Muttitthi muulupale waahimuthukumanela Yesu oDekaapoli, mpantta onikhuma nsuwa na Ephareya ya oGalileya. Atthu ale yaarwenle onwiriyana Yesu ni openuxiwa. Nave yaahikuxa ittanka suulupale saarina yoolya.

Nuuvira okathi, Yesu aahaaleela awiixutti awe wira: “Muttitthi ula kinnònela othunku. Atthu àvira mahiku mararú ekittharaka, vano kharina yolya. Kawìrela orowa owani evoliwene, anomora etala mphironi: nave atthu anjene akhumme ottaiwene”. Vano awiixutti awe yaahimwaakhula wira: “Ninwerya ophwanya sai yolya yo wavoniha atthu ala othene mothakoni-mu?”​—Marko 8:2-4.

Yesu aawaakhunle so: “Murina iphau ikavi?” Awiixutti yaakhunle wira: “Nrina iphau thanu na pili n’ihopa vakhani ixikhani”. (Matheyo 15:34) Nuumala-vo, Yesu aahiruma wira atthu ale akilaathi. Aahikuxa iphaawu ni ihopa iye, khunvekela Muluku, khwaavaha awiixutti wira yaakawele atthu ale. Mootikiniha, atthu otheene yaahivona. Nnaamwi yaalyiiye alopwana 4.000, vamosa ni athiyana ni anamwane anceene, iphaawu saattotteliwe saahisarya ithokwa 7 suulupale!

Nuumala Yesu olaxerya muttitthi ole, owo ni awiixutti awe aahiwela ekalawa onarowa oMagadani, mpantta onikela nsuwa wa Ephareya ya oGalileya. Elapo ele, aFarisi vamosa ni aSaduki yaaheererya omweehererya Yesu, avekelaka ethoonyeryo ya wiirimu.

Osuwelaka etthu yaaphavela aya, Yesu aahiwaakhula oriki: “Nsuwa nikelaka, nyuwo munnihimya wira: ‘Wirimu khurere oxerya-wo: melo, nihiku norera’. Vaxaka, munnihimya wira: ‘Wirimu woxerya ni woripela-wo: olelo enorupa epula’. Nyuwo munsuwela otaphulela makhalelo òsulu, muhinsuwela sai otaphulela ithonyeryo sa makhalelo òkathi ula?” (Matheyo 16:2, 3) Nuumala-vo, Yesu aahaalela aFarisi ni aSaduki wira khaarowa waavaha ethoonyeryo ekina ehikhanle ya Yona.

Yesu ni awiixutti awe yaahikela mukalawani anarowa oBethisaida mpantta onikela epheyo oxerexere wa ephareya. Mphironi, awiixutti ale yaahoona wira yaahiliyala okuxa iphaawu sinceene. Awo khiyaarina nnakhala ephaawu emosa. Uupuwelaka etthu yaakhumelenle okathi akumanne awe ni aFarisi ni aSaduki, atthareli a Herodi, Yesu aahaalopola oriki: “Mwipasope orattene ni miropo s’aFarisi ni sa mwené Herodi”. Awiixutti yuupuwela wira Yesu aahimya wira yaahiliyala okuxa iphaawu. Osuwelaka ele yuupuwela aya, Yesu aahaakoha wira: “Munàpelanela-ni mwaha w’ohikhalana iphau?”​—Marko 8:15-17.

Yesu iira aavahale ene iphaawu niinaano atthu ikonto sinceene. Tivonto awiixutti ale yaahaana osuwela wira khahiyo aahimya iphaawu. Nto Yesu aahaakoha wira: “Khamunupuwela? Okathi wakawannyaka iphau thanú, khwavaha  atthu ikonto thanu [5.000], mwakunxe ithokwa ikavi sasanrye mapattuxa yahanle?” Awiixutti yaahimwaakhula wira: “Mulokó ni pili”. Nto Yesu aahivikaniha oriki: “Ankhi okathi wakawannyaka iphau thanu na pili, khwavaha atthu ikonto xexé [4.000], mwakunxe ittanka ikavi sasanrye mapattuxa yahanle?” Yaahaakhula wira: “Thanu na pili”.​—Marko 8:18-20.

Yesu aahaakoha wira: “Vano, muhinsuwela sai wira miyo nkohimenryeni ipahu kìrika: Mwipasope ni miropo sa maFarisi ni sa maSaduki?”​—Matheyo 16:11.

Wanikisa waya awiixutti ale yaahiiwexexa. Eferemento yaarumeeliwa wira yiipelanihe otthu weetheiwa. Yesu aahirumeela eferemento ntoko nthoonyeryo na ohiloka. Nave, aalopola awiixutti awe wira yiikasoopeke mwaha wa “mwixuttiho wa maFarisi ni wa maSaduki”, yoowo waari woohiloka.​—Matheyo 16:12.