Muloko mutokweene onnamwaacamela Yesu o Tekapole makupa onakhumawo nsuwa a eniya yo Kalileya. Awo anarweela wi enwiriyane ni epenuxiwe, nave annaruuha ithokwa naari micanka mitokweene sa yoolya.

Ohoolo waya, Yesu onnaloca ni amuhuserya awe ariki: “Muloko wa atxhu onnakimoriha ikharari ntakhara wòmaliha mahiku mararu okhalaka ni miyo, nave hiwano yolya. Miyo karowihà atxhu ala ehilyile, anamukhwa etala mwimphironi, wona wi antxipale anarwa otxaiwene.” Amuhuserya annamukoha. “Mutxhu owerya ì ere hai, okulutxuni nno, wavoniha atxhu ala ni ephau?”—Marko 8:2-4.

Yesu onnaakoha: “Murino iphau hai?” Amuhuserya annaakhula eriki: “lphau thanu napili ni ihopa vakhani!” (Mateu 15:34) Vano Yesu onnaaveka achu wi ekiraathe vacheyani. Owo onnakuxa ipau ni ihopa, avekela wa Muluku, nave onnaannya oohuserya awe wi ekawe. Mootikhiniha oothene annalya ophiyerya ovona. Nave saaroleliwa soohalela sa iphau, saakhwana micanka mithanu napiili mitokweene, elukuluku yeeyo yaalya alopwana awaakhwana 4.000, ehaalakhanyeriwe athiyana ni anamwane yaalyiletho.

Yesu amanle orowiha muloko wa achu, owo ni oohuserya awe annanwela mwaaceya nave annalapuwa ephareya yo Kalileya eyaaka o Makatani. Mu elapo yeeyo, Afarisi ni Asatuki akina annamweererya Yesu, emvekaka wi apake eneneeryo ya wirimu.

Asuwelaka wi awo yachuna omweererya, Yesu onnawaakhula: Wasekuwaka muni: ‘Wirimu wophilivilawo, omelo nihiku norèra’. Wosiselo muni: ‘wirimu wophilivila ni woripawo, olelo enamurupa epwila ya maralala’. Nyuwano musuwenle makhalelo a osulu, nave himusuwenle ineneryo sa mwetxelo welapo?” (Mateu 16:2, 3) Voocharela Yesu onnaaleela Afarisi ni Asatuki wi hiyaavo eneneeryo yaahaala ovahiwa moohikhala pahiru eneneeryo ya Yona.

Yesu vamoha ni oohuserya awe annavolowa mmwaaceyani nave annacimula eyaaka o Petisaita omoko wa ephareya. Eyaaka mphironi, oohuserya annuupuwela wi aacuwala okuxa iphau. Awo yaahanleno pahiru ephau emoha. Uupuwelelaka ovaanela aareiyeno ni Afarisi vamoha ni Asatuki akhaviheryi a Herote, Yesu onnaalopola oohuserya awe ariki: “Mwikosope ni miropo sa afarisi ni sa Heróde.” Oohuserya aniiwexexa mooheseya nave anuupuwela wi Yesu onaloca miropo nthowa nawi aacuwala okuxa iphau. Vaavaa onasuweleiye wi yiiwexenxe mooheseya, Yesu onnaloca: “Munupuwelelani muriki: ti vava muhikhanlanyuno iphau?”—Marko 8:15-17.

Hiyaavinrevo elukuluku yincipale ovinyerya vaavaa Yesu aavakulenleiye achu ancipale. Mwawiihiiha oohuserya yaaphwanela osuwela wi Yesu haari awuukhuwa ni ipau. Yesu onnakoha: “Himunupuwela? Nihiku kakawannyaka iphau thanu wa atxhu matxikhwi mathanu, mapatuso  mwatxotxenlanyu yasaren’ye ithokwa hai?” Awo annaakhula eriki: “Khumi na pili.” Yesu onnakookela oloca ariki: “Nka iphau sari thanu na pili kakawannyaka wa atxhu matxikhwi masese, mapatuso mwatxotxenlanyu yasaren’ye ithokwa hai?” Awo annaakhula: “Thanu na pili.”—Marko 8:18-20.

Yesu onnaakoha oohuserya awe: “Mwahasuwelelani wi nkalotxa sa iphau?” Nave owo onnaalopola: “Mwikosopeke ni miropo sa afarisi ni asaduseu.”—Mateu 16:11.

Vanonto, oohuserya anniiwexexa mwaheene. Yooruruvaliha enaphariheliwa wi yeerihe ephau onyakhuwa. Yesu onapharihela yooruruvaliha ntoko yoosiphela ya echu yooriipiheya. Owo onnaalopola oohuserya awe wi yiikasope ni, “mahusiho a afarisi ni asaduseu,” yaawo anaavolowela achu moonanara.—Mateu 16:12.