Jesusqa Decapolis lawpim kachkarqa, chaymanmi achkallaña runakuna rirqaku yachachisqanta uyarinankupaq hinaspa unquqkunata hampichinankupaq, mikuyninkutapas hatun canastakunapim aparqaku.

Chaymantam qatiqninkunata Jesus nirqa: “Kay runakunamantam llakipayarikuni, ñam kimsa punchawña ñuqawan kachkanku, manataqmi mikunankupaqqa imapas kanchu. Mana mikusqata wasinkuman kutichiptiyqa risqankupim yarqaymanta desmayarunmanku, wakinkuqa llumpay karumantaraqmi kankupas”, nispa. Qatiqninkunañataqmi nirqaku: “¿Maypitaq kay chunniqpiqa pipas tantata tarimunman kaynaña runaman mikuchinapaqqa?”, nispa (Marcos 8:2-4).

Jesusñataqmi nirqa: “¿Haykataq tantaykichik kachkan?”, nispa. Paykunañataqmi nirqaku: “Qanchisllam, iskay-kimsa challwachakunapiwan”, nispa (Mateo 15:34). Chaymi Jesusqa runakunata pampapi tiyaykunankupaq kamachispan tantatawan challwachakunata hapiykuspa taytanta mañakurqa, hinaspam qatiqninkunaman haywarqa runakunaman aypunankupaq. Lliwmi saksanankukama mikurqaku. 4.000 qarikunallata yupaptinkupas karqam warmikunawan warmachakunapas. Puchuqtapas qanchis canastataraqmi huñurqaku.

Chaymantam Jesusqa runakunata aviaruspan qatiqninkunawan kuska Galilea lawpi Magadan llaqtamanña botewan chimparqa. Chaypim fariseokunawan saduceokuna pantarachiyta munaspanku hanaq pachamanta kaq milagrota ruwananpaq Jesusta mañakurqaku.

Jesusñataqmi chayta musyaspan nirqa: “Inti siqaykuytam qamkunaqa ninkichik: ‘Kunanqa allin tiempom kanqa, cielom pukay-pukayta antayaramun’, nispa. Achikyaqtañataqmi ninkichik: ‘Kunanqa paramunqam hinaspapas chirimunqam, cielom antayaramuspan puyullaña kachkan’, nispa. Qamkunaqa cielota qawaspam yachankichik tiempo imayna kananta, ichaqa manam akllasqa tiempo imayna kanantaqa yachankichikchu”, nispa (Mateo 16:2, 3). Hinaspapas nirqam ima milagrotapas mana qawanankumanta, aswanqa Jonaspa kaqllatam.

Chaymantam Jesusqa qatiqninkunawan kuska Betsaida llaqtamanña botewan rirqaku. Chayna richkaspankum qatiqninkunaqa musyakururqaku chullalla tantayuq kasqankuta. Jesusñataqmi fariseokunawan hinaspa Herodespa yanapaqnin saduceokunawan rimasqanmanta nirqa: “Allintayá qawakuychik, cuidakuychikyá fariseokunapa hinaspa Herodespa levadurankumanta”, nispa. Qatiqninkunañataqmi levaduramanta rimasqanrayku piensarqaku tanta apamuyta qunqaramusqankumanta chayna nisqanta. Jesusñataqmi ima niy munasqanta mana entiendesqankuta musyaspan nirqa: “¿Imanasqataq tantaykichik mana kasqanmanta  piñanakunkichik?”, nispa (Marcos 8:15-17).

Waranqantin runakunaman mikuchisqanraykum Jesusqa mana tanta qunqasqankumantachu llakikuchkarqa. Chaymi qatiqninkunata nirqa: “¿Manachu yuyankichik pichqa tantata partispay pichqa waranqa qarikunaman haypachisqayta? ¿Hayka canasta huntatataq puchuqninta huñurqankichik?”, nispa. Paykunañataqmi nirqaku: “Chunka iskayniyuqtam”, nispanku. Jesusqa nirqataqmi: “Qanchis tantata partispay tawa waranqa qarikunaman haypachiptiypas, ¿hayka hatun canasta huntatataq puchuqninta huñurqankichik?”, nispa. Paykunañataqmi nirqaku: “Qanchistam”, nispanku (Marcos 8:18-20).

Hinaspam Jesusqa tapurqa: “¿Imanasqamá manaqa entiendenkichikchu?”, nispa. Nirqataqmi “fariseokunapa hinaspa saduceokunapa levaduranmanta” cuidakunankupaq (Mateo 16:11).

Chayraqmi qatiqninkunaqa ima niy munasqanta yacharurqaku. Levadurataqa servichikuqku masata puquchinankupaqmi. Chaymi Jesusqa levadurata tupachirqa fariseokunapa hinaspa saduceokunapa mana allin yachachisqankuwan. Hinaspam qatiqninkunata nirqa chaykunamanta cuidakunankupaq (Mateo 16:12).