba tjobi.” (Matéô 15:34) I mbus, Yésu a nkot limut. A nyoñ bikoga ni tjobi, a soohe Djob, a ti gwo banigil bé le ba kap. Jam li hélha, bôt bobasôna ba nje ba nuu. Bi bi nyégle bi nyon i mbôm bisel to hala kiki dikôô dina di bôlôm, bôda ni boñge ba nje!

I mbus le Yésu a nhuuha limut, nye ni banigil bé ba nyoñ môñgô i Magadan, i hiôñg i ngwañ tuye Galiléa. Nyoo, Farisai lôñni ngim bôt u ntôñ u Sadukai ba noode Yésu, ba mbat nye le a ti yimbne i lôlak i ngii.

Yésu a nyi mahoñol map, a ntimbhe bo le: “I ngéda kôkôa i nkwo, ni nkal le: ‘Kel y’a ba lam yani inyule ngii i nkôyôp,’ ndi kegla, ni nkal le: ‘Lihep ni nop bi mba len inyule ngii i nkôyôp ndi i nkôp ond.’ Ni nyi kobol ngéda inoñnaga ni kiki ngii i nene, ndi ni nla bé kobol biyimbne bi ngéda.” (Matéô 16:2, 3) I mbus, Yésu a ntoñle Farisai ni Sadukai le yimbne to yada i ga tina bé bo, handugi yimbne i mpôdôl Yôna.

Yésu ni banigil bé ba nyoñ môñgô, ba nke i Bétsaida i ñombok i ngwañ tuye. I njel, banigil ba nhoñol le ba nhôya yoñ ngandak bret. Ba gwé ndik bret yada. Mu kiki a nhoñol i jam li mbôñã ipôla nye, Farisai ni Sadukai i i nit Hérôdé, Yésu a mbéhe bo le: “Yiblana mis, ni yoñ ki yihe ni séñha i Farisai lôñni séñha i Hérôdé.” Banigil ba nhôs, ba nhoñol le Yésu a mpôdôl séñha inyu kal le ba nhôya yoñ bret. Mu kiki a ntehe hihôha hiap, Yésu a nkal bo le: “Inyuki ni nomol inyule ni gwé bé bret?”​—Markô 8:15-17.

Hala a yé ndik ndék ngéda le Yésu a ntip jés dikôô di bôt. Jon banigil ba nlama yi le bret bé gwon bi nla héñél Yésu. A mbat bo le: “Baa ni nhoñol ha bé? I ngéda me bi bek bret bitan inyu dikôô di bôlôm ditan, baa ni bi bada bisel gwañen nyonok ni bikét?” Ba ntimbhe le: “Jôm ni biba.” Yésu a nke ni  bisu i kal le: “I ngéda me bi bek bret bisaambok inyu dikôô di bôlôm dina, baa ni bi bada bisel bikeñi gwañen nyonok ni bret?” Bo nye le: “Bisaambok.”​—Markô 8:18-20.

Yésu a mbat bo le: “Lelaa ni nok bé le me pôdhak bé bé inyu bret?” A nkônde le: “Ndi yoña yihe ni séñha i Farisai ni Sadukai?”​—Matéô 16:11.

Sôk i nsôk, banigil ba nok. Ba ngwélél séñha inyu boñ le yom i hôl, ni inyu boñ le flawa i humba. Yésu a yé gwélél séñha kiki yimbne i béba. A mbéhe banigil bé le ba yoñ yihe inyu “biniigana bi Farisai ni Sadukai.”​—Matéô 16:12.