A uanao aomata ake a ibetutu i rarikin Iesu n aonon Tekabori, n iteran Namani Kariraia are mai mainiku. A roko bwa a na ongora ao ni kamarurungaki irouna, ao a uotii aia bwaene aika bubura, ke bwaene ibukini nnen aia tianaki.

Ma imwina riki ao e a tuangia taan rimwina Iesu ni kangai: “I rangi n nanoangaiia te koraki aei bwa aia katenibong aei n tiku i rarikiu ao akea kanaia, ao ngkana I kaokiia nakoni mwengaia ma te baki, ao e na akea korakoraia i aoni kawaia. Ao a bon roko tabeman mani kaawa aika raroanako.” A titiraki taan rimwina ni kangai: “E na kangaa te aomata ni kona ni karekea te kariki ae a na ngae iai te koraki aei, ngkai e raroanako te tabo aei?”​—Mareko 8:2-4.

E kaeka Iesu ni kangai: “Mwaitira te kariki ane iroumi?” A taku taan rimwina: “Itiua ao tabeman iika aika uarereke.” (Mataio 15:34) Imwina ao e tuangia aomata bwa a na tekateka i aontano. E anai kariki ao iika, e tataro nakon te Atua, ao e angania taan rimwina bwa a na tibwatibwai. E kamimi bwa a bane n amwarake ao n rauaki. A rikoaki nikiran amwarake ao a on iai itikora bwaene n tianaki aika bubura, ma e ngae n anne, a bane n amwarake iai tao 4,000 mwaane, ao aine ma ataei naba!

Imwini kanakoaia te koraki iroun Iesu, ao e a nako ma taan rimwina n te booti nako Maketara ae mena i maeaon Namani Kariraia. A mena iai Baritaio ae a iraki naba irouia tabeman kaain te Aro n Tarukaio, ao a kataia ni kataa Iesu ao n tuangnga bwa e na kaota te kanikina mai karawa.

E ataa aia iango Iesu ao e a kaeka ni kangai: “Ngkana e moantairiki ao kam kangai, ‘E na raoi, bwa e uraura karawa,’ ao n te moaningabong, ‘E na kamwaitoro te bong aei ma ni kakarau, bwa e uraura n roo karawa.’ Kam rabakau ni kabwarabwaraa taraani karawa, ma kam aki kona ni kabwarabwaraa kanikinaean taai aikai.” (Mataio 16:2, 3) Imwina e a tuangia Baritaio ma Tarukaio bwa akea te kanikina ae a na anganaki ma tii ana kanikina Iona.

E a toka n te booti Iesu ma taan rimwina ao ni kaineta Betetaita are mena i meangimainiku i rarikin taari. I aoni kawaia ao a a tibwa ataia taan rimwina ae a mwaninga n uota te kariki ae tau. Bon tii teuana irouia. E uringa ngkoa ana maroro Iesu ma Baritaio ao Tarukaio ake taani boutokaa Erote ao e anga te kauring ni kangai: “Kam na teimatoa n taratara, ao kawakiningkami man aia iiti Baritaio ao ana iiti Erote.” E kairua aia iango taan rimwina bwa a iangoia bwa taekinan te iiti irouna e kaineti ma aroia ni mwaninga n uakariki. E taku Iesu n ataakini kairuaia anne: “E aera ngkai kam kaun­tae­kaa ae kam aki uakariki?”​—Mareko 8:15-17.

E a tibwa tia Iesu n anga te kariki nakoia nga ma nga aomata. Ngaia are a riai n ataia taan rimwina bwa e aki tabeaianga n akean te kariki. E titiraki ni kangai: “Kam aki uringa ngkoa are I bwenauai kariki ake nimaua ibukia mwaane aika 5,000, ao irakora ngkoa bwaene ake a on n nikira n amwarake?” A kaeka ni kangai: “Tengauni ma uakora.” E reitia Iesu ni kangai: “Ao ngke I bwenauai kariki ake itiua ibukia mwaane ake 4,000, irakora ngkoa bwaene aika bubura ake a on n nikira n amwarake ake a ikotaki?” A kaeka ni kangai: “Itikora.”​—Mareko 8:18-20.

E titiraki Iesu ni kangai: “E aera ngkai kam aki ataa ae I aki taekini kariki nakoimi?” E reitia ni kangai: “Kam na kawakiningkami man aia iiti Baritaio ao Tarukaio.”​—Mataio 16:11.

N tokina ao a a tibwa ota raoi taan rimwina. E kabonganaaki te iiti ibukini karaoan te bwai ae kamanging ao ibukini karikirakean te bua ni burawa. E kabongana te iiti ikai Iesu bwa e na tei ibukin te buakaka. Ao e anga te kauring nakoia taan rimwina bwa a na kawakinia “man aia reirei Baritaio ao Tarukaio,” bwa e karikirakea te buakaka.​—Mataio 16:12.