58-تاراۋ
ناندى كوبەيتتى جانە اشىتقىدان ساقتاندىردى
ماتاي 15:32—16:12 مارقا 8:1—21
-
يسا 4000 ەر كىسىنى تاماقتاندىردى
-
پارىزشىلداردىڭ اشىتقىسىنان ساقتاندىردى
عاليلەيا تەڭىزىنىڭ شىعىس بەتىندەگى دەكاپوليس وڭىرىنە يسانى تىڭداۋ ٷشىن جانە ساۋىعۋ ٷشىن قالىڭ جۇرت جينالدى. ولار ازىق-اۋقاتتارىن ۇلكەن سەبەتتەرگە سالىپ الا كەلدى.
ٴبىراز ۋاقىت وتكەن سوڭ، يسا شاكىرتتەرىنە بىلاي دەدى: «حالىقتى اياپ تۇرمىن، قاسىمدا جۇرگەندەرىنە ٷش كۇن بولدى، ال جەيتىن ەشتەڭەلەرى جوق. ولاردى ۇيلەرىنە اش كۇيىندە جىبەرسەم، جولشىباي السىرەپ قالار. كەيبىرى الىس جەردەن كەلگەن عوي». شاكىرتتەرى وعان: «وسى ەلسىز جەردە ولارعا جەتەتىن نان قايدان تابىلسىن؟!»— دەپ جاۋاپ بەردى (مارقا 8:2—4).
يسا: «قانشا ناندارىڭ بار؟»— دەپ سۇراعاندا، شاكىرتتەر: «جەتى نان، بىرنەشە كىشكەنە بالىق»،— دەپ جاۋاپ بەردى (ماتاي 15:34). سوسىن ول جۇرتقا جەرگە جايعاسۋدى بۇيىردى دا، قولىنا ناندار مەن بالىقتاردى الدى. قۇدايعا ريزاشىلىق بىلدىرگەن سوڭ، شاكىرتتەرىنە بەرە باستادى. ال ولار جۇرتقا ۇلەستىردى. ٴبارى تويعانشا جەدى. كەيىن ارتىلعانىن جيناپ العاندا، ۇلكەن جەتى سەبەت بولدى. تاماقتانعانداردىڭ سانى، ايەلدەر مەن بالالاردى قوسپاعاندا، 4000 ەر كىسى ەدى!
بۇدان سوڭ يسا حالىقتى تاراتىپ جىبەردى. ٶزى شاكىرتتەرىمەن قايىققا وتىرىپ، عاليلەيا تەڭىزىنىڭ باتىسىنداعى ماگادان ايماعىنا ٴجۇزىپ كەتتى. سول جاقتا يساعا ساددۋكەيلەردىڭ ٴدىني توبىنىڭ بىرنەشە مۇشەسىمەن بىرگە پارىزشىلدار كەلدى. ولار ونى سىناماق بولىپ، كوكتەن بەلگى كورسەتۋىن تالاپ ەتتى.
ولاردىڭ ارام ويىن بىلگەن يسا بىلاي دەدى: «كەش تۇسكەندە ادەتتە سەندەر «كۇن اشىق بولادى، ويتكەنى اسپان قىپ-قىزىل» دەيسىڭدەر، ال تاڭەرتەڭ «بۇگىن كۇن سۋىق ٵرى جاڭبىرلى بولادى، سەبەبى اسپان قىپ-قىزىل بولعانمەن، بۇلىڭعىر ەكەن» دەيسىڭدەر. سەندەر اسپان قۇبىلىستارىن تۇسىندىرە الاسىڭدار، ٴبىراق بۇل ۋاقىتتىڭ بەلگىلەرىن تۇسىندىرە المايسىڭدار» (ماتاي 16:2، 3). وسى سوزدەردەن كەيىن ول پارىزشىلدار مەن ساددۋكەيلەرگە ٴجۇنىس پايعامباردىڭ بەلگىسىنەن باسقا بەلگى كورسەتىلمەيتىنىن ايتتى.
سوسىن يسا شاكىرتتەرىمەن قايىققا وتىرىپ، تەڭىزدىڭ سولتۇستىك-شىعىسىنداعى بەتسايداعا ٴجۇزىپ كەتتى. جولدا شاكىرتتەر نان الۋدى ۇمىتىپ كەتكەندەرىن، ٴبىر ناننان باسقا جەيتىن ەشتەڭەلەرى جوق ەكەنىن بايقادى. يسا پارىزشىلدار مەن يرودتى جاقتايىن ساددۋكەيلەرمەن بولعان كەزدەسۋگە مەڭزەپ، شاكىرتتەرىنە: «بايقاڭدار، پارىزشىلداردىڭ اشىتقىسى مەن يرودتىڭ اشىتقىسىنان ساق بولىڭدار!»— دەپ ەسكەرتتى. سوندا شاكىرتتەر اشىتقى جايلى اڭگىمە نان الۋدى ۇمىتقاندىقتان تۋىنداپ وتىر دەپ ويلادى. يسا ولاردىڭ تۇسىنبەگەنىن بايقاپ: «نەمەنەگە نانىمىز جوق دەپ ايتىسىپ جاتىرسىڭدار؟»— دەپ سۇرادى (مارقا 8:15—17).
يسا جاقىندا عانا مىڭداعان ادامعا تويعانشا نان بەرگەن بولاتىن. سوندىقتان شاكىرتتەر ونىڭ جەيتىن ناندى ۋايىمداپ تۇرماعانىن ٴتۇسىنۋ كەرەك ەدى. يسا: «بەس ناندى 5000 ەر كىسىگە سىندىرىپ بەرگەنىمدە، ارتىلعانىنان قانشا سەبەت جيناپ ەدىڭدەر؟»— دەپ سۇراعاندا، شاكىرتتەر: «ون ەكى»،— دەپ جاۋاپ بەردى. سوسىن: «ال جەتى ناندى 4000 ەر كىسىگە سىندىرىپ بەرگەنىمدە، ارتىلعانىنان قانشا ۇلكەن سەبەت تولتىرعان ەدىڭدەر؟»— دەپ سۇراعاندا، ولار: «جەتەۋ»،— دەپ جاۋاپ بەردى (مارقا 8:18—20).
سوندا يسا: «سەندەرگە نان تۋرالى ايتپاعانىمدى قالايشا تۇسىنبەيسىڭدەر؟»— دەدى. ارتىنشا: «پارىزشىلدار مەن ساددۋكەيلەردىڭ اشىتقىسىنان ساق بولىڭدار»،— دەپ قوستى (ماتاي 16:11).
اقىرىندا شاكىرتتەر يسانىڭ نە ايتقىسى كەلگەنىن ٴتۇسىندى. اشىتقى قامىردى كوتەرۋ ٷشىن قوسىلادى. سوندىقتان يسا ونىڭ بۇزاتىن قاسيەتىن بەينەلى ماعىنادا قولدانىپ، شاكىرتتەرىن «پارىزشىلدار مەن ساددۋكەيلەردىڭ ىلىمىنەن» ساقتاندىرعان ەدى (ماتاي 16:12).
