Yésu ni banigil bé ba mbol i Bétsaida. Bôt ba nlona nye mut ndim, ba nsoohe nye le a mélés nye.

Yésu a ngwel nye woo, a kena nye ipañ mbai. I mbus, a nha matai i mis ma mut, a mbat nye le: “Baa u ntehe ngim jam?” Mut a ntimbhe le: “Me ntehe bôt, ndi ba mpôôna bie bi bi nke.” (Markô 8:23, 24) Yésu a mbii moo mé i ngii mis ma mut, mut a mbôdôl tehna. I mbus, a nhuuha nye a kal nye le a témb bañ i mbai.

Yésu ni banigil bé ba nke i ñombok i Kaisaréa i Filipi. Inyu bet hikôa, ba mboñ 40 ma kilôméta. Mbai i ôñne i ngii hikôa jam kiki 350 méta ni tuye, hikôa hi Hermôn hi gwé neige i ñombok. Liké li nyoñ bo i ndék yosôna dilo diba.

Mu njel, Yésu a ntelep inyu soohe nyetama. I yii ndik sôñ bôô tole jôm nwaa le a nwo, ndi Yésu a gwé nduña inyu banigil bé. Hala a yé ndék ngéda le ngandak i bi tjôô nye. Bape ba yé nyômôk, ba nyi bé kii ba boñ. Ba yé badba inyuki a ntjél biliya bôt ba mboñ inyu yilha nye kiñe tole inyuki a ntop bé ti yimbne i i ñunda toi njee a yé.

Kiki banigil ba nlo het a yé soohe, Yésu a mbat bo le: “Bôt ba nkal le Man mut a yé njee?” Ba ntimbhe le: “Bahogi ba nkal le Yôhanes Nsôble, bape Éliya, bape ki Yérémia tole wada ikété bapôdôl.” Ñ, bôt ba nhoñol le Yésu a nla ba wada mu ipôla bôt ba ntuge. Inyu yi mahoñol map, Yésu a mbat banigil bé le: “Ndi bé ni nkal le me yé njee?” Ni Pétrô a timbhe, a kal le: “U yé Kristô, Man Nyambe nu niñ.”​—Matéô 16:13-16.

Yésu a nkal Pétrô le a nla kon maséé i yi le Djob a bi soolene nye jam li, a nkônde le: “Me nkal ki we le: U yé Pétrô, munu liaa lini nyen m’a ôñôl likoda jem, to manwemel ma Soñ m’a yémbél bé jo.” Yésu a ñunda le nyemede nyen a ga oñ ntôñ yak i bôt ba hémle ba ga téédana bé i Soñ ibale ba ntéñbe ni hémle yap. A mbôn Pétrô le: “M’a ti we diliba di Ane ngii.”​—Matéô 16:18, 19.

Yésu a nkal bé le Pétrô a nloo bana baôma bape, tole nyen a yé ño ntôñ. Yésu nyemede nyen a yé mamp Ngok het ntôñ wé u ga ôña. (1 Korintô 3:11; Éfésô 2:20) To hala, Pétrô a nlama kôhna diliba daa. A ga bana nsima i hôla bôt bape i kôdôl Ane ngii.

Pétrô a ga gwélél hiliba hi bisu i Pentékôt 33 N.Y., inyu unda Lôk Yuda ni  mbôn i i nhiel ñem kii ba nlama boñ inyu tohlana. Inyu bôt ba Samaria ba ba nhémle, a ga gwélél hiliba hi nyônôs iba inyu boñ le ba kôdôl Ane Djob. I mbus, i nwii 36 N.Y., Pétrô a ga gwélél hiliba hi nyôhne aa inyu bôt ba matén, kiki Kornéliô ni bape.​—Minson mi baôma 2:37, 38; 8:14-17; 10:44-48.

Hala a bi tééñga baôma i ngéda Yésu a bi kal bo le ndék ngéda a ga son njonok, a wo ki i Yérusalem. Mu kiki a nok bé le Yésu a nlama tuge inyu niñ i ngii, Pétrô a nyoñ nye, a kahal kônd nye a kalak le: “Kônôl wemede ngoo, a Nwet; i mam mana ma yé mbén i pémél we.” Ndi Yésu a nhielba a kal Pétrô le: “Témb me i mbus, a Satan! U yéne me ngok baagene inyule u nhoñol bé mahoñol ma Nyambe, ndi ma bôt ba binam.”​—Matéô 16:22, 23.

Nano, Yésu a nsébél bôt bape ni baôma, a toñle bo le hala a ta bé jam li ntomb i ba nnigil wé. A nkal le: “Ibale mut a nsômbôl noñ me, a nlama ha bé niñ inyu yé, ndi a begee kék yé njiiha, a noñ me ibabé waa. Inyule nu ni nu a nsômbôl tohol niñ yé, a’ nimis yo; ndi nu ni nu a nimis niñ yé inyu yem ni inyu ñañ nlam, a’ tohol yo.”​—Markô 8:34, 35.

Inyu lémél Yésu, banigil ba nlama bana makénd, ba boñ ki bisesema. Yésu a nkal le: “Nu ni nu a nwél me ni bibañga gwem nyuu munu hiai hibe ni hi ndéñg hini, yak Man mut a’ wél nye nyuu ngéda a’ lo ikété lipém li Isañ lôñni biañgel bipubi.” (Markô 8:38) Ñ, i ngéda Yésu a ga loo, “a ga timbhe hiki mut inoñnaga ni maboñok mé.”​—Matéô 16:27.