Zezi ek son bann disip i ariv Betsayda. La bann dimoun i anmenn en zonm aveg kot Zezi e sipliy li pour tous sa zonm e geri li.

Zezi i tyonbo lanmen sa zonm e anmenn li an deor vilaz. I kras lo son lizye e apre i demann li: “Ou vwar keksoz?” Sa zonm i reponn: “Mon vwar dimoun, zot parey bann pye dibwa me zot pe marse.” (Mark 8:23, 24) Zezi i poz son lanmen lo lizye sa zonm e i fer li vwar kler. La sa zonm i kapab vwar byen kler e Zezi i anvoy li kot li e dir li pa bezwen al dan sa vilaz.

Apre sa, Zezi ek son bann disip i al dan nor dan en rezyon ki apel Sezare Filip. Pour en dimoun al dan sa landrwa, i bezwen mont en zistans apepre 40 kilomet. Sa vilaz i 350 met par lao nivo delo sale. Ler zot pe monte, zot kapab vwar Montanny Ermonn ki dan nordes. I annan lanez lo latet montanny akoz sa montanny i byen o. I tre probab ki i pran detrwa zour pour ariv dan sa vilaz.

Pandan zot vwayaz, Zezi i al en landrwa li tousel pour priye. I reste zis apepre nef oubyen dis mwan avan ki Zezi i mor e i enkyet pour son bann disip. Resaman en kantite disip in aret swiv li e i paret ki lezot i konfize oubyen dezapwente. I kapab ki zot pa konpran akoz i pa’n les bann dimoun fer li vin lerwa oubyen akoz i pa ti oule donn zot en siny pour montre enn fwa pour tou ki i vreman ete.

Ler bann disip i vin kot Zezi ki pe priye, Zezi i demann zot: “Dapre sa ki dimoun i dir, lekel li Garson zonm?” Zot reponn: “Serten i dir ki se Zan ki batize, lezot i dir Eliya e lezot ankor i dir ki se Zeremi oubyen enn bann profet.” Parey nou vwar, bann dimoun i krwar ki Zezi i enn sa bann zonm ki’n resisite. Pour konn zot pwennvi, Zezi i demann son bann disip: “Be zot, ki zot dir mon ete?” Deswit Pyer i reponn: “Ou menm Kris, Garson sa Bondye vivan.”​—Matye 16:13-16.

Zezi i dir ki Pyer i annan rezon pour ere akoz Bondye in revel sa avek li. I osi dir li: “Ou ou Pyer e lo sa ros mon pou batir mon kongregasyon, lanmor pa pou ranport laviktwar lo li.” Zezi pe dir ki li menm ki pou batir en kongregasyon e lanmor pa pou gard prizonnyen bann manm kongregasyon ki reste fidel ler zot lo later. I promet Pyer: “Mon pou donn ou bann lakle Rwayonm lesyel.”​—Matye 16:18, 19.

Zezi pa pe donn Pyer premye plas parmi bann zapot e i pa fer li vin fondasyon kongregasyon. Zezi ki sa Ros ki kongregasyon pou ganny batir lo la. (1 Korentyen 3:11; Efezyen 2:20) Pyer li pou ganny trwa lakle. I pou annan sa privilez pour ouver oubyen donn diferan group dimoun sa loportinite pour antre dan Rwayonm lesyel.

 Pyer pou servi sa premye lakle Lapannkot lannen 33 ler i montre bann Zwif ki’n repantir ek bann ki’n konverti dan larelizyon Zwif ki zot bezwen fer pour ganny sove. I pou servi sa dezyenm lakle pour donn bann Samariten loportinite pour antre dan Rwayonm Bondye. Apre, lannen 36, Pyer pou servi sa trwazyenm lakle pour donn bann dimoun lezot nasyon ki pa’n ganny sirkonsi sa loportinite pour antre dan Rwayonm Bondye. Korney, son fanmir ek zanmi ti premye dan sa group pour ganny sa loportinite.​—Akt 2:37, 38; 8:14-17; 10:44-48.

Pandan sa konversasyon, bann zapot Zezi i enkyet ler i predir ki byento i pou soufer e mor Zerizalenm. Pyer pa pe konpran ki Zezi pou ganny resisite pour al dan lesyel, alor i anmenn li akote e koz severman avek li. I dir: “Pa bezwen dir sa Senyer, sa pa pou zanmen ariv avek ou.” Me Zezi i vir son ledo avek li e dir: “Pas deryer mwan Satan! Ou parey en ros dan mon semen, parski ou pa mazin parey Bondye me plito parey en zonm.”​—Matye 16:22, 23.

Aprezan Zezi i kriy lezot dimoun apard ki son bann zapot e i eksplik zot ki i pa pou fasil pour swiv li. I dir: “Si en dimoun i oule swiv mwan, fodre i aret viv zis pour li menm e pran son poto martir e kontinyen swiv mwan. Parski, en dimoun ki oule sov son lavi pou perdi li, me sa ki perdi son lavi akoz mwan e akoz sa bon nouvel pou reganny li.”​—Mark 8:34, 35.

Parey nou’n vwar, pour ki en disip Zezi i ganny son laprouvasyon, i bezwen annan kouraz e pare pour fer sakrifis. Zezi i dir: “Nenport dimoun dan sa zenerasyon enfidel e move ki onte akoz mwan e akoz mon parol, Garson Bondye osi pou onte akoz li kan i vini dan laglwar son Papa avek son bann lanz sen.” (Mark 8:38) Alor ler Zezi i vini, “i pou donn sakenn dapre son kondwit.”​—Matye 16:27.