Bantu ba bungi menemene bakaya kudi Yezu ku buloba bua Dekapoli ku est kua Mbuu wa Galela. Bavua balue kumuteleja ne kuondopibua, balue ne bisaka binene bia biakudia.

Kadi mu kupita kua matuku, Yezu wakambila bayidi bende ne: “Ndi ngumvuila musumba wa bantu eu luse, bualu kukadi matuku asatu adibu bashale nanyi, ne kabena ne tshia kudia. Meme mubapingaje ku mabu ne nzala, nebapangile mu njila, bakuabu ba kudibu mbafume kule.” Bayidi bakamuebeja ne: “Nkuepi kudi muntu mua kupeta mampa bungi bukumbane muaba udi kule ne bantu eu bua kukutshisha bantu aba?”​—Mâko 8:2-4.

Yezu wakandamuna ne: “Nudi ne mampa bungi kayi?” Bayidi bakamba ne: “Muanda mutekete ne ndambu wa mishipa ya mikese.” (Matayi 15:34) Pashishe Yezu wakalomba bua bantu badiadije panshi. Ke yeye kuangata mampa ne mishipa, kusambila Nzambi, ne kubipesha bayidi bende bua kuabanyina bantu. Tshidi tshikemesha ntshia ne: bonso bakadia ne kukutabu. Bakasangisha bishadile kuwujabu bisaka binene muanda mutekete nansha mukavua bantu balume batue ku 4 000 badie kusangisha ne bakaji ne bana!

Panyima pa Yezu mumane kutuma musumba wa bantu, yeye ne bayidi bende bakabuela mu buatu kuyabu ku Magadana ku ouest ku muelelu wa Mbuu wa Galela. Muaba eu Bafalese ne bamue bantu ba mu kasumbu ka Basadoke bakajinga bua kuteta Yezu, bamulomba bua enze tshimanyinu tshia mu diulu.

Pakajingulula Yezu tshivuabu bajinga, wakabandamuna ne: “Padi dilolo dikumbana, nutu nuamba ne: ‘Kuulu nekuikale kuimpe, bualu diulu ndikunzubile,’ ne mu dinda, nutu nuamba ne: ‘Lelu nekuikale mashika ne mvula, bualu diulu ndikunzubile kadi dikale difikuluke.’ Nudi bamanye mua kujingulula tshimuenekelu tshia diulu, kadi kanuena mua kujingulula bimanyinu bia bikondo to.” (Matayi 16:2, 3) Pashishe Yezu wakambila Bafalese ne Basadoke ne: kabakunupesha tshimanyinu nansha tshimue pa kumbusha tshimanyinu tshia Yona.

Yezu ne bayidi bende bakabuela mu buatu kuyabu batangile ku Betesaida ku nord-est kua muelelu wa mbuu. Padibu mu njila, bayidi bende badi bajingulula ne: bavua bapue muoyo bua kulua ne mampa makumbane. Badi anu ne diampa dimue. Bu muvua Yezu ufuma ku dienza tshisangilu ne Bafalese ne Basadoke bavua batua Helode mpanda, wakabadimuija wamba ne: “Kangulayi mêsu; nudimukile luevene lua Bafalese ne luevene lua Helode.” Bayidi bavua bumvue bualu ebu bibi bela meji ne: pavuaye muakule bua luevene uvua wakula bua muvuabu bapue muoyo bua kulua ne mampa. Pakamanya Yezu tshilema tshiabu wakamba ne: “Nudi nukokangana bua munudi kanuyi ne mampa bua tshinyi?”​—Mâko 8:15-17.

Yezu uvua ufuma ku didisha bantu binunu bia bungi ne mampa. Nunku bayidi bavua ne bua kumanya ne: kavua wakula bua mampa avuabu bapangile to. Wakebeja ne: “Kanuena bavuluke pamvua mutshibule mampa atanu bua bantu  balume 5 000, mbungi kayi bua bisaka biuwule tente ne bipese bunuvua basangishe?” Bakamuambila ne: “Dikumi ne bibidi.” Yezu wakatungunuka wamba ne: “Pamvua mutshibule mampa muanda mutekete bua bantu balume 4 000, mbungi kayi bua bisaka binene biuwule tente ne bipese bunuvua bangule?” Bakamuambila ne: “Muanda mutekete.”​—Mâko 8:18-20.

Yezu wakebeja ne: “Mmunyi munudi kanuyi nujingulula ne: tshivua nnuambila bualu bua mampa?” Wakamba kabidi ne: “Dimukilayi luevene lua Bafalese ne Basadoke.”​—Matayi 16:11.

Ndekelu wa bionso bayidi bakafika ku diumvua bualu ebu. Bavua benza mudimu ne luevene bua kutuntumuja paate bua mampa abande. Yezu udi wenza mudimu muaba eu ne luevene bu tshimfuanyi tshia dibola. Udi udimuija bayidi bende bua badimukile “dilongesha dia Bafalese ne Basadoke” divua mua kubanyanga.​—Matayi 16:12.