Ndong’ayingi izidi kwa Yesu muna zunga kia Dekapole, kuna este ya Mbu wa Ngalili. Bezidi wá malongi mandi yo wukwa. Banete yitunga yanene yovo mbangu zilundilwanga madia.

Kansi, kuna kwalanda, Yesu ovovese alongoki andi vo: “Mfwididi ndonga e nkenda, kadi lumbu tatu banangini yame, ke bena ye má kia dia ko. Avo ibasindikidi ye nzala muna nzo zau, mfune befwa muna nzila, akaka muna yau kwanda batukidi.” Alongoki andi banyuvuidi vo: “Akweyi tubakila e mbolo zafwana ziyukutisa ndonga yayi?”—Maku 8:2-4.

Yesu ubayuvuidi vo: “Mbolo kwa nuna zau?” Bavutwidi vo: “Mbolo nsambwadi ye nzonzi zakete.” (Matai 15:34) I bosi, Yesu olombele kwa nkangu wavuanda vana titi. Obongele mbolo ye mbizi osambidi kwa Nzambi, i bosi ovene zo kwa alongoki bakayanesa. Dia sivi mu mona vo yau awonso badidi yo yukuta. Kana una vo tezo kia 4.000 ma akaka ye akento yo wana babidi e mbolo, bakutikidi e nkesona zisuvidi, bazadisi yitunga nsambwadi yanene.

Yesu osindikidi e ndonga, oyandi ye alongoki andi bakotele mu nzaza bele kuna Mangadane, kuna weste a simu dia Mbu a Ngalili. Vava balweke ko, Afarisi ye akaka muna esi dibundu dia Asaduki balekele Yesu ntambu, banlombele kabasonga sinsu kituka kuna zulu.

O Yesu wau kazeye makani mau mambi, ubavutwidi vo: “Muna nkokela nuvovanga vo, ‘O kuma kwambote kukala, kadi e zulu dibueke,’ muna mene vo, ‘O unu o kuma kwambi kukala, kadi e zulu dibueke yo yitalala.’ Oyeno nuzeye bakula e mpw’a zulu, kansi e sinsu ya tandu ke nulenda yo bakula ko.” (Matai 16:2, 3) I bosi Yesu ovovese Afarisi ye Asaduki vo kekubasonga kana sinsu kimosi ko, nanga sinsu kia Yona kaka.

O Yesu ye alongoki andi bakotele muna nzaza bele kwau kuna Betesaida, kuna node ya simu dia mbu. Wau bekwendanga, alongoki basungamene vo ke banete mbolo zayingi ko. Mbolo imosi kaka bena yau. O Yesu ekolo keyindulanga e ntantani kakele zau ye Afarisi ye Asaduki ana beyikamanga Herode, olukisi alongoki andi vo: “Nulungalala; nuyikenga ye mfuna ya Afarisi ye ya Erodi.” Alongoki bayindwidi vo wau ke banete mbolo zayingi ko i dianu Yesu kavovele mfuna. O Yesu wau kabakwidi o vilwa wa alongoki andi, ubavovese vo: “Ekuma nutantanenanga wau ke nuna ye mbolo ko? Yamu wau ke nuzeye wo kaka ko yo lembi bakula e?”—Maku 8:15-17.

Ke vaviokele lumbu yayingi ko tuka Yesu kadikidi e mbolo kwa mafunda ma wantu. Dianu vo, alongoki bafwete dio zaya vo Yesu kena tokanena mbolo ko. Ubayuvuidi vo: “Nga ke nusungamene ko vava yabukunwina 5.000 ma akala e mbolo tanu, yitunga kwa ya nkesona nwakukita?” Bamvutwidi vo: “Kumi ye zole.” Yesu ukudikidi vo: “Vava yabukunwina 4.000 ma akala e mbolo nsambwadi, yitunga kwa yanene ya nkesona nwakutika?” Bamvutwidi vo: “Nsambwadi.”—Maku 8:18-20.

Yesu ubayuvuidi vo: “Ekuma nulembele bakulwila vo kinuvovese oma ma mbolo ko?” Ovovele diaka vo: “Nuyikenga ye mfuna ya Afarisi ye Asaduki.”—Matai 16:11.

Owau, alongoki babakwidi e nsas’a diambu. E mfuna isadilwanga muna funisa mbumba ye mu vanga mbolo. Muna moko kiandi, Yesu osadidi e mfuna se sinsu kia luvunginiku. Olukisi alongoki andi bayikenga muna “malongi ma Afarisi ye Asaduki,” kadi wantu mevunginikanga.—Matai 16:12.