Ua lolofi atu le motu o tagata e toʻatele iā Iesu i le vaipanoa o Tekapoli, lea e i le itu i sasaʻe o le sami o Kalilaia. Ua latou ō atu e faalogologo iā te ia ma faamālōlōina ai i latou. Ua latou avatu foʻi ato tetele o meaʻai.

Mulimuli ane, ua fetalai atu Iesu i ona soo: “Ua ou alofa tele i le motu o tagata, ona ua atoa aso e tolu o latou faatasi ma aʻu, ae e leai ni a latou meaʻai. Ou te lē manaʻo e tuu atu i latou e ō i o latou aiga ae e leʻi aai, ina neʻi matapogia i latou i le auala. E mamao foʻi mea e ō mai ai nisi o i latou.” Ua fesili mai le ʻausoo: “O fea o le a maua ai e se tagata ni falaoa e maoona ai nei tagata i lenei nofoaga tuufua?”—Mareko 8:2-4.

Ua tali atu Iesu: “E fia ni falaoa o iā te outou?” Ua latou faapea mai: “E fitu, ma nai tamaʻi iʻa.” (Mataio 15:34) Ona fetalai atu lea o Iesu i le motu o tagata e taooto i lalo. Ua ia tago i falaoa ma iʻa, ua tatalo atu i le Atua, ma tuu atu i ona soo e tufatufa atu i tagata. O le mea e ofo ai, ona ua aai tagata uma ma ua maoona i latou. E ui e toʻa 4,000 tane, faatasi ai ma fafine ma tamaiti ua aai i nei meaʻai, ae o meaʻai ua totoe ua tutumu ai ato tetele e fitu.

Mulimuli ane ua tuu atu e Iesu le motu o tagata e ō, ae ua latou ō ma ona soo i le vaa ma agaʻi atu ai i Makatala, lea e i le talafatai i sisifo o le sami o Kalilaia. O loo iai i inā le ʻau Faresaio faatasi ai ma nisi o le ʻau Satukaio. Ua latou taumafai e faaosooso Iesu, e faaali atu iā i latou se faailoga mai i le lagi.

Ua silafia e Iesu o latou manatunatuga. O lea, ua ia fetalai atu ai iā i latou: “A oo i le afiafi e masani ona outou faapea mai, ʻE lelei le tau auā ua mūmū mai le lagi’; ma i le taeao, ʻE matagi ma timuga le asō, auā ua mūmū ma auaoa mai le lagi.’ Ua outou iloa ona faamatala foliga o le lagi, ae e lē mafai ona outou faamatala faailoga o taimi.” (Mataio 16:2, 3) Ina ua māeʻa, ona faapea atu lea o Iesu i le ʻau Faresaio ma le ʻau Satukaio, e leai se faailoga e tuuina atu iā i latou, e na o le faailoga o Iona.

Ua ō atu nei Iesu ma ona soo i le vaa, ma agaʻi atu i Petesaita i le talafatai i le itu i mātū i sasaʻe o le sami o Kalilaia. A o alu la latou faigāmalaga, ua iloa ai e le ʻausoo e na o le tasi le falaoa o loo iā i latou ae ua galo ona aumai nisi falaoa. Ua toe mafaufau Iesu i la latou talanoaga ma le ʻau Faresaio ma le ʻau Satukaio o ē e lagolagoina Herota, ma ua ia lapataʻia ai ona soo: “Ia outou mataala ma faaeteete i le mea faafefete a le ʻau Faresaio ma le mea faafefete a Herota.” Ua manatu le ʻausoo o le taʻua e Iesu o le mea faafefete, o loo faasino atu i falaoa ua galo ona latou aumaia. Ua silafia e Iesu o latou manatunatuga, ona ia fetalai atu lea: “Aiseā ua outou fefinauaʻi ai ona o le leai o ni falaoa?”—Mareko 8:15-17.

E tatau lava i le ʻausoo ona iloa, e lē o faasino atu Iesu i le lē lava o falaoa, auā e leʻi leva tele atu ona ia saunia faavavega falaoa e fafagaina ai le faitau afe o tagata. Ua fesili atu Iesu iā i latou: “Tou te lē manatua ea, ina ua ou vaevaeina falaoa e lima i tane e lima afe, e fia ni ato na tutumu i mea na totoe?” Ua latou tali mai: “E sefulu lua.” Ua toe fesili atu Iesu: “Ina ua ou vaevaeina falaoa e fitu mo tane e fā afe, e fia ni ato tetele na tutumu i mea na totoe?” Ua latou tali mai: “E fitu.”—Mareko 8:18-20.

Ua fetalai atu Iesu iā i latou: “Po ua faapefea ona outou lē malamalama ou te leʻi tautala atu iā te outou e uiga i ni falaoa? A ia outou faaeteete i le mea faafefete a le ʻau Faresaio ma le ʻau Satukaio.”—Mataio 16:11.

Ua malamalama nei le ʻausoo i le uiga o le fetalaiga a Iesu. E faaaogā le mea faafefete ina ia fefete ai se falaoa. O lea, ina ua taʻua e Iesu le mea faafefete i lenei talanoaga, o loo ia faasino atu i se mea e mafai ona iai se aafiaga leaga i se tagata. Ua ia lapataʻia ona soo ina ia faaeteete “i aʻoaʻoga a le ʻau Faresaio ma le ʻau Satukaio,” lea e iai se aafiaga leaga i tagata.—Mataio 16:12.