Linmad si Jesus so amayamay a totoo ed Decapolis, diad bandad bukig na Dayat na Galilea. Labay dan narengel iray bangat to tan ipatambal iray sakit da. Wala ray awit dan angkabaleg ya buksot, odino baskit ya nankargay naakan.

Balet kalabas na pigaran agew et oniay imbaga nen Jesus ed saray disipulo to: “Nakakasian ko ray totoo, lapud taloy agew ko la ran kaiba tan anggapoy naakan da. No pasempeten ko ran narnarasan, onkapuy irad dalan. Arawrawi pa ni met so nanlapuan na arum ed sikara.” Intepet na saray disipulo to: “Iner ed sayan nisulinek a pasen so napangalaay tinapay a mamesel ed sarayan totoo?”​—Marcos 8:2-4.

Inkuan nen Jesus: “Pigaran tinapay so awit yo?” Inmebat ira: “Pitora, tan pigaran angkekelag a sira.” (Mateo 15:34) Pinayurong nen Jesus iray totoo ed karikaan. Inala to ray tinapay tan sira, nampikasi ed Dios, tan inter tod saray disipulo to pian ibunog dad totoo. Makapakelaw ta naksel iran amin. Anggano say angan et manga 4,000 a lalaki, puera ni ray bibii tan ugugaw, wala ni keran pitoran angkakabaleg ya buksot a napnapno!

Nen apasempet la nen Jesus iray totoo, kaiba to ray disipulo to ya nambaloto paonlad Magadan, diad bandad sagur na Dayat na Galilea. Wadman iray Fariseo tan kaiba da ray pigaran kabiangan na sekta na saray Saduceo pian subokey Jesus. Kinerew dan mangipanengneng na tanda manlapud tawen.

Lapud atebek toy motibo ra, inkuan nen Jesus: “Sano labi la et ibabaga yon, ‘Marakep so panaon, ta ambalbalangay tawen,’ tan diad kabuasan, ‘Ambetel tan mauran so panaon natan, ta ambalbalangay tawen tan malurelurem.’ Amta yon ipaliwawa so itsuray tawen, balet agyo nipaliwawa iray tanda na panaon.” (Mateo 16:2, 3) Insan imbaga nen Jesus ed saray Fariseo tan Saduceo ya anggapoy iter ton tanda ed sikara nilikud ed tanda nen Jonas.

Linmugan ed baloto si Jesus tan saray disipulo to tan amaarap irad Betsaida diad bandad norte na dayat. Legan iran manbiabiahe, naamtaan dan kulang so awit dan tinapay. Saksakey so awit da. Lapud sankanonot ni nen Jesus so agano nin impiarap tod saray Fariseo tan Saduceo ya onsusuportad si Herodes, impasakbay nen Jesus: “Manbantay kayo; manalwar kayo ed lebadura na saray Fariseo tan ed lebadura nen Herodes.” Inisip na saray disipulo ya say tutukoyen nen Jesus et say impakalingwan day tinapay. Lapud alikas nen Jesus ya aliway iisipen da, inkuan to: “Akin et pansasangsangan yoy agyo impangawit na tinapay?”​—Marcos 8:15-17.

Kapkapanggawa ni nen Jesus na milagro diad impamakan toy nilibon totoo. Kanian agda la komon pampagaan a maong no kulang so awit dan tinapay. Intepet to: “Agyo ta nanonotan sanen pinisagpisag koy limaran tinapay parad 5,000 lalaki, pigaray atipon yon buksot a napno na saray apisagpisag a tinapay?” Inkuan da: “Labindua.” Intuloy to: “Sanen pinisagpisag koy  pitoran tinapay parad 4,000 lalaki, pigaray atipon yon angkakabaleg a buksot a napnoy apisagpisag a tinapay?” Inkuan da: “Pitora.”​—Marcos 8:18-20.

Intepet nen Jesus: “Akin et agyo natalosan a say tutukoyen ko et aliwan tinapay?” Insan to inyarum: “Manalwar kayo ed lebadura na saray Fariseo tan Saduceo.”​—Mateo 16:11.

Atalosan a siansia na saray disipulo. Uusaren so lebadura ya pampaalsa na tinapay. Diad sayan imbaga nen Jesus et inusar toy lebadura bilang simbolo na mauges ya impluensya. Papasakbayan to ray disipulo to ya manalwar irad “bangat na saray Fariseo tan Saduceo,” ya mauges so epekto to.​—Mateo 16:12.