Bikpela lain manmeri i kam bungim Jisas long Dekapolis, long hap is bilong raunwara Galili. Ol i kam bilong harim tok bilong Jisas na em i ken oraitim sik bilong ol. Na tu, ol i karim ol bikpela basket kaikai i kam.

Sampela de bihain kaikai bilong ol i pinis, na Jisas i tokim ol disaipel: “Mi sori tru long ol manmeri, long wanem, inap 3-pela de ol i stap wantaim mi na ol i no gat kaikai. Na sapos mi salim ol i go long ol haus bilong ol na ol i no kaikai, strong bilong ol bai pinis long rot. Sampela bilong ol i kam long ol longwe ples.” Na ol disaipel i tok: “I no gat wanpela ples i stap klostu. Olsem wanem bai wanpela man i kisim bret inap long pulapim bel bilong ol dispela manmeri?”—Mak 8:2-4.

Jisas i askim ol: “Yupela i gat hamas bret i stap?” Na ol i tok: “7-pela, na i gat sampela liklik pis.” (Matyu 15:34) Jisas i tokim ol manmeri long sindaun long gras. Em i kisim ol bret na pis, na em i beten long God, na brukim ol bret na pis na givim long ol disaipel na ol i tilim long ol manmeri. Olgeta i kaikai na i pulap. Inap 4,000 man i kaikai na ol i no kaunim ol meri na pikinini, tasol taim ol i bungim ol hap kaikai i stap yet, ol i pulimapim 7-pela bikpela basket!

Bihain long Jisas i salim ol manmeri i go, em na ol disaipel i kalap long bot na ol i go long Magadan, long hap wes bilong raunwara Galili. Taim ol i kamap pinis, ol Farisi na ol Sadyusi i kam na ol i laik traim Jisas. Ol i askim em long wokim wanpela mirakel olsem mak i kam long God.

Jisas i save olsem ol i laik traim em, olsem na em i tokim ol: “Long apinun tru yupela i save tok, ‘Em bai gutpela taim nau, long wanem, skai i retpela olsem paia,’ na long moning yupela i save tok, ‘Nau em bai kol na i gat win na ren, long wanem, skai i retpela olsem paia na ples i tudak liklik.’ Yupela i save long lukluk bilong skai i makim wanem samting, tasol ol sain bilong dispela taim, em yupela i no inap save ol i makim wanem samting.” (Matyu 16:2, 3) Na Jisas i tokim ol Farisi na ol Sadyusi olsem ol bai i no inap lukim wanpela mak, ol bai lukim tasol mak bilong profet Jona.

Orait Jisas na ol disaipel bilong em i kalap long bot na ol i go long Betsaida long hap not is bilong raunwara Galili. Nau ol disaipel i luksave olsem ol i no kisim planti bret i go wantaim ol. Ol i gat wanpela bret tasol i stap long bot. Jisas i tingim tok bilong ol Farisi na ol Sadyusi em ol lain bilong Herot, olsem na em i givim tok lukaut long ol disaipel olsem: “Ai bilong yupela i mas op i stap, na yupela i mas lukaut long yis bilong ol Farisi na yis bilong Herot.” Ol disaipel i no klia long tok bilong Jisas, ol i ting em i mekim dispela tok, long wanem, ol i no bin kisim bret i kam. Jisas i luksave long dispela, olsem na em i tok: “Bilong wanem yupela i toktok i go i kam long yupela i no gat bret?”—Mak 8:15-17.

I no longtaim i go pinis Jisas i bin wokim mirakel na i givim bret long planti tausen manmeri. Olsem na ol disaipel i mas save olsem Jisas i no toktok long bret tru. Em i tokim ol: “Yupela i  no tingim, taim mi brukim 5-pela bret inap long 5,000 man, yupela i bin kisim hamas basket i pulap long hap bret i stap yet?” Ol i tok: “12-pela.” Na Jisas i tok: “Taim mi brukim 7-pela bret inap long 4,000 man, yupela i bin kisim hamas bikpela basket i pulap long hap bret i stap yet?” Na ol i tok: “7-pela.”—Mak 8:18-20.

Jisas i tok: “Olsem wanem na yupela i no luksave olsem mi no toktok long yupela long bret? Yupela i mas lukaut long yis bilong ol Farisi na ol Sadyusi.”—Matyu 16:11.

Nau ol disaipel i kliagut long tok bilong Jisas. Yis i save mekim na bret i solap. Tok piksa bilong Jisas long yis i makim samting we i kirapim ol man long kamap man nogut. Em i givim tok lukaut long ol i mas was gut long “samting ol Farisi na ol Sadyusi i skulim ol man long en,” long wanem, tok bilong ol inap kirapim man long bihainim ol pasin nogut.—Matyu 16:12.