Damu nga tawo an kinadto kan Jesus ha rehiyon han Decapolis, ha este han Dagat han Galilea. Kinadto hira basi makapamati ha iya ngan magpatambal, ngan may dara hira nga mga kinahanglanon ha pagbiyahe nga nakasulod ha dagku nga basket, o alat.

Pero ha urhi, ginsidngan ni Jesus an iya mga disipulo: “Nalolooy ako ha mga tawo, kay tulo ka adlaw na nga nag-iinupod hira ha akon, ngan waray hira pagkaon. Kon paulion ko hira nga gutom, bangin madismayo hira ha dalan, ngan an iba ha ira hirayo an gintikangan.” An mga disipulo nagpakiana: “Diin kita makakakuha hin tinapay dinhi hinin hirayo nga lugar basi makakaon ini nga mga tawo?”—Marcos 8:2-4.

Hi Jesus binaton: “Pira nga tinapay an aada ha iyo?” An mga disipulo nagsiring: “Pito, ngan may pipira nga gudtiay nga isda.” (Mateo 15:34) Katapos, ginpalingkod ni Jesus an mga tawo ha tuna. Iya ginkuha an mga tinapay ngan isda, nag-ampo ha Dios, ngan iginhatag ito ha mga disipulo basi ipanhatag ha mga tawo. Urusahon nga an ngatanan nakakaon ngan nabusog. Han gintirok an salin, nakapuno ito hin pito nga dagku nga basket, bisan kon an kumaon mga 4,000 nga kalalakin-an, labot pa han kababayin-an ngan kabataan!

Katapos paulion ni Jesus an mga tawo, hiya ngan an iya mga disipulo sinakay hin baluto ngan tinabok ngadto ha Magadan, ha weste nga baybayon han Dagat han Galilea. Didto, ginsarihan hi Jesus han mga Pariseo ngan han pipira nga sekta han mga Saduseo pinaagi ha paghangyo ha iya nga magpakita hin tigaman tikang ha langit.

Maaram hi Jesus han ira motibo, salit hiya binaton: “Kon tikagab-i na nahiaraan niyo nga sumiring, ‘Magigin maopay an panahon kay mapula an langit,’ ngan kon aga, kamo nasiring, ‘Magigin mahagkot ngan mauran yana nga adlaw kay mapula an langit ngan madalumdom.’ Maaram kamo han kahulogan han nakikita niyo ha langit, kondi diri kamo maaram han kahulogan han mga tigaman han mga panahon.” (Mateo 16:2, 3) Katapos, ginsidngan ni Jesus an mga Pariseo ngan Saduseo nga waray tigaman nga ihahatag ha ira labot la han tigaman ni Jonas.

Hi Jesus ngan an iya mga disipulo sinakay ha baluto ngan kinadto ha Betsaida ha norte-este nga baybayon han dagat. Samtang nagbibiyahe, hinbaroan han mga disipulo nga nangalimot hira pagdara hin igo nga tinapay. Usa la nga tinapay an ira nadara. Nahinumdoman ni Jesus an iya pakiistorya ha mga Pariseo ngan Saduseo nga mga parasuporta ni Herodes, salit hiya nagpahamangno: “Padayon kamo nga magbantay; mag-ikmat kamo ha libadura han mga Pariseo ngan ha libadura ni Herodes.” Kahuna han mga disipulo nga han nag-unabi hiya hin libadura an iya iginpapasabot amo an ira waray pakadara hin tinapay. Tungod kay nasantop ini ni Jesus, hiya nagsiring: “Kay ano nga nagdidiskusyon kamo nga waray kamo pakadara hin tinapay?”—Marcos 8:15-17.

Diri pa la maiha, ginpakaon ni Jesus hin tinapay an yinukot nga tawo. Salit maaram na unta an mga disipulo nga diri hiya nababaraka mahitungod han ira kakulang hin literal nga tinapay. Hiya nagpakiana: “Diri ba kamo nahinunumdom han gintipik-tipik ko an lima nga tinapay para ha 5,000 nga kalalakin-an? Pira ka basket an napuno han salin nga mga tipik nga iyo gintirok?” Hira binaton: “Dose.” Hi Jesus nagpadayon: “Han gintipik-tipik ko an pito nga tinapay para ha 4,000 nga kalalakin-an, pira ka basket nga dagku an napuno han gintirok niyo an nahisalin nga mga tipik?” Hira binaton: “Pito.”—Marcos 8:18-20.

Hi Jesus nagpakiana: “Kay ano nga diri niyo nasasabtan nga diri tinapay an akon gin-iistorya ha iyo?” Hiya nagdugang: “Karuyag ko sidngon nga mag-ikmat kamo ha libadura han mga Pariseo ngan mga Saduseo.”—Mateo 16:11.

Ha urhi, nasabtan han mga disipulo an punto. An libadura ginagamit ha pagpatubo hin tinapay. Dinhi, ginamit ni Jesus an libadura sugad nga simbolo han kadaot. Ginpahamangnoan niya an mga disipulo nga magbantay kontra “ha katutdoan han mga Pariseo ngan mga Saduseo,” nga may nakakadaot nga epekto.—Mateo 16:12.