KAPITE 58
Neʼe Ina Fakatuputupu Te ʼu Foʼi Pane Pea Mo Fai He Fakatokaga ʼo ʼUhiga Mo Te Meʼa Fakatupu
MATEO 15:32–16:12 MALEKO 8:1-21
-
ʼE FAFAGA E SESU TE TOKO 4 000 HAHAʼI TAGATA
-
ʼE INA FAI HE FAKATOKAGA ʼO ʼUHIGA MO TE MEʼA FAKATUPU ʼA TE KAU FALISEO
ʼI te koga fenua ʼo Tekapole, ʼi te potu esite ʼo te Tai ʼo Kalilea, neʼe fakatahitahi age kia Sesu te hahaʼi kaugā malie. Neʼe natou ʼomai ke natou fagono kia te ia pea ke ina fakamalolo natou. Neʼe natou ʼave mo natou te ʼu kato lalahi fafaʼo meʼa kai.
Kaʼe ki muli age, neʼe ui fenei e Sesu ki ʼana tisipulo: “ ʼE au ʼofa ki te hahaʼi, koteʼuhi kua ʼaho tolu tanatou nonofo mo au pea ʼe mole ʼi ai hanatou meʼa kai. Kapau ʼe au fakaliliu pakupaku natou ki ʼonatou ʼapi, ʼe natou matapopo anai ʼi te ala, pea ko ʼihi ia natou ʼe nonofo mamaʼo.” Neʼe fehuʼi fenei e te ʼu tisipulo: “ ʼE ʼi ai koa he faʼahi, ʼi te koga meʼa lavaki ʼaeni, ʼe feala ke alu he tahi ʼo toʼo mai ai he ʼu foʼi pane ʼe feʼauga ke makokona ai te hahaʼi ʼaeni?”—Maleko 8:2-4.
Neʼe ui fenei e Sesu: “Ko ʼakotou foʼi pane ʼe fia?” Neʼe tali fenei e te ʼu tisipulo: “Ko foʼi pane ʼe fitu pea mo te ʼu kiʼi ika.” (Mateo 15:34) Pea neʼe fakatotonu e Sesu ki te hahaʼi ke natou nonofo ifo ki lalo. Neʼe ina toʼo te ʼu foʼi pane mo te ʼu kiʼi ika, neʼe faikole ki te ʼAtua, pea neʼe ina foaki age leva ki ʼana tisipulo ke natou tufatufa ki te hahaʼi. Meʼa fakapunamaʼuli, he neʼe natou kakai fuli ʼo makokona. Neʼe natou tanaki te ʼu toega kai, ʼo fofonu ai kato lalahi ʼe fitu, logo la neʼe ko te toko 4 000 hahaʼi tagata ʼae neʼe kakai. Kaʼe neʼe mole lau te hahaʼi fafine pea mo te ʼu fanau.
ʼI te ʼosi fakaliliu e Sesu te hahaʼi, neʼe alu vaka mo te ʼu tisipulo ki Makatane, ʼi te potu uesite ʼo te Tai ʼo Kalilea. ʼI ai, ko te kau Faliseo pea mo ʼihi ʼo te magaʼi lotu ʼa te kau Satuseo, neʼe natou fia ʼahiʼahiʼi ia Sesu, ʼo natou kole age ke ina fakaha he fakailoga mai te lagi.
Neʼe iloʼi e Sesu tonatou loto, koia neʼe ina tali fenei age: “Ka malu te afiafi, ʼe kotou ui fenei: ‘ ʼE laulelei anai apogipogi koteʼuhi ʼe kula te lagi,’ pea ʼi te uhu, ‘ ʼe tuʼu kovi anai ʼi te ʼaho nei, koteʼuhi ʼe kula te lagi kaʼe kauʼaoa.’ ʼE kotou popoto ʼi te fakamahino ʼo te agaaga ʼo te lagi kaʼe ʼe mole feala hakotou fakamahino te ʼu fakailoga ʼo te ʼu temi.” (Mateo 16:2, 3) Pea neʼe ui e Sesu ki te kau Faliseo mo te kau Satuseo ʼe mole foaki age anai he fakailoga kia natou, gata pe ki te fakailoga ʼo Sonasi.
Neʼe heka ia Sesu mo ʼana tisipulo ki he vaka ʼo olo ki Petesaita, ʼi te potu noleto esite ʼo te Tai ʼo Kalilea. ʼI tanatou folau ʼaia, neʼe tokagaʼi e te ʼu tisipulo neʼe mole feʼauga te pane ʼae neʼe natou ʼave, he neʼe ko te foʼi pane pe ʼe tahi. Neʼe kei manatuʼi e Sesu tana felogoʼi mo te kau Faliseo pea mo te kau Satuseo ʼae ʼe lagolago kia Helote, ʼo ina fai ai te fakatokaga ʼaeni: “Kotou tokakaga ki te meʼa fakatupu ʼa te kau Faliseo pea mo te meʼa fakatupu ʼa Helote.” Neʼe mole mahino te ʼu tisipulo ki ʼana palalau. Neʼe natou manatu neʼe talanoa ia Sesu ki te meʼa fakatupu ʼuhi he neʼe galo ke natou toʼo he ʼu foʼi pane. Neʼe tokagaʼi e Sesu tanatou faihala, koia neʼe ina ui fenei: “He koʼe ʼe kotou fefihiʼaki ʼi te mole ʼi ai hakotou foʼi pane?”—Maleko 8:15-17.
Mole faʼa fualoa ki ai, neʼe fafaga e Sesu te toko lauʼi afe hahaʼi ʼaki ni foʼi pane. Koia neʼe tonu ai ke iloʼi e te ʼu tisipulo neʼe mole hoha ia ʼo ʼuhiga mo te mole ʼi ai ʼo he ʼu foʼi pane. Neʼe ina fehuʼi fenei age: “ ʼE mole kei kotou manatuʼi koa la ia taku haga ʼo tofitofi te ʼu foʼi pane ʼe nima maʼa te toko 5 000 hahaʼi tagata? ʼE ko kato toega meʼa kai ʼe fia neʼe kotou Maleko 8:18-20.
tanaki?” Neʼe natou tali fenei age kia te ia: “ ʼE hogofulu-ma-lua.” Neʼe hoko atu fenei e Sesu: “ ʼI taku haga ʼo tofitofi te ʼu foʼi pane ʼe fitu maʼa te toko 4 000 hahaʼi tagata, ko kato lalahi ʼe fia neʼe kotou fakafofonu ʼaki te ʼu toega meʼa kai?” Pea neʼe natou tali fenei age kia te ia: “ ʼE fitu.”—Neʼe fehuʼi fenei e Sesu: “He koʼe ʼe mole kotou mahino neʼe mole au palalau ʼo ʼuhiga mo te ʼu foʼi pane?” Pea neʼe ina ui fenei: “Kotou tokakaga ki te meʼa fakatupu ʼa te kau Faliseo pea mo te kau Satuseo.”—Mateo 16:11.
Neʼe mahino leva ki te ʼu tisipulo ʼana palalau. Neʼe natu te meʼa fakatupu ʼaki te falena ke tupu te pane. Neʼe fakaʼaogaʼi ʼi heni e Sesu te meʼa fakatupu moʼo fakata te kaka. Neʼe ina ui ai ki te ʼu tisipulo ke natou tokakaga ki “te ʼu akonaki ʼa te kau Faliseo pea mo te kau Satuseo,” ʼae ʼe feala ke ina kakaʼi natou.—Mateo 16:12.