Tapae atura Iesu e ta ˈna mau pǐpǐ i Betesaida. Aratai maira te taata i te hoê tane matapo ia Iesu e taparu maira ia tapea ia ˈna ia ora to ˈna maˈi.

Aratai atura Iesu i taua tane ra i rapaeau i te oire rii ma te rave i to ˈna rima. Parai atura oia i te huare i nia i to ˈna na mata, e ui atura: “Eaha ta oe e ite ra?” Pahono maira te tane: “Te ite nei au i te taata, e au hoi i te tumu raau, te hahaere nei râ ratou.” (Mareko 8:23, 24) Tuu ihora Iesu i to ˈna na rima i nia i to ˈna na mata, e ite maitai ihora oia. Faahoˈi atura oia i teie tane i to ˈna fare a parau maitai ai ia ˈna eiaha e hoˈi i te oire rii.

I muri iho, pauma ˈtura Iesu e ta ˈna mau pǐpǐ i Kaisarea Philipi e 40 kilometera i te atea i te pae apatoerau. Tei te hoê teitei e 350 metera teie oire, e i te pae apatoerau hitia o te râ te tia ra te mouˈa Heremona ua tapoˈihia te tupuai i te hiona. E piti mahana aore ra hau atu no teie tere.

I te hoê vahi, haere atura Iesu e pure o ˈna anaˈe. E iva aore ra ahuru noa avaˈe te toe ra hou oia a pohe ai, e te haapeapea ra oia no ta ˈna mau pǐpǐ. Ua faaea aˈenei e rave rahi i te pee ia ˈna. Area te tahi atu, ua huru ê ïa aore ra aita i tiaturi faahou ia ˈna. Te uiui ra paha ratou no te aha oia i ore ai i farii ia faaarii te taata ia ˈna, aore ra i ore ai i horoa i te hoê tapao o te haapapu maitai o vai mau â o ˈna.

I to te mau pǐpǐ tapiriraa mai ia Iesu e pure ra, ui atura oia: “O vai te Tamaiti a te taata nei i ta te taata parauraa?” Pahono maira ratou: “O Ioane Bapetizo ta vetahi, o Elia ta te tahi pae, o Ieremia aore ra hoê o te mau peropheta ta te tahi atu.” Ua manaˈo iho â vetahi e o Iesu hoê o taua mau taata ra tei tia mai te pohe mai. No te ite i to ratou manaˈo, ui atura Iesu i ta ˈna mau pǐpǐ: “Outou râ, o vai au i ta outou parauraa?” Pahono oioi maira Petero: “O te Mesia oe, te Tamaiti a te Atua ora.”—Mataio 16:13-16.

Parau atura Iesu ia Petero e ia oaoa oia i ta te Atua i faaite ia ˈna, a na ô faahou ai: “E parau atoa ˈtu vau ia oe: O Petero oe. E patu vau i ta ˈu amuiraa i nia i teie pǎpǎ, e e ore te uputa o te Apoo e upootia i nia i te reira.” Te parau ra Iesu e o ˈna iho te patu i te hoê amuiraa, e aita to te Apoo e mana i nia i to ˈna mau mero ia tapea ratou i to ratou haapao maitai i te fenua. Fafau atura oia ia Petero: “E horoa ˈtu vau ia oe i te mau taviri o te Faatereraa arii o te raˈi.”—Mataio 16:18, 19.

Aita Iesu i faateitei ia Petero i nia ˈˈe i te mau aposetolo, aita atoa i faariro ia ˈna ei niu no te amuiraa. O Iesu iho te Pǎpǎ i nia iho e patuhia ˈi te amuiraa. (Korinetia 1, 3:11; Ephesia 2:20) E horoahia râ ia Petero e toru taviri. Tei ia ˈna ra te haamaitairaa e iriti, ei auraa parau, i te ravea e ô ai te tahi mau pǔpǔ taata i roto i te Faatereraa arii o te raˈi.

E faaohipa Petero i te taviri matamua i te Penetekose  33, a faaite ai i te ati Iuda e te feia o tei farii i te haapaoraa ati Iuda tei tatarahapa eaha te rave ia ora ratou. E faaohipa oia i te piti o te taviri no te iriti i te ravea e ô ai to Samaria e tiaturi ra ia Iesu i roto i te Faatereraa arii a te Atua. E i 36, e faaohipa Petero i te toru o te taviri ia fanaˈo atoa to te mau nunaa ěê peritome-ore-hia, mai ia Korenelio e te tahi atu, i taua ravea ra.—Ohipa 2:37, 38; 8:14-17; 10:44-48.

A aparau ai ratou, ua horuhoru te mau aposetolo i to Iesu tohuraa i te mau mauiui e te pohe ta ˈna e fatata i te faaruru i Ierusalema. No to ˈna taa ore e e faatiahia Iesu no te ora i te raˈi, aratai rii ê ihora Petero ia ˈna e tamaˈi atura: “E te Fatu, eiaha oe e na reira i te parau, e ore roa oe e roohia i teie mau mea.” Huri tua maira râ Iesu, e na ô ihora ia Petero: “Haere na muri mai ia ˈu, Satani! E turoriraa oe no ˈu, no te mea e ere to oe manaˈo i to te Atua, to te taata râ.”—Mataio 16:22, 23.

Pii atura Iesu i ta ˈna mau aposetolo e te tahi atu, e faataa ˈtura e e ere mea ohie ia riro ei pǐpǐ na ˈna. Ua parau oia: “Te taata e hinaaro e pee mai ia ˈu, ia haapae ïa ia ˈna iho e ia rave i ta ˈna pou haamauiuiraa, a pee noa mai ai ia ˈu. O tei tapea hoi i to ˈna ora, e ere ïa oia i te reira. O tei ere râ i to ˈna ora no ˈu nei e no te parau apî oaoa, e noaa faahou mai ïa ia ˈna te reira.”—Mareko 8:34, 35.

No reira, ia fanaˈo te mau pǐpǐ a Iesu i ta ˈna farii maitai, ia itoito ïa ratou e ia ora i te hoê oraraa haapae e tia ˈi. Parau atura Iesu: “Te taata hoi o te haama ia ˈu e i ta ˈu mau parau i roto i teie nei uˈi faaturi e te hara, e haama atoa ïa te Tamaiti a te taata nei ia ˈna ia haere mai oia ma te hanahana o to ˈna Metua e te mau melahi moˈa.” (Mareko 8:38) Ia haere mai Iesu, “i reira oia e faautua ˈi aore ra e haamaitai ai i te taata atoa ia au i ta ratou i rave.”—Mataio 16:27.