Jama bôt a te mane suane vôme Yésus a ne abôta si ya Décapole, Mañ ya Galilée mfa’a ya est. Ba te zu vô’ôlô nye a saéban, be nga so beta minkoé be bili bidi be nga naan.

Ve, éyoñ éyoñ é lôteya, Yésus a jô beyé’é bé na: “Ma wô’ô bôte bana éngôngo amu bia be be bi ntoo den melu mela, ve be nji bi jôme ya di. Nge ma suu be na be bulane menda map, zaé e mebum, ba ye ke ba ku som e zene zen. Amu bevo’o ya été ba so ôyap.” Beyé’é ba sili nye na: “E môt a ne ve abim abui bôte dina bidi, e fé été va, bi mane yiane be, a ye so vé?”​—Marc 8:2-4, Mfefé Nkôñelan.

Yésus a sili be na: “Mi bili belet [tañeya]?” Beyé’é ba yalane na: “Zangbwal a tyôtyoé kos.” (Matthieu 15:34, Mfefé Nkôñelan) Ane Yésus a bo bôte na be tabe si. A nyoñe belet a kos, a ve Zambe akéva, a ve bie beyé’é bé na be ve bôt. Jame ya kam é ne na, bese ba di a jaé. Mebuka’a ba kôane ma jalé minkoé zangbwal, a too ki na bôte 4 000, te lañe binga a bon, ba te di a jaé!

Éyoñ a suu ékôane bôt, Yésus ba beyé’é bé ba tyi’ilan a éfunga akekui Magadan, e ouest ya Mañ ya Galilée. E wôé, Bepharisien fufulu a Besadducéen ba zu ve’ele Yésus, be jô’ô nye na a liti be ndeme ja so yôp.

Éyoñ a yemelaneya nsôñane wop, Yésus a yalane na: “Éyoñe ngô’é é kuiya, mia jô na: Éyoñ é ne abeñ amu yôp é ne évele; mametyé ke na: Den, nkulu a ye vuñ, amu yôp e ne ane évele ane ékukut: nde mia yeme yemelan avale yôp e né, ve mendeme ya biyoñ, mi te ngule ya yemelane me!” (Matthieu 16:2, 3, Mfefé Nkôñelan) E nde ñhe, Yésus a jô Bepharisien ba Besadducéen na, teke ndem éziñe ja ye vebane be be ane ô vaa ve nyi Yonas.

Yésus a beyé’é bé ba dañ éfunga a ke mfa’a ya Bethsaïda e nord-est e kindi’i ya mañ. E zene zañ, beyé’é ba yemelane na ba te vuane nyoñ abui belet. Be bili fo’o ve belete jijia. A lat a jam e ndôme lôt e zañe ba bôte ba su’u Hérode: Bepharisien a Besadducéen, Yésus a ve abendé a jô’ô na: “Mi kale’e, tuka’a tabane ntye a mvusu Bepharisien a nyô Hérode.” Beyé’é ba kop amu ba simesane na a kobô ajô mvusu amu ba te vuane nyoñe belet. Éyoñ a yemeya ékobe jap, Yésus a jô be na: “Amu jé mia ke mia fas a kobô na mi nji bi belet?”​—Marc 8:15-17, Mfefé Nkôñelan.

Yésus a ndôme mane ve betoyini be bôte belet. Nde ñhe, beyé’é be Yésus ba yiane yeme na, a bili ki ajô éziñ a njembane belet. A jô be na: “Ye mi ne te [simesane]? Éyoñe me nga be’e belet étan asu bôte 5 000, minkoé mi afufus tañeya mi nga ke mie njalan?” Ba yalane na: “Awôm a mibaé.” Yésus a beta sili be na: “Éyoñe ke me nga be’e belet zamgbwa asu bôt toyini ényin, mi nga kee minkoé bitune  mebuka’a, tañ aya? Ba yalane na: “Zamgbwa.”​—Marc 8:18-20, Mfefé Nkôñelan.

Yésus a sili na: “Mia kate wô’ô aya na me nji kobô mia ajô belet?” A beta jô na: “Ba’alane miabebien mfa’a ya mvusu Bepharisien a Besadducéen.”​—Matthieu 16:11, Mfefé Nkôñelan.

Beyé’é ba su’ulane wô’ô jam a jô. Ba belane mvusu asu na belet é veñesan a na é vus. Yésus a belane mvusu ane ndeme ya ébotezel. A ve beyé’é bé abendé na, be tabe ntyel a medu’ane ma so “ñye’elane Bepharisien a Besadducéen.”​—Matthieu 16:12, Mfefé Nkôñelan.