Mayuh orang datai ngagai Jesus ba Dekapolis, ke bisi ba begian timur Danau Galili. Sida deka ninga ajar iya sereta deka digeraika iya. Maya nya, sida datai mai bakul ti besai ke penuh enggau utai ke diguna sida.

Pengudah beberapa hari, Jesus madah ngagai bala murid iya: “Kasih aku meda sida. Sida udah tiga hari enggau aku, lalu nadai utai diempa. Enti aku ngasuh sida pulai enggau perut lapar, sida engka luput ba rantau jalai, lalu sekeda ari sida datai ari endur ti jauh.” Tang ku bala murid iya: “Endur tu jauh, dini alai kami ulih ngiga roti ti chukup ke orang mayuh tu?”—Mark 8:2-4.

Jesus madah ngagai bala murid iya: “Kita bisi berapa iti tuku roti?” Ku sida nyaut: “Tujuh iti, enggau beberapa iku ikan ti mit.” (Matthew 15:34) Udah nya, Jesus ngasuh orang duduk ba tanah. Jesus ngambi semua roti enggau ikan nya. Iya besampi meri terima kasih sereta mechahka roti nya, lalu meri ngagai bala murid iya. Sida lalu nyadung pemakai nya ngagai bala mayuh. Semua orang makai sampai kenyang. Teda pemakai ke digumpul ngemenuhka tujuh iti bakul ti besai. Pemayuh orang ke makai nya 4,000 iku lelaki, tu enda nyengkaum sida ke indu enggau bala anak mit!

Pengudah Jesus ngasuh orang mayuh pulai, iya enggau bala murid iya nepan perau ngagai menua Magadan, ke bisi ba begian barat Danau Galili. Orang Parisi enggau orang Saduki datai ngagai Jesus laban deka nguji iya. Sida minta iya ngayanka siti tanda ari Petara.

Jesus nemu niat ati sida. Ku Jesus: “Lebuh hari nyau lemai, kita nyebut, ‘Manah hari pagila, laban langit mirah.’ Lalu lebuh pagi hari kita nyebut, ‘Ka ujan hari tu, laban langit mirah sereta petang laban mua hari.’ Kita nemu madahka gaya hari ari utai ti dipeda kita ba langit, tang kita enda nemu nerangka tanda utai ke nyadi diatu.” (Matthew 16:2, 3) Udah nya, Jesus madah ngagai orang Parisi enggau orang Saduki, nadai tanda deka diberi ngagai sida kelimpah ari tanda Jonah.

Udah nya, Jesus enggau bala murid iya nepan perau ngagai Betsaida, ba begian timur laut Danau Galili. Maya nya, bala murid Jesus nyau nemu, sida bisi setuku roti aja. Ba maya ti sama, Jesus teingatka baru pasal orang Parisi enggau Saduki ke betemu enggau iya sebedau tu. Nya alai, iya meri jaku tangkan ngagai bala murid iya: “Bejimat sereta bejaga ari ragi orang Parisi enggau ragi Herod.” Bala murid Jesus enda mereti utai ke disebut Jesus. Sida ngumbai Jesus ngerara sida ketegal enda ingat mai roti. Nyadi Jesus madah ngagai sida: “Nama kebuah kita bekelikuh pasal nadai mai roti?”—Mark 8:15-17.

Jesus baru aja meri beribu iku orang makai. Nya alai, bala murid Jesus patut nemu iya enda  irau pasal pemakai. Iya nanya sida: “Kati kita enda ingat? Lebuh aku mechahka lima iti tuku roti ke 5,000 iku lelaki, berapa bakul teda digumpul kita?” Sida nyaut: “Dua belas.” Jesus nanya agi: “Lebuh aku mechahka tujuh iti tuku roti ke 4,000 iku lelaki, berapa bakul besai teda digumpul kita?” Sida nyaut: “Tujuh.”—Mark 8:18-20.

Jesus nanya sida: “Nama kebuah kita lalu enda mereti? Aku ukai bejaku pasal roti. Aku bejaku pasal kita ke patut bejaga ari ragi orang Parisi enggau ragi orang Saduki.”—Matthew 16:11.

Pengujung iya, bala murid Jesus faham utai ke disebut iya. Ragi dikena ngambika ngasam pemakai, lalu ulih ngasuh roti nyadi kembai. Nyadi, ragi ngambarka kesan jai ketegal pengawa orang Parisi enggau orang Saduki. Nya alai, Jesus meri jaku tangkan ngagai bala murid iya ngambika bejimat ari ‘ajar orang Parisi enggau orang Saduki.’—Matthew 16:12.