Gulu la ŵanthu anandi linguluta ko kwenga Yesu mu chigaŵa cha Dekapoli, kuvuma kwa Nyanja ya Galileya. Yiwu anguluta kuti akavwisiyi vo Yesu wasambizanga kweniso kuti wakaŵachizgi. Yiwu angupinga so masokola ngakulungakulu ngo angupingamu vinthu.

Pati pajumpha nyengu, Yesu wangukambiya akusambira ŵaki kuti: “Nditiŵalenge lisungu ŵanthu yaŵa chifukwa aja nani mazuŵa ngatatu sonu, kweni alivi chakurya. Asani ndingaŵakambiya kuti akengi ndi nja, angazinduka munthowa ndipu anyaki atuliya kutali.” Akusambira ŵaki angumufumba kuti: “Munthu wangavisaniya pani viŵandi vakukwana ŵanthu wosi yaŵa kumalu kwambula ŵanthu nge kunu?”​—Mariko 8:2-4.

Yesu wanguŵafumba kuti: “Kumbi mwe ndi viŵandi vilinga?” Akusambira ŵaki angumuka kuti: “Te ndi viŵandi 7 ndi tisomba timanavi.” (Mateyu 15:34) Pavuli paki, Yesu wangukambiya ŵanthu ŵenaŵa kuti aje pasi. Iyu wanguto viŵandi ndi somba ndipu wangupemphera kwaku Chiuta. Pavuli paki, wangupaska akusambira ŵaki kuti agaŵiyi gulu la ŵanthu. Vakuziziswa ukongwa kuti ŵanthu wosi angurya ndi kuguta. Ndipu pakumaliya, anguwunjika vibanthu vo vingujaku vakuzaza masokola 7 ngakulungakulu chinanga kuti ŵanthu wo angurya ŵenga anthulumi pafufupi 4,000 kweniso anthukazi ndi ŵana.

Yesu wati wakambiya chigulu chosi cha ŵanthu kuti chikengi, iyu ndi akusambira ŵaki angukwera boti ndi kuluta kuchigaŵa cha Magadani kuzambwi kwa Nyanja ya Galileya. Yesu we kwenuku, Afarisi ndi Asaduki anyaki anguza kwaku iyu kuti amuyesi ndipu angumukambiya kuti waŵalongo chisimikizu chakutuliya kuchanya.

Yesu wati waziŵa vo yiwu aŵanaŵananga, wangukamba kuti: “Asani kufipa mukamba kuti, ‘Mawa kuchengi umampha chifukwa kuchanya kwatchesama,’ ndipu ndi mlenji mukamba kuti, ‘Msanawale kuzizirengi kweniso kunyengi vuwa chifukwa kuchanya kwatchesama ndipuso kwachita mitambu.’ Muziŵa kukonkhoska vo vichitikengi asani mwawona mo kuchanya kuwoneke, kweni mutondeka kuvwisa kuti vinthu vo vichitika sonu ving’anamuwanji.” (Mateyu 16:2, 3) Pavuli paki, Yesu wangukambiya Afarisi ndi Asaduki kuti waŵapaskengi chisimikizu chinyaki cha kupatuwaku chisimikizu chaku Yona.

Yesu ndi akusambira ŵaki angukwera boti ndipu angufika ku Betisayida, kunkhondi chakuvuma mumphepeti mwa Nyanja ya Galileya. Ŵe munthowa, akusambira ŵaki angukumbuka kuti aluwa kupinga viŵandi vinandi ndipu angupinga ŵaka chiŵandi chimoza. Pakukumbuka vo Afarisi ndipuso Asaduki wo ŵenga achipani chaku Herodi akambanga, Yesu wangutcheŵeska kuti: “Jani masu, ndipu tcheŵani ndi chakutupisa cha Afarisi ndi chaku Herodi.” Akusambira ŵaki aŵanaŵananga kuti chakutupisa cho Yesu wakambanga chang’anamuwanga vo yiwu anguchita pakuluwa chiŵandi. Yesu wati waziŵa vo yiwu aŵanaŵananga, wangukamba kuti: “Ntchifukwa wuli mukambiskana kuti mulivi viŵandi?”​—Mariko 8:15-17.

Yapa, ndipu pajumpha ŵaka nyengu yimanavi kutuliya po Yesu wanguryisiya ŵanthu anandi mwakuziziswa. Mwaviyo, akusambira ŵaki akhumbikanga kuziŵa kuti Yesu wafipanga mtima ndi chiŵandi chayichu cha. Yesu wanguŵafumba kuti: “Kumbi mukumbuka cha kuti ndati ndamenya viŵandi vinkhondi vo anthulumi 5,000 angurya, ndi masokola ngalinga  ngakuzaza nga vibanthu ngo munguyola?” Yiwu angumuka kuti: “Ngenga 12.” Yesu wangulutirizga kukamba kuti: “Ndati ndamenya viŵandi 7 vo anthulumi 4,000 angurya, kumbi ndi masokola ngakulungakulu ngalinga ngakuzaza nga vibanthu ngo munguyola?” Yiwu angumuka kuti: “Ngenga 7.”​—Mariko 8:18-20.

Yesu wanguŵafumba kuti: “Sonu mwatondekiyanji kuwamu kuti ndikambiskana namwi va chiŵandi cha?” Iyu wangukamba so kuti: “Kweni tcheŵani ndi chakutupisa cha Afarisi ndi Asaduki.”​—Mateyu 16:11.

Pakumaliya, akusambira anguwamu vo Yesu wang’anamuwanga. Chakutupisa chichitiska kuti chiŵandi chitutumuki. Mwaviyo, pakukamba chakutupisa, Yesu wang’anamuwanga vinthu va chinyengu. Yapa, iyu waŵatcheŵeskanga vakukwaskana ndi “visambizu va Afarisi ndi Asaduki,” vo venga va chinyengu.​—Mateyu 16:12.