En kantite dimoun in vin kot Zezi dan rezyon Dekapol ki dan les Lanmer Galile. Zot in vin ekout li e ganny geri. Zot in osi vin avek bann gran pannyen ki zot abitye met manze ladan.

Me pli tar, Zezi i dir son bann disip: “Mon leker i fermal ler mon vwar sa lafoul, parski i fer trwa zour depi ki zot avek mwan e zot napa nanryen pour manze. Si mon anvoy zot se zot lafen, zot pou tonm feb dan semen e serten parmi zot i reste lwen.” Me son bann disip i dir li: “Kote nou pou al ganny ase dipen dan sa landrwa izole pour donn manze tou sa dimoun?”​—Mark 8:2-4.

Zezi i demande: “Konbyen dipen zot annan?” Bann disip i reponn: “Set ek detrwa pti pwason.” (Matye 15:34) Apre sa, Zezi i fer bann dimoun asiz ater. I pran dipen ek pwason, priy Bondye e apre i donn son bann disip pour zot distribye. Sa ki etonan, se ki tou dimoun i manze vant plen. Zot ranpli set gran pannyen avek sa ki reste, menm si i annan apepre 4,000 zonm ensi ki madanm ek zanfan ki’n manze!

Apre ki Zezi in fer bann dimoun ale, li ek son bann disip i pran kannot e al dan rezyon Magadann ki lo kote Lanmer Galile, lo lakot was. La bann Farizyen ansanm avek serten manm sa sekt Sadiseen i esey teste Zezi e demann li pour donn zot en siny sorti dan lesyel.

Zezi i realize ki zot pe esey fer, alor i dir: “Ler fernwanr pe fer, zot dir, ‘I pou fer botan demen akoz lesyel i rouz’ e dan bomaten zot dir, ‘I pou fer fre ozordi e lapli pou tonbe, parski lesyel i rouz me i sonm.’ Zot get bann siny dan lesyel e zot konn predir letan me zot pa kapab enterpret bann siny sa letan ki zot pe viv ladan.” (Matye 16:2, 3) Apre Zezi i dir bann Farizyen ek Sadiseen ki zot pa pou ganny okenn siny apard ki siny Zonas.

Zezi ek son bann disip i anbark dan en kannot e al ver Betsayda ki lo lakot nordes Lanmer Galile. Ler zot pe ale, bann disip i realize ki zot in oubliye anmenn ase dipen. Zot annan zis en dipen. Zezi pe mazin sa ki fek arive avek bann Farizyen ek bann Sadiseen ki siport Erod, alor i averti zot: “Gard zot lizye ouver e fer atansyon lelven bann Farizyen ek lelven Erod.” I paret ki bann disip i krwar ki Zezi pe refer avek lefet ki zot in oubliye anmenn dipen ler i mansyonn lelven. Zezi i realize ki zot in mal konpran e i dir zot: “Akoz zot pe argimante lo lefet ki napa dipen?”​—Mark 8:15-17.

Pa tro lontan pase, Zezi ti donn plizyer milye dimoun dipen. Alor bann disip i devret konnen ki Zezi pa enkyet akoz napa ase dipen. I demann zot: “Eski zot pa rapel ler mon  ti kas sa senk dipen an morso pour donn sa 5,000 zonm, ki kantite restan manze zot ti anmase dan bann pannyen?” Zot reponn: “Douz.” Zezi i osi dir zot: “Ler mon ti kas sa set dipen an morso pour sa 4,000 zonm, ki kantite manze zot ti anmase dan bann gran pannyen?” Zot reponn: “Set.”​—Mark 8:18-20.

Zezi i demande: “Akoz zot pa’n konpran ki mon pa ti pe koz avek zot lo dipen”? Alor i dir: “Fer atansyon lelven bann Farizyen ek Sadiseen”.​—Matye 16:11.

Finalman, bann disip i konpran sa ki Zezi pe esey dir. Lelven i ganny servi dan fermantasyon e i fer dipen monte. La Zezi pe servi lelven pour reprezant sa ki mal. I pe averti bann disip konsernan “lansennyman bann Farizyen ek Sadiseen” ki kapab annan en move lefe lo bann dimoun.​—Matye 16:12.