Sran kpanngban be ɔli Zezi i wun wunlɛ Dekapɔlu mɛn’n nun lɔ, Galile Jenvie’n i wia afiliɛ lɔ. Be ɔli kɛ bé kó tíe i ndɛ’n naan ɔ yo be juejue. Kɛ bé kɔ́’n, be sieli be trɔ mun gbogbo dandan wie’m be nun.

Kɛ lika’n ɔli i ɲrun kan’n, Zezi seli i sɔnnzɔnfuɛ’m be kɛ: “Sran kpanngban nga be o yɛ’n, be yo min annvɔ. Afin be o min wun wa w’a di cɛn nsan, yɛ be leman like be dimɛn i kun. Sɛ n yaci be nun naan be fa be klun awe be kɔ’n, bé glɔ́ atin’n nun. Afin be nun wie’m be fin mmua.” Sanngɛ i sɔnnzɔnfuɛ’m be tɛli i su kɛ: “?Lika mmua nga nun’n, é ɲán kpanwun ninfan naan w’a yi sran nga be o yɛ’n be ku?”​—Marki 8:2-4.

Zezi seli be kɛ: “?Kpanwun nɲɛ yɛ ɔ o amun sa nun-ɔn?” I sɔnnzɔnfuɛ’m be tɛli su kɛ: “Kpanwun nso, ɔ nin jue mma kan.” (Matie 15:34) Zezi seli sran mun kɛ be trantran asiɛ wun. Kpɛkun ɔ fali kpanwun nin jue mun, naan w’a la Ɲanmiɛn ase. I sin’n, ɔ bubuli be nun fa mɛnnin i sɔnnzɔnfuɛ mun, yɛ i sɔnnzɔnfuɛ’m be fa mannin sran mun-ɔn. Be kwlaa be dili yɛ be ku yili. Kɛ be isali i sinsin ng’ɔ kali’n, ɔ yili gbogbo dandan nso. Be nga be dili’n, be ti yasua akpi nnan (4.000). Sanngɛ b’a kaman bla nin ba kanngan mun b’a wlaman nun.

I sin’n, Zezi seli sran’m be kɛ be wɔ. Kpɛkun ɔ nin i sɔnnzɔnfuɛ’m be fali alie’n be ɔli Galile Jenvie’n i wia atɔliɛ bue liɛ’n su lɔ, Magadan mɛn’n nun lɔ. Kɛ be juli lɔ’n, Farizifuɛ mun nin Sadisefuɛ’m be wunngeli i wun lɛ kɛ bé sɛ́ i bé nían. Be seli i kɛ ɔ yi atrɛ kun m’ɔ fin ɲanmiɛn su’n kle be.

Zezi wunnin akunndan nga be bu’n i wlɛ naan w’a tɛ be su kɛ: “Kɛ aliɛ ko jɔ’n amun se kɛ, ‘Lika’n wá kpája, afin ɲanmiɛn su lɔ’n blo kɛ sin sa.’ Yɛ nglɛmun’n, amun se kɛ, ‘Lika’n su yoman kpa andɛ, nzue’n wá tɔ́, afin ɲanmiɛn su lɔ’n blo kɛ sin sa, sanngɛ ɔ ti mlanwa.’ Wafa nga ɲanmiɛn su lɔ’n fa ti’n, amun si i nun yiyi. Sanngɛ amun siman blɛ’m be nzɔliɛ’m be nun yiyi. (Matie 16:2, 3) I sin’n, ɔ seli Farizifuɛ nin Sadisefuɛ’m be kɛ sɛ w’a yoman kɛ Zonasi i nzɔliɛ like liɛ’n, be su yoman nzɔliɛ like uflɛ fi kleman be.

Kɛ ɔ yoli sɔ’n, Zezi nin i sɔnnzɔnfuɛ’m be fuli alie’n nun be ɔli Bɛtsaida. Klɔ sɔ’n wo jenvie’n i nglo lɔ bue liɛ’n su. Kɛ bé kɔ́’n, i sɔnnzɔnfuɛ’m be wla fili b’a faman kpanwun kaka. Saan kpanwun kunngba cɛ yɛ ɔ o be sa nun-ɔn. Zezi i wla kpɛnnin yalɛ ng’ɔ nin Farizifuɛ nin Sadisefuɛ nga be o Erɔdu sin’n, be kokoli’n su. Ɔ maan ɔ wlali be su nun kpa kɛ: “Maan amun ɲin tran su. Amun nian amun wun Farizifuɛ’m be kpanwun ayre’n, ɔ nin Erɔdu i kpanwun ayre’n, be lika.” I sɔnnzɔnfuɛ’m be buli i kɛ, kɛ mɔ b’a faman kpanwun’n, i ti yɛ Zezi kannin kpanwun ayre’n i ndɛ’n niɔn. Sanngɛ nɛ́n i sɔ ti yɛ ɔ seli be sɔ-ɔ. Zezi wunnin i sɔ’n i wlɛ naan w’a usa be kɛ: “?Ngue ti yɛ kpanwun mɔ amun lemɛn i’n ti’n, amun su si akplowa-ɔ?”​—Marki 8:15-17.

Kɛ Zezi yili atrɛ mannin sran kpanngban kpa be kpanwun mɔ be dili’n, i osu nin-a cɛman. Ɔ maan, ɔ ti mɔ i sɔnnzɔnfuɛ’m be wun i wlɛ kɛ nán kpanwun m’ɔ nunman be sa nun’n, i ndɛ yɛ ɔ lo Zezi-ɔ. Ɔ usali be kɛ: “?Amun wla w’a fi su? ?Kɛ n bubuli kpanwun nnun’m be nun, mɔ yasua akpi nnun (5.000) be dili’n, i sinsin nga amun isali’n, ɔ yoli gbogbo nɲɛ?” Be tɛli i su kɛ: “Gbogbo blu-nin-nɲɔn (12).” Ɔ seli be ekun kɛ:  “?Yɛ kɛ n bubuli kpanwun nso’m be nun mɔ yasua akpi nnan (4.000) be dili’n, i sinsin nga amun isali’n, ɔ yili gbogbo dandan nɲɛ?” Be tɛli i su kɛ: “Gbogbo nso.”​—Marki 8:18-20.

Zezi usali be kɛ: “?Ɔ yo sɛ ti yɛ amun wunmɛn i wlɛ kɛ nán kpanwun ndɛ yɛ n su kan kle amun’n niɔn?” Kpɛkun ɔ kan guali su kɛ: “Amun nian amun wun Farizifuɛ nin Sadisefuɛ’m be kpanwun ayre’n i lika.”​—Matie 16:11.

Kɛ Zezi kɛnnin i sɔ’n, i sɔnnzɔnfuɛ’m be wunnin i ndɛ’n i wlɛ weiin. Afin kɛ be fa kpanwun ayre be guɛ i sanmlɛn tɔlɛ nun’n ɔ ɲan, kpɛkun ɔ wla. Ɔ maan kpanwun ayre nga Zezi kɛnnin i ndɛ’n, ɔ ti like sacilɛ nzɔliɛ. Ɔ maan Zezi su se be kɛ be nian be wun “like nga Farizifuɛ mun nin Sadisefuɛ’m be kle’n, i lika.” Afin ɔ saci sran’m be ti nun.​—Matie 16:12.