Makamu-makamu aabantu bayobolokela kuli Jesu mucooko ca Dekapole, kulubazu lwakujwe kwa Lwizi lwa Galilaya. Baboola kutegwa bazyoomvwe nzyayiisya akuzyooponesyegwa, baletelezya azisuwo zipati nzibanyamwida zyakulya.

Pele mukuya kwaciindi, Jesu waambila basikwiiya bakwe kuti: “Yandeetezya nkamu yabantu eeyi, nkaambo aba kale mazuba otatwe ngobakkala andime alimwi tabajisi cakulya. Ikuti ndibaambile kuti baunke mwabo-mwabo anzala, balanetuka munzila, alimwi bamwi bazwa kulamfwu.” Basikwiiya bamubuzya kuti: “Ino musyokwe omuno muntu inga wazijana kuli zinkwa zikonzya kukkwana bantu aaba?”—Marko 8:2-4.

Jesu wabuzya kuti: “Ino mujisi zinkwa zyongaye?” Basikwiiya bavwiila kuti: “Zili ciloba atuswi tusyoonto.” (Matayo 15:34) Mpoonya Jesu walailila bantu kuti bakkale ansi. Wabweza zinkwa atuswi, wapaila kuli Leza, wapa basikwiiya bakwe kuti baabile bantu. Cigambya ncakuti bantu boonse balya akukkuta. Eezyo zyasyaala zyazuzya zisuwo zipati zili ciloba, nokuba kuti aabo ibali kulya bali baalumi batandila ku 4,000 kutabalilizya abamakaintu abana!

Jesu naamana kumwaya makamu aabantu, watanta bwato abasikwiiya bakwe akuzabuka lwizi kuya ku Magada, kunkomwe iili kumbo lya Lwizi lwa Galilaya. Ooku ba Farisi kabali antoomwe aba Saduki bamwi basola kumusunka Jesu kwiinda mukumwaambila kuti abatondezye citondezyo cimwi icizwa kujulu.

Kazyi makanze aabo, Jesu wavwiila kuti: “Kwaba kumangolezya mwaamba kuti, ‘Buyooca kabotu, nkaambo kujulu kwasubila,’ alimwi mafwumofwumo mwaamba kuti ‘Sunu kunooli mpeyo amvwula nkaambo kujulu kwasubila alimwi kuli makumbi aasiya.’ Mulizyi kupandulula mbokulibonya kujulu, pele tamukonzyi kupandulula zitondezyo zyaziindi eezyi.” (Matayo 16:2, 3) Mpoonya Jesu waambila ba Farisi aba Saduki kuti tabakoopegwa citondezyo cili coonse ccita buyo citondezyo ca Jona.

Jesu abasikwiiya bakwe batanta bwato akugama ku Betesaida kunkomwe iili kunyika lwaajwe kwalwizi. Kabali munzila, basikwiiya babona kuti baluba kubwezelezya zinkwa zikkwene. Bajisi buyo cinkwa comwe. Kayeeyede makani ngaali kwaambaula aba Farisi alimwi aba Saduki ibatobela Heroda, Jesu wacenjezya kuti: “Amulangisye; amubucenjelele bumena bwaba Farisi abumena bwa Heroda.” Jesu naamba zyabumena, balo basikwiiya bayeeya kuti waamba zinkwa nzyobaluba kunyamuna. Naabona kuti tiibamvwisya ncaamba, Jesu wati: “Nkaambo nzi ncomukazyanya akaambo kakuti tamujisi zinkwa?”—Marko 8:15-17.

Caino-ino Jesu wakasanina zyuulu zyabantu azinkwa. Aboobo basikwiiya beelede kuzyiba kuti taambi makani aakubula zinkwa zini pe. Wababuzya kuti: “Sena tamuciyeeyi ciindi nindakakomauna zinkwa zyosanwe kusanina baalumi bali  5,000, kuti zyakali zyongaye zisuwo izyakazwide bufwefwelenga nzyomwakabweza?” Bavwiila kuti: “Zyakali 12.” Kumane Jesu wazumanana kwaamba kuti: “Nindakakomauna zinkwa zili ciloba kusanina baalumi bali 4,000, ino zyakali zyongaye zisuwo zipati izyakazwide bufwefwelenga nzyomwakabweza?” Bavwiila kuti: “Zyakali ciloba.”—Marko 8:18-20.

Mpoonya Jesu wabuzya kuti: “Ino nkaambo nzi tiimwazyiba kuti tiindali kumwaambila makani aazinkwa?” Wayungizya kuti: “Amucenjele abumena bwaba Farisi aba Saduki.”—Matayo 16:11.

Lino basikwiiya bakabona kaambo. Bumena bulasanganizyigwa afulaulu kutegwa ufwufwumuke ciindi nibapanga zinkwa. Aawa Jesu wabelesya bbala lyabumena kuba citondezyo cakusofwaala. Aboobo Jesu ucenjezya basikwiiya kuti bazicenjelele “njiisyo zyaba Farisi aba Saduki,” eezyo zisofwaazya.—Matayo 16:12.